ތިނަދޫ މޭޔަރު ސައުދު އަށް ކޮށްފައި ވަނީ ސިޔާސީ ދައުވާތަކެއް، އަނބުރާ ގެންދިއުމަށް ސަރުކާރަށް ގޮވާލަން: ނަޝީދު
1 ސެޕްޓެމްބަރު 2026 | އަންގާރަ 19:23ތިނަދޫ ސިޓީގެ އާބާދީއާ ގުޅޭގޮތުން ދައުލަތުގެ އިދާރާތަކަށް ދޮގު މައުލޫމާތު ހުށަހެޅި ކަމަށް ބުނެ އެ ރަށުގެ މޭޔަރު ސައުދު އަލީގެ މައްޗަށް ޕީޖީ އޮފީހުން ދެ ދައުވާއެއް އުފުލާފައިވާއިރު މި ދައުވާތަކަކީ އިންތިޚާބީ ކައުންސިލުތަކަށް ބިރުދެއްކުމަށް ކުރާ ސިޔާސީ ކަމެއް ކަމަށް ވިދާޅުވެ، އެ ދައުވާތައް އަނބުރާ ގެންދިއުމަށް ކުރީގެ ރައީސް މުހައްމަދު ނަޝީދު ވަނީ ގޮވާލައްވާފައި
ތިނަދޫ ސިޓީ މޭޔަރު ސައުދު އަލީ | ތިނަދޫ ސިޓީ ކައުންސިލް
ގދ. ތިނަދޫއަށް ސިޓީއެއްގެ ދަރަޖަ ހޯދުމަށްޓަކައި އެ ރަށުގެ އާބާދީއާ ގުޅޭގޮތުން ސައްހަ ނޫން މައުލޫމާތު ދައުލަތުގެ އިދާރާތަކަށް ހުށަހެޅިކަމަށް ތުހުމަތު ކުރެވޭ މައްސަލައިގައި، ތިނަދޫ ސިޓީގެ މޭޔަރު ސައުދު އަލީގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން ދެ ދައުވާއެއް އުފުލާފައިވާ އިރު، އެ ދައުވާތައް އަނބުރާ ގެންދިއުމަށް އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ގޮވާލައްވައިފި އެވެ.
އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ، މޭޔަރު ސައުދު އަށް މި ސަރުކާރުން ކޮށްފައި ވަނީ ސިޔާސީ ދައުވާތަކެއް ކަމަށެވެ. އަދި އެއީ އިންތިޚާބީ ކައުންސިލުތަކަށް ޖަލުގެ ބިރު ދެއްކުމަށް މި ސަރުކާރުން ކުރަމުންދާ ކަމެއް ކަމަށާއި އެކަން ބަލައި ނުގަންނާނެ ކަމަށް ރައީސް ނަޝީދު ވިދާޅުވި އެވެ.
މި މައްސަލައިގައި ސައުދުގެ މައްޗަށް އުފުލާފައިވަނީ އެނގިހުރެ ސައްހަނޫން ލިޔުމެއް ދިނުމުގެ ދައުވާ އާއި ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާ އެވެ.
ޕީޖީ އޮފީހުން ބުނި ގޮތުގައި، އެނގިހުރެ ސައްހަނޫން ލިޔުމެއް ދިނުމުގެ ދައުވާ ސައުދުގެ މައްޗަށް ކުރަނީ، ތިނަދޫއަކީ ސިޓީއެއްގެ ދަރަޖަ ލިބުމަށް ބޭނުންވާ 10،000 މީހުންގެ އާބާދީ ހަމަވާ ރަށެއްގެ ގޮތުގައި ދެއްކުމަށް މަސައްކަތް ކޮށްފައިވާތީ އެވެ. އެގޮތުން ލޯކަލް ގަވަރމަންޓް އޮތޯރިޓީ (އެލްޖީއޭ) އަށް އޭނާ ސޮއިކޮށް ފޮނުވި އާބާދީ ލިސްޓުގައި މަރުވެފައިވާ މީހުންގެ މައުލޫމާތާއި ސައްހަކަން ކަށަވަރުނުކުރެވޭ މައުލޫމާތު ހިމަނާފައިވާ ކަމަށް ޕީޖީ އޮފީހުން ބުނެ އެވެ.
މީގެ އިތުރުން އެލްޖީއޭއިން އައިޑީ ކާޑު ނަންބަރު ހިމެނޭ ސައްހަ ލިސްޓެއް ހިއްސާކުރުމަށް އެދުމުން، ސައުދު ސޮއިކޮށް ފޮނުވި ދެވަނަ ލިސްޓުގައި އެހެން ރަށްރަށުގައި ރަޖިސްޓްރީވެފައިވާ މީހުންގެ މައުލޫމާތާއި އެއް ނަންތަކެއް ތަކުރާރުކޮށް ހިމަނާފައިވާކަން ތަހުގީގަށް ހާމަވެފައިވާކަމަށް ޕީޖީ އޮފީހުން ބުނެ އެވެ.
އެ ލިސްޓުގައި ތިނަދޫގެ އާބާދީއަކީ 10،150 މީހުން ކަމަށް ބުނެ ސައްހަނޫން މައުލޫމާތު ހިއްސާކޮށްފައިވާކަމަށް ދައުވާގައި ބުނެފައިވެ އެވެ. މި ކުށް ސާބިތުވެއްޖެނަމަ، ކުށުގެ އަސާސީ އަދަބެއްގެ ގޮތުގައި 1 އަހަރާއި 7 މަހާއި 6 ދުވަހުގެ ޖަލު ހުކުމެއް އަންނާނެކަމަށް ޕީޖީ އޮފީހުން މައުލޫމާތުދެ އެވެ.
ސައުދުގެ މައްޗަށް އުފުލާފައިވާ ދެވަނަ ދައުވާ ކަމަށްވާ ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާ އުފުލާފައިވަނީ، މި މައްސަލައިގެ ތަހުގީގަށް ފުލުހުންނަށް ދޮގު މައުލޫމާތު ދީފައިވާތީ ކަމަށް ވެސް ޕީޖީ އޮފީހުން ބުނެ އެވެ.
މީގެއިތުރުން ފުލުހުންގެ ހިދުމަތުން މި މައްސަލަ ތަހުގީގު ކުރަމުންދިޔައިރު، ސިޓީއެއްގެ ދަރަޖަ ހޯދުމަށް ކައުންސިލުން ދައުލަތުގެ އިދާރާތަކަށް ހުށަހެޅި އާބާދީ ލިސްޓުތައް ހިއްސާކުރުމަށް އެދުމުން، އެފަދަ ލިސްޓެއް ފޮނުވިކަން ރެކޯޑު ކުރެވިފައިނުވާ ކަމަށް ބުނެ ސައުދު ސޮއިކޮށް ފެކްސް މެސެޖެއް ފޮނުވާފައިވާ ކަމަށް ޕީޖީ އޮފީހުން ބުނެ އެވެ. މި ދައުވާގެ އަސާސީ އަދަބަކީ 4 މަހާއި 24 ދުވަހުގެ ޖަލު ހުކުމެކެވެ.
ތިނަދޫއަށް ސިޓީއެއްގެ ދަރަޖަ ދީފައިވަނީ ނިމިދިޔަ އެމްޑީޕީގެ ސަރުކާރުގަ އެވެ.
