ބޭރުގެ ޓުއަރ އޮޕަރޭޓަރުން އަތުން ޓެކްސް ނަގަން ނިންމުމާއި ގުޅިގެން ޔޫރަޕްގެ ވިޔަފާރިވެރިންގެ ކަންބޮޑުވުން އެބަލިބޭ: ރައީސް ނަޝީދު
16 ސެޕްޓެމްބަރު 2026 | ބުދަ 12:35ބޭރުގެ ޓްރެވަލް އެޖެންޓުންގެ އަތުން ޓެކްސް ނަގަން ނިންމުމުން ޔޫރަޕްގެ ވިޔަފާރިވެރިންގެ ކަންބޮޑުވުންތައް ހުރިކަން ކުރީގެ ރައީސް ނަޝީދު ހާމަކުރައްވައިފި. މަތިމައްޗަށް ޓެކްސް ނެގުމާއި އާމްދަނީ މާރުކުރަން މަޖުބޫރުވުމަކީ ރާއްޖެ ބަގުރޫޓުވުމަށް މަގުފަހިވާނެ ކަމެއް ކަމަށް އެމަނިކުފާނު ވިދާޅުވި
ކުރީގެ ރައީސް ނަޝީދު | އެމްޑީޕީ ސެކްރިޓޭރިއެޓް
ރާއްޖެއިން ބޭރުގެ ޓްރެވަލް އެޖެންޓުން އަދި ޓުއަރ އޮޕަރޭޓަރުން އަތުން ޓެކްސް ނަގަން ނިންމުމާއި ގުޅިގެން ޔޫރަޕްގެ ބޮޑެތި ޓުއަރ އޮޕަރޭޓަރުންނާއި، ވިޔަފާރިވެރިން ކަންބޮޑުވުން ފާޅުކޮށް އެމަނިކުފާނަށް ގުޅުއްވަމުންދާ ކަމަށް އެމްޑީޕީގެ ޗެއަރޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ބުދަ ދުވަހު "އެކްސް" ގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ ބޭރު ފައިސާއިން ލިބޭ އާމްދަނީގެ 40 އިންސައްތަ ބޭންކަށް މާރުކުރަން ޖެހުމުން، ދުވަހުގެ ހަރަދު އަދި ލޯނަށް ކަނޑާފައި، ޑިވިޑެންޑަށް ފައިސާ ދައްކަން އެކަށީގެންވާ މިންވަރަށް ފައިސާ ނުހުންނާތީ ޔޫރަޕްގެ ބޮޑެތި ވިޔަފާރިވެރިންގެ ކަންބޮޑުވުންތައް އެމަނިކުފާނަށް ހިއްސާ ކުރަމުންދާ ކަމަށެވެ.
މިހާރު ވެސް ޓުއަރ އޮޕަރޭޓަރުން ޖީއެސްޓީގެ ގޮތުގައި 20 އިންސައްތަ ޔޫރަޕަށް ދައްކަމުންދާ ކަމަށާއި، ރާއްޖޭގައި ރަޖިސްޓްރީ ކޮށްގެން ހިންގާ ކުންފުނިތަކުން ވެސް ޓީޖިއެސްޓީ މީރާއަށް ދައްކާއިރު، އޭގެ އިތުރަށް މަތިމައްޗަށް ޓެކްސް ދެއްކުމަކީ ނުކަޅަދާނަ ކަމަކަށް ވާނެ ކަމަށް ރައީސް ނަޝީދު ވިދާޅުވި އެވެ.
މީގެ އިތުރުން، ސަރުކާރުން މިކަންބޮޑުވުންތަކަށް ހައްލު ހޯދައިދޭތަން ނުފެންނަ ކަމަށް އަދި މިއީ ދިވެހިރާއްޖެ ބަނގުރޫޓުވުމުގެ ތުންފަތް މަތި ކަމަށް ރައީސް ނަޝީދު ވިދާޅުވި އެވެ.
ޓެކްސް ނެގޭ މުދަލާއި ޚިދުމަތް ހަމައެކަނި ދިވެހިރާއްޖޭގައި ރަޖިސްޓްރީވެފައިވާ ވިޔަފާރިތަކަށް ޚާއްސަވެފައި އޮތް އޮތުން ނިމުމަކަށް ގެނަސް، ރާއްޖޭގައި ފޯރުކޮށްދޭ މުދަލާއި ހިދުމަތުން ޖީއެސްޓީ ނެގޭ ގޮތަށް ގާނޫނަށް ބަދަލުގެންނަން ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅާ މި ގާނޫނު ވަނީ ފާސްކޮށްފަ އެވެ. އަދި މި ބިލު ފާސްކުރުމުން ގިނަ ބައެއްގެ ކަންބޮޑުވުންތައް ހުރި ނަމަވެސް، އެކަމަށް ބެއްލެވުމެއް ނެތި ރައީސް މުއިއްޒު ވަނީ މި ބިލު ތަސްދީގުކުރައްވާފަ އެވެ.
