ފަތުރުވެރިކަމަށް ލިބިދާނެ ގެއްލުމަކަށްޓަކައި ބޭރުގެ އޭޖެންޓުންގެ އަތުން ނަގާ ޓެކްސް ބޮޑުކުރުމުގެ މައްސަލަ އަލުން ދިރާސާކުރުމަށް މެންބަރު ކުޑޫ އެދިވަޑައިގެންފި
18 ސެޕްޓެމްބަރު 2026 | ހުކުރު 06:09ބޭރުގެ ޓްރެވަލް އެޖެންޓުންގެ އަތުން 17 އިންސައްތަ ޓެކްސް ނަގަން ނިންމުމަކީ ފަތުރުވެރިކަމުގެ ސިނާއަތަށް އޮތް ނުރައްކަލެއް ކަމަށް ބުނެ، އެ ނިންމުން މުރާޖައާކުރުމަށް "ޑެސްޓިނޭޝަން ފިއުޗާ" އިން ވަނީ ގޮވާލާފައި. މި ބަދަލަކީ އެކަށީގެންވާ ދިރާސާއެއް ނެތި ގެނެސްފައިވާ ބަދަލަކަށް ވާތީ، މީގެ ސަބަބުން ރާއްޖެއަށް އަންނަ ފަތުރުވެރިން މަދުވެދާނެ ކަމުގެ ބިރު އޮތްކަން މެންބަރު ކުޑޫ ވަނީ ފާހަގަކުރައްވާފައި. އެހެންކަމުން، މި މައްސަލަ މާލިއްޔަތު ކޮމިޓީން އަވަހަށް ދިރާސާކޮށްދިނުމަށް މަޖިލީހުގެ ރައީސްގެ އަރިހުން އޭނާ ވަނީ އެދިވަޑައިގެންފައި
ޗައިނާގެ ފަތުރުވެރިންތަކެއް އާންމު ފެރީއަކުން ފައިބަނީ | ގެޓީ އިމޭޖަސް
އަންނަ އޮކްޓޫބަރު މަހުން ފެށިގެން ބޭރުގެ ޓްރެވަލް އެޖެންޓުންގެ އަތުން 17 އިންސައްތަ ޓެކްސް ނަގާ ގޮތަށް ޖީއެސްޓީ ގާނޫނަށް ގެނެސްފައިވާ ބަދަލުގެ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީ މެދުވެރިކޮށް އަވަސް މުއްދަތެއްގެ ތެރޭގައި ދިރާސާކޮށް ބަލައިދެއްވުމަށް އެދިވަޑައިގެން، ގަލޮޅު އުތުުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ސިޓީއެއް ފޮނުއްވައިފި އެވެ.
ރާއްޖޭގެ ފަތުރުވެރިކަން ކުރިއަރުވައި، ތިމާވެއްޓާއި ސަގާފަތް ރައްކާތެރިކުރުމަށް މަސައްކަތްކުރާ މަދަނީ ޖަމިއްޔާއެއް ކަމަށްވާ "ޑެސްޓިނޭޝަން ފިއުޗާ" އިން ތައްޔާރުކުރި ރިޕޯޓުގައި ފާހަގަކޮށްފައިވާ ގޮތުގައި، މި އަހަރު ރާއްޖޭގެ ފަތުރުވެރިކަން ދަށްވެފައިވާ ދަނޑިވަޅެއްގައި އައު ޓެކުހެއް ތައާރަފުކުރުމަކީ މި ސިނާއަތުގެ ވިޔަފާރިތަކަށް ބޮޑު ނުރައްކަލަކަށް ވެގެންދާނެ ކަމެކެވެ. އެހެންކަމުން ބޭރުގެ ޓްރެވަލް އެޖެންޓުންގެ އަތުން 17 އިންސައްތަ ޓެކްސް ނަގަން ނިންމި ނިންމުމަށް އަމަލުކުރުން މަޑުޖައްސައިލުމަށާއި ޤާނޫނަށް އިސްލާހެއް ގެނެސްގެން އެ ބައި އުވައިލުމަށް އެ ޖަމިއްޔާއިން ވަނީ ގޮވައިލައިފަ އެވެ.
