މި ސަރުކާރު މި ގެންދަނީ ރާއްޖެ ބަނގުރޫޓު ކުރަމުން: ނަޝީދު
29 އޯގަސްޓު 2026 | ހޮނިހިރު 13:58ބޭރު ފައިސާގެ ގަވާއިދަށް ގެނައި ބަދަލާއެކު އާމްދަނީގެ 40 އިންސައްތަ މާރުކުރަން މަޖުބޫރުވުމުން ވިޔަފާރިތައް ބަނގުރޫޓުވެ، ވަޒީފާތަކަށް ނޭދެވޭ އަސަރުކޮށްފާނެ ކަމުގެ ކަންބޮޑުވުން ކުރީގެ ރައީސް ނަޝީދު ފާޅުކުރައްވައިފި. މި އިސްލާހާ ގުޅިގެން މަޓީ އާއި މަޓާޓޯގެ އިތުރުން، މުސާރަ އާއި ސަރވިސް ޗާޖު ރުފިޔާއިން ދިނުމާ ދެކޮޅަށް ރިސޯޓު މުވައްޒަފުން ވެސް ދަނީ ޕެޓިޝަނެއްގައި ސޮއިކުރަމުން
އެމްޑީޕީގެ ޗެއަރޕާސަން އަދި ކުރީގެ ރައީސް މުހައްމަދު ނަޝީދު | ރާއްޖެއެމްވީ
ރައީސް ޑރ. މުހައްމަދު މުއިއްޒުގެ ސަރުކާރުން ދަނީ މި ގައުމުގެ ވިޔަފާރިވެރިންނާއި ގައުމު ބަނގުރޫޓު ކުރަމުން ކަމަށް އިދިކޮޅު އެމްޑީޕީގެ ޗެއަރޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި އެމަނިކުފާނު ވިދާޅުވީ ރާއްޖޭގެ ގުދުރަތީ ވަސީލަތްތައް ބޭނުން ކޮށްގެން ތަނަވަސްކަން ހޯދެނީ ވިޔަފާރިވެރިޔާ ވެސް މަސައްކަތް ކުރާ މީހާ ވެސް ހުރީ ތީ ކަމަށެވެ.
ވިޔަފާރިވެރިޔާ ހޯދާ މުއްސަނދިކަމަކީ އޭނާގެ މަސައްކަތުން ހޯދާ މުއްސަނދިކަމެއްކަން ފާހަގަ ކުރައްވާ ނަޝީދު ވިދާޅުވީ އެ މުއްސަނދިކަން ގުޅިފައި ވަނީ މުޅި ގައުމުގެ އެންމެންގެ ވެސް ތަނަވަސްކަމާ ކަމަށެވެ. އަދި ވިޔަފާރިވެރިޔާ އަށް ލިބޭ ބޭރު ފައިސާގެ 40 އިންސައްތަ ދިވެހި ރުފިޔާ އަށް މާރު ކުރުމަށް މަޖުބޫރު ކުރުމުން އެ ވިޔަފާރިތައް ދެކޮޅު ނުޖެހި، ބަނގުރޫޓު ވެދާނެ ކަމަށް ނަޝީދު ވިދާޅުވި އެވެ.
އެމަނިކުފާނު ވިދާޅުވީ ވިޔަފާރިވެރިޔާ ބަނގުރޫޓު ވުމުން އެހެން މީހުންގެ ވަޒީފާތައް ގެއްލޭނެ ކަމަށާއި ރިސޯޓު ވިޔަފާރި އާއި ގުޅުން ހުރި ދެން ހުރި ހުރިހާ ވިޔަފާރިއަކަށް އޭގެ އަސަރު ކުރާނެ ކަމަށެވެ. އަދި މި ސަރުކާރު މި ގެންދަނީ ރާއްޖެ ބަނގުރޫޓު ކުރަމުން ކަމަށް ވެސް ނަޝީދު ވިދާޅުވި އެވެ.
ރިސޯޓު މުވައްޒަފުންނަށް ލިބޭ ޑޮލަރުގެ އާމްދަނީ އިން 40 އިންސައްތަ ބޭންކަށް މާރުކުރަން ޖެހޭގޮތަށް ބޭރު ފައިސާގެ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހުން ވަނީ ފާއިތުވި ހަފުތާގައި ފާސްކޮށްފަ އެވެ.
މި އިސްލާހުތަކާއި ގުޅިގެން ރިސޯޓު މުވައްޒަފުންނަށް ދިވެހި ރުފިޔާ އިން ސަރވިސް ޗާޖް އަދި މުސާރަ ދިނުމާއި ދެކޮޅަށް މުވައްޒަފުން ޕެޓިޝަނެއްގައި ވަނީ ސޮއިކުރަން ފަށާފަ އެވެ. ޓޫރިޒަމް އެމްޕްލޯއިސް އެސޯސިއޭޝަން އޮފް މޯލްޑިވްސް (ޓީމް) އިން އިސްނަގައިގެން ކުރިޔަށްގެންދާ މި ހަރަކާތާ ގުޅިގެން ހުކުރު ދުވަހު ޓީމްގެ ސޯޝަލް މީޑިޔާގައި އާންމުކޮށްފައިވާ ބަޔާނުގައި އެ ޖަމިއްޔާގެ އެންމެހާ މެންބަރު ރިސޯޓުތަކާއި ޓީމްގެ މެންބަރު ނޫން ރިސޯޓުތަކުން ވެސް މި ޕެޓިޝަނުގައި ސޮއިކުރަން ވަނީ ބާރު އަޅައިފަ އެވެ.
ގާނޫނަށް ގެންނަ މި އިސްލާހުގެ ސަބަބުން ޓީމްގެ އިތުރުން މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އާއި މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓާސް (މަޓާޓޯ) އިން ވެސް ވަނީ ކަންބޮޑުވުން ފާޅުކޮށްފަ އެވެ.
