ބޭރުގެ ޓުއަރ އޮޕަރޭޓަރުން އަތުން ޓެކްސް ނަގަން ނިންމުމާއި ގުޅިގެން އޭގެ އަސަރުތައް ދެނެގަތުމަށް މަޓާޓޯއިން ސަރވޭއެއް ފަށައިފި
17 ސެޕްޓެމްބަރު 2026 | ބުރާސްފަތި 17:22ޓީޖީއެސްޓީގެ އައު އުސޫލުތަކުގެ ސަބަބުން ފަތުރުވެރިކަމުގެ ސިނާއަތަށް ކުރާނެ އަސަރުތައް ދެނެގަތުމަށް މަޓާޓޯއިން ވަނީ ދިރާސާއެއް ފަށާފައި. މި ސާވޭގެ މައިގަނޑު މަގުސަދަކީ ޓެކްސްގެ ބަދަލުތަކުން ޚިދުމަތްތަކުގެ އަގަށާއި ވިޔަފާރީގެ ފައިދާއަށް ކުރާނެ އަސަރުތައް ބަލައި، ސަރުކާރަށް ބޭނުންވާ ލަފާ ދިނުން. މި ބަދަލުތަކާ ގުޅިގެން ސިނާއަތުގެ ގިނަ ފަރާތްތަކަކުން ދަނީ ކަންބޮޑުވުން ފާޅުކުރަމުން
ސީޕްލޭން ޗެކިން އޭރިއާގައި ފަތުރުވެރިން ކިޔޫ ހަދައިގެން | އެމްއޭސީއެލް
މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓާސް (މަޓާޓޯ) އިން، ޓީޖީއެސްޓީގެ އައު އުސޫލުތަކުގެ ސަބަބުން ފަތުރުވެރިކަމުގެ ސިނާއަތަށް ކުރާނެ އަސަރުތައް ދެނެގަތުމަށް ހާއްސަ ސަރވޭއެއް ފަށައިފި އެވެ.
މި ސަރވޭއަކީ އަންނަ އޮކްޓޫބަރު މަހުގެ އެއްވަނަ ދުވަހުން ފެށިގެން އަމަލުކުރަން ފަށާ "ޓީޖީއެސްޓީ ޑެސްޓިނޭޝަން ޕްރިންސިޕަލް" ރިކުއާމަންޓްތަކާ ގުޅިގެން، ރާއްޖޭގެ ފަތުރުވެރިކަމުގެ އުފެއްދުންތައް ވިއްކާ ބޭރުގެ ފަރާތްތަކަށް ކުރާނެ ވިޔަފާރި އަދި އޮޕަރޭޝަނަލް އަސަރުތައް ވަޒަންކުރުމަށް ކުރިއަށްގެންދާ ދިރާސާއެކެވެ.
މަޓާޓޯއިން ބުރާސްފަތި ދުވަހު ނެރުނު ނޫސްބަޔާނެއްގައި ބުނެފައިވަނީ، މި ސަރވޭގައި ބައިވެރިވުމުގެ ފުރުސަތު ރާއްޖެއާއި ރާއްޖޭއިން ބޭރުގެ ޓްރެވަލް އެޖެންޓުންނާއި ޓުއަރ އޮޕަރޭޓަރުންނާއި ރިސޯޓުތަކާއި ހޮޓާ، ގެސްޓްހައުސް، އޮންލައިން ޓްރެވަލް އެޖެންސީތަކުގެ އިތުރުން އެއާލައިންތަކަށް ވެސް ހުޅުވާލެވިފައިވާ ކަމަށެވެ. މި ސާވޭގެ މައިގަނޑު މަގުސަދަކީ އައު ޓެކްސް އުސޫލުގެ ސަބަބުން ހިދުމަތްތަކުގެ އަގުތަކަށާއި އެއްބަސްވުންތަކަށާއި ބުކިންތަކުގެ އިތުރުން ވިޔަފާރީގެ ފައިދާއަށް ކުރާނެ އަސަރުތައް ދެނެގަތުމެވެ.
މީގެ އިތުރުން، މި ބަދަލުތަކަށް ތައްޔާރުވުމަށް ވިޔަފާރިތަކަށް އެކަށީގެންވާ ވަގުތު ލިބިފައިވޭތޯ ބެލުމާއި، މިކަމުގެ ސަބަބުން ރާއްޖޭގެ ފަތުރުވެރިކަމުގެ ވާދަވެރިކަމަށް އަތުވެދާނެ ބަދަލުތަކާ ގުޅޭގޮތުން ސިނާއަތުގެ އިސް ފަރާތްތަކުގެ ހިޔާލު ހޯދުމަށް ވެސް މަޓާޓޯއިން ވަނީ ނިންމާފަ އެވެ. މަޓާޓޯއިން ހާމަކުރި ގޮތުގައި، މި ސަރވޭއިން ލިބޭ މައުލޫމާތުތަކުގެ އަލީގައި ސަރުކާރަށާއި ކަމާބެހޭ ފަރާތްތަކަށް ފަތުރުވެރިކަމުގެ ސިނާއަތަށް ކުރިމަތިވާ ގޮންޖެހުންތަކުން އަރައިގަތުމަށް ބޭނުންވާ ލަފަޔާއި އިރުޝާދު ދެވޭނެ އެވެ.
މަޓާޓޯއިން އަބަދުވެސް މަސައްކަތް ކުރަނީ ހެކިތަކުގެ މައްޗަށް ބިނާކޮށް ސިނާއަތުގެ ކުރިއެރުމަށް ވަކާލާތު ކުރުމަށް ކަމަށް އެ ޖަމިއްޔާއިން ބުނެ އެވެ. އެހެންކަމުން، ފަތުރުވެރިކަމުގެ ސިލްސިލާގައި ހިމެނޭ ހުރިހާ ފަރާތްތަކެއްގެ އަޑު އިއްވުމަކީ މުހިންމު ކަމެއް ކަމަށް ފާހަގަކޮށް، ވީހާވެސް ގިނަ ފަރާތްތަކުން މި ސަރވޭގައި ބައިވެރިވުމަށް އެ ޖަމިއްޔާއިން ވަނީ އިލްތިމާސްކޮށްފަ އެވެ.
ޓެކްސް ނެގޭ މުދަލާއި ޚިދުމަތް ހަމައެކަނި ދިވެހިރާއްޖޭގައި ރަޖިސްޓްރީވެފައިވާ ވިޔަފާރިތަކަށް ޚާއްސަވެފައި އޮތް އޮތުން ނިމުމަކަށް ގެނަސް، ރާއްޖޭގައި ފޯރުކޮށްދޭ މުދަލާއި ހިދުމަތުން ޖީއެސްޓީ ނެގޭ ގޮތަށް ގާނޫނަށް ބަދަލުގެންނަން ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅާ މި ގާނޫނު ވަނީ ފާސްކޮށްފަ އެވެ. އަދި މި ބިލު ފާސްކުރުމުން މަޓާޓޯގެ އިތުރުން ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. ނަމަވެސް، އެކަމަށް ބެއްލެވުމެއް ނެތި ރައީސް މުއިއްޒު ވަނީ މި ބިލު ތަސްދީގުކުރައްވާފަ އެވެ.