މަޖިލީހުގެ ރައީސަށް ފޮނުއްވި ސިޓީގައި މެންބަރު ކުޑޫ ވަނީ މި ރިޕޯޓަށް ރިއާޔަތްކުރައްވާ، ބޭރުގެ ޓުއާ އޮޕަރޭޓަރުންގެ އަތުން މި ޓެކްސް ނަގާ ގޮތަށް ޤާނޫނު ބަދަލުކޮށްފައިވަނީ ބޭރުގެ ކަމާބެހޭ ފަރާތްތަކާ ގުޅިގެން ހަދަންޖެހޭ ދިރާސާތައް ފުރިހަމައަށް ނުހަދާކަން ފާހަގަކުރައްވާފަ އެވެ. އަދި ފަތުރުވެރިކަމުގެ ދާއިރާއަށް ކޮށްފާނެ އަސަރަކަށް ބެލުމެއް ނެތި، ހަމައެކަނި ލިބޭނެ ކަމަށް ލަފާކުރާ އާމްދަނީގެ އަންދާޒާތަކަށް ބަލައި މި ބަދަލު ގެނެސްފައިވާތީ، ރައްޔިތުންގެ މަޖިލީހުން މި ނިންމުން މުރާޖައާކުރުން މުހިންމު ކަމަށް ވަނީ ވިދާޅުވެފަ އެވެ.
މީގެއިތުރުން، ބޭރުގެ އޮޕަރޭޓަރުންގެ އަތުން އަހަރަކު 1.6 ބިލިއަން ރުފިޔާގެ އާމްދަނީއެއް ލިބޭނެ ކަމަށް ސަރުކާރުން އަންދާޒާކޮށްފައިވީ ނަމަވެސް، ޓުއަރ އޮޕަރޭޓަރުންގެ ގޮތުގައި ޓެކްސް ދައްކާ ފަރާތްތަކުގެ ތަފުސީލުތައް އޮޑިޓުކޮށް ބަލަންޖެހޭނެ ކަމަށާއި، މި ޤާނޫނު ތަންފީޒުކުރުމުގައި ދިމާވާނެ ގޮންޖެހުންތައް މަޖިލީހުން ދެނެގަންނަންޖެހޭނެ ކަމަށް ވެސް މެންބަރު ވަނީ ފާހަގަކުރައްވާފަ އެވެ.
އަދި މި ބަދަލުގެ ސަބަބުން ބޭރުގެ މައިގަނޑު ޓްރެވަލް އިންޑަސްޓްރީ ޖަމިއްޔާތަކުން ކަންބޮޑުވުން ފާޅުކުރަމުންދާއިރު، މީގެ ސަބަބުން ރާއްޖެއަށް އަންނަ ފަތުރުވެރިންގެ އަދަދު އިތުރަށް މަދުވެގެން ނުދާނެކަން ކަށަވަރުކުރުމަކީ ކޮންމެހެން މުހިންމު ކަމެއް ކަމަށް ވެސް އޭނާ ވަނީ މި ސިޓީގައި ލިޔުއްވާފަ އެވެ.
އެހެންކަމުން، ޑެސްޓިނޭޝަން ފިއުޗާގެ ރިޕޯޓުގައި ފާހަގަކޮށްފައިވާ ކަންކަމަށް ރިއާޔަތްކުރައްވާ، މި މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީ މެދުވެރިކޮށް އަވަސް މުއްދަތެއްގެ ތެރޭގައި ދިރާސާކޮށް ބަލައިދެއްވުމަށް އެ ސިޓީގައި ވަނީ އެދިވަޑައިގެންފަ އެވެ.
