ޤައުމީ ޓީމަށް 100 މެޗު ހަމަކޮށް، ދަގަނޑޭ ފީފާގެ ސެންޗަރީ ކުލަބަށް!

ޤައުމީ ފުޓުބޯޅަ ޓީމަށް 100 މެޗު ކުޅެދީ، ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ސެންޗަރީ ކުލަބުން އަލީ އަޝްފާޤު (ދަގަނޑޭ) ޖާގަ ހޯދައިފި އެވެ.

އުމުރުން މިހާރު 40 އަހަރު ވެފައިވާ ދަގަނޑޭ، ފީފާގެ ސެންޗަރީ ކުލަބުން ޖާގަ ހޯދީ ހޯމަ ދުވަހުގެ ރޭ ރާއްޖެ އިން އަފްޣާނިސްތާންއާ ދެކޮޅަށް ކުޅުނު މެޗުގައި ކުޅެގެންނެވެ. އެ މެޗުގައި ދަގަނޑޭ ކުޅެން ނިކުމެފައި ވަނީ ބަދަލު ކުޅުންތެރިޔެއްގެ ގޮތުގަ އެވެ. އެއާ އެކު ދަގަނޑޭ ވެގެން ގޮސްފައި ވަނީ ރާއްޖެ އިން ފީފާގެ ސެންޗަރީ ކުލަބުގައި ހިމެނުނު ދެ ވަނަ ކުޅުންތެރިޔާ އަށެވެ. މީގެ ކުރިން ރާއްޖޭގައި އުފެދުނު އެންމެ މޮޅު ގޯލު ކީޕަރު މުޙައްމަދު އިމްރާން ވެސް ވަނީ ފީފާގެ ސެންޗަރީ ކުލަބުގައި ހިމެނިފަ އެވެ. 

ދަގަނޑޭ އެންމެ ފުރަތަމަ ރާއްޖޭގެ ޤައުމީ ޓީމަށް ކުޅެން ފެށީ 2003 ވަނަ އަހަރު އެވެ. އޭގެ ފަހުން މިދިޔަ އަހަރު ތަކުގައި ދަގަނޑޭ ވަނީ އެކި ފަހަރު މަތިން ޤައުމީ ޓީމަށް ކުޅެފަ އެވެ. އަނިޔާގެ ސަބަބުން ޤައުމީ ޓީމާ ދުރުގައި ހުރުމަށް ފަހު، އެންމެ ފަހުން ދަގަނޑޭ ޤައުމީ ޓީމުގައި ހިމެނީ މިއަހަރުގެ މާޗު މަހުގެ ތެރޭގަ އެވެ. އަލުން ޤައުމީ ޓީމުގައި ހިމެނި، ޓިމޯ ލެސްޓޭއާ ދެކޮޅަށް ރާއްޖެ އިން ކުޅުނު މެޗުގައި ވެސް ދަގަނޑޭ ވަނީ ކުޅެފަ އެވެ. 

ދަގަނޑޭ އަކީ މިހާތަނަށް ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އެވެ. ދުނިޔޭގެ ލެޖެންޑުންނާ އެކު، ފީފާގެ ސެންޗަރީ ކުލަބުގައި ދަގަނޑޭ ހިމެނުމާ އެކު، ގިނަ ބަޔަކު އަންނަނީ އޭނާ އަށް މަރުޙަބާ ކިޔަމުންނެވެ.