10 ދުވަހުގެ ތެރޭގައި ޑޮލަރުގެ އަގު 19 ރުފިޔާއަށް ތިރިކުރުމަށް ރައީސް ނަޝީދު ސަރުކާރަށް ގޮވާލައްވައިފި
12 އޯގަސްޓު 2026 | ބުދަ 13:12ރާއްޖޭގައި ޑޮލަރުގެ ތާށިކަން ކުރިމަތިވެފައިވަނީ ސަރުކާރުގެ އިސްރާފު ބޮޑުވުމުން ކަމަށް ވިދާޅުވެ، ކުރިއަށް އޮތް 10 ދުވަސްތެރޭގައި ޑޮލަރުގެ އަގު 19 ރުފިޔާއަށް ތިރިކުރުމަށް ރައީސް ނަޝީދު ވަނީ ގޮވާލައްވައިފި. މީގެއިތުރުން ބާޒާރުގައި ތަކެތީގެ އަގު އިންތިހާއަށް އުފުލެމުންދާތީ އެކަމުގެ ކަންބޮޑުވުން ފާޅުކުރައްވައި، ރައްޔިތުންނަށް ލުއި ގޮތްތަކެއް ހޯދައިދިނުމަށް އެމަނިކުފާނު ވަނީ ސަރުކާރަށް ގޮވާލައްވާފައި
ބުދަ ދުވަހު އޮތް ނޫސްވެރިންގެ ބައްދަލުވުމުގައި އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވާހަކަ ދައްކަވަނީ | އެމްޑީޕީ ސެކްރިޓޭރިއެޓް
10 ދުވަހުގެ ތެރޭގައި ޑޮލަރުގެ އަގު 19 ރުފިޔާއަށް ތިރިކުރުމަށް ކުރީގެ ރައީސް އަދި އެމްޑީޕީގެ ޗެއާޕަރސަން މުހައްމަދު ނަޝީދު، ރައީސް ޑރ މުހައްމަދު މުއިއްޒުގެ ކިބައިން އެދިވަޑައިގަންނަވައިފި އެވެ.
ބުދަ ދުވަހު އެމްޑީޕީގެ ބޭއްވެވި ނޫސްވެރިންގެ ބައްދަލުވުމުގައި ނަޝީދު ވަނީ ރާއްޖޭގައި ދިމާވެފައިވާ ޑޮލަރުގެ ތާށި ކަމާއި ގުޅޭގޮތުން ވާހަކަ ދައްކަވާފައި އެވެ. އެގޮތުން ޑޮލަރު ލިބުމުގައި ދަތިކަން އައިސްފައި މިވަނީ ސަރުކާރުގެ ހަރަދުތައް ބޮޑުވުމުގެ އިތުރުން ސަރުކާރުން ބޭކާރު ހަރަދުތައް ކުރާތީ ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވަނީ ޑޮލަރުގެ އަގު 10 ދުވަސް ތެރޭ 19 އަށް ތިރިކޮށް، އެއް މަސް ދުވަހުގެ ތެރޭގައި 17 ރުފިޔާއަށް ތިރިކުރެއްވުމަށް އެދިވަޑައިގަންނަވާފަ އެވެ.
އަޅުގަނޑުމެން ރައީސް ޑރ. މުއިއްޒުގެ އަރިހުން މި އެދެނީ 10 ދުވަހުގެ ތެރޭގައި 19 ރުފިޔާއަށް ޑޮލަރުގެ އަގު ތިރި ކޮށްދެއްވާށޭ، 15.42 އެއް ވެސް ނޫނޭ އެނގޭތޯ ދޫކޮށްލީ 15.42. އެއް މަސް ދުވަހުގެ ތެރޭގައި 17 ރުފިޔާއަށް އެ ޑޮލަރުގެ އަގު ރައީސް ޑރ. މުއިއްޒު ތިރިކޮށްދެއްވާށޭމުހައްމަދު ނަޝީދު
މީގެއިތުރުން ތަކެތީގެ އަގު ބޮޑުވަމުން އަންނަ ކަމަށް ވިދާޅުވެ، ރައީސް ނަޝީދު ވަނީ ކަންބޮޑުވުން ފާޅުކުރައްވާފައި އެވެ. އަދި ތަކެތީގެ އަގު ބޮޑުވުމަކީ ސިޔާސީ ކަންކަން ގޭތެރެއަށް ވައްދައިގެން މިނިސްޓަރުން ޓިކްޓޮކް ކުޅެންވީ ވަގުތެއް ނޫންކަމަށް ރައީސް ނަޝީދު ވިދާޅުވެފައިވެ އެވެ.
އަޅުގަނޑު ދަންނަވާނީ ރައީސް ޑރ. މުއިއްޒު އަޅުގަނޑަށް ސާދަ ރުފިޔާއަށް ވުރެ ހެޔޮކޮށް ފިޔާ ކިލޯއެއް މިއަދު އަޅުގަނޑަށް ހޯދައްވައި ދެއްވާށޭ އެ ހުރި ފިހާރައެއް ޑރ. މުއިއްޒު، އަޅުގަނޑު ކައިރި ވިދާޅުވެއްޖެޔާ ހަމަ ވަރަށް އުފާ ވާނެ އަދި ކެބެޖް ކިލޯއެއް 105 ރުފިޔާއަށް ވުރެ ހެޔޮކޮށް އެއީ މިދިޔަ ހަފްތާގައި ކެބެޖް ކިލޯއެއް ޑރ. މުއިއްޒަށް އެނގި ވަޑައިގަންނަވާނެ، އަޅުގަނޑުމެން މިގަތީ 65 ރުފިޔާއަށް. ދޮންކިޔޮ ކިލޯއެއް 70 ރުފިޔާއަށް ވުރެ ހެޔޮކޮށް ޑރ. މުއިއްޒު ދެއްވާފިއްޔާ އަޅުގަނޑުމެން ގެޔަށް ހަމަ ގައިމު ވެސް ގަންނާނަން. ވަކި އާފަލެއް ފަސް ރުފިޔާ ފަންސާސް ލާރިއަށް ވުރެ ހެޔޮކޮށް ޑރ. މުއިއްޒު އަޅުގަނޑަށް ދެއްވާފިއްޔާ ވަރަށް އުފަލުން ކާނަންމުހައްމަދު ނަޝީދު
ރައީސް މުއިއްޒު ވެރިކަމާއި ހަވާލުވެވަޑައިގެން ފަހުން ތަކެތީގެ އަގު ބޮޑުވުމާއި، ޑޮލަރު ލިބުމުގައި ދަތިތަތައް ދިމާވަމުން ދާތީ އާންމު ރައްޔިތުންގެ ކަންބޮޑުވުން ވަނީ އިތުރުވެފައި އެވެ.
