ސާފް ޗެމްޕިއަންޝިޕް 2026: އިންޑިއާއާއެކު ރާއްޖެ އަދި ޕާކިސްތާން ގްރޫޕް ބީގައި

2026 ވަނަ އަހަރު ބޭއްވުމަށް ހަމަޖެހިފައިވާ ސާފް ޗެމްޕިއަންޝިޕްގެ ގްރޫޕް ބީގައި، އެންމެ ފަހުގެ ޗެމްޕިއަން އިންޑިއާއާއެކު ދިވެހިރާއްޖެ އަދި ޕާކިސްތާން ހިމެނިއްޖެ އެވެ.

ބަންގްލަދޭޝްގައި ނޮވެމްބަރު މަހުގެ 4 އިން 17 އަށް ކުރިއަށްދާ މި މުބާރާތުގައި އިންޑިއާ ކުޅޭ ފުރަތަމަ މެޗުގައި ނޮވެމްބަރު މަހުގެ 5 ވަނަ ދުވަހު ނުކުންނާނީ ދިވެހިރާއްޖެއާ ދެކޮޅަށެވެ.

ބޫޓާންގެ ތިމްޕޫގައި ހޮނިހިރު ދުވަހު ބޭއްވި ގުރުއަތުލުމުގައި، އިންޑިއާގެ ގައުމީ ފިރިހެން ފުޓްބޯޅަ ޓީމު ހިމެނުނީ ރާއްޖެއާއި ޕާކިސްތާނާއެކު ގްރޫޕް ބީގަ އެވެ.

ދެކުނު އޭޝިއާގެ ގައުމުތަކުގެ މެދުގައި ބާއްވާ މި މުބާރާތުގެ 15 ވަނަ އެޑިޝަން ބޭއްވުމަށް ހަމަޖެހިފައިވަނީ ބަންގްލަދޭޝްގެ ވެރިރަށް ޑާކާގަ އެވެ.

މި މުބާރާތުގެ ތަށި 10 ވަނަ ފަހަރަށް ހޯދުމުގެ އަމާޒުގައި ނުކުންނަ އެންމެ ފަހުގެ ޗެމްޕިއަން އިންޑިއާ، ނޮވެމްބަރު 5 ގައި ރާއްޖެއާ ދެކޮޅަށް ކުޅުމަށްފަހު، ގްރޫޕް ސްޓޭޖުގެ ފަހު މެޗުގައި ނޮވެމްބަރު 11 ގައި ބައްދަލުކުރާނީ ޕާކިސްތާނާ އެވެ.

މުބާރާތް ބާއްވާ ގައުމު ކަމަށްވާ ބަންގްލަދޭޝްގެ އިތުރުން، ސްްރީލަންކާ އަދި ބޫޓާން ހިމެނެނީ ގްރޫޕް އޭގަ އެވެ. ނޭޕާލްގެ ފުޓްބޯޅަ އެސޯސިއޭޝަނަށް ފީފާއިން ދީފައިވާ ސަސްޕެންޝަން ސެޕްޓެމްބަރު 1 ގެ ކުރިން އުވާލައިފިނަމަ، އެ ގައުމު ވެސް ގްރޫޕް އޭގައި ހިމެނޭނެ އެވެ. ނަމަވެސް ސަސްޕެންޝަން ދަމަހައްޓައިފިނަމަ، 2026 ވަނަ އަހަރުގެ ސާފް ޗެމްޕިއަންޝިޕް ކުރިއަށްދާނީ ޖުމްލަ ހަ ގައުމާއެކުގަ އެވެ.

މުބާރާތުގެ ސެމީ ފައިނަލަށް ހޮވޭނީ ކޮންމެ ގްރޫޕަކުން އެންމެ ކުރި ހޯދާ ދެ ޓީމެވެ. ސެމީ ފައިނަލްގެ ފުރަތަމަ މެޗުގައި ގްރޫޕް އޭގެ އެއްވަނަ ޓީމު ގްރޫޕް ބީގެ ދެވަނަ ޓީމާ ބައްދަލުކުރާއިރު، ދެވަނަ މެޗުގައި ބައްދަލުކުރާނީ ގްރޫޕް ބީގެ އެއްވަނަ ޓީމާއި ގްރޫޕް އޭގެ ދެވަނަ ޓީމެވެ. ސެމީ ފައިނަލްގެ މެޗުތައް ނޮވެމްބަރު 14 ގައި ކުޅުމަށް ހަމަޖެހިފައިވާއިރު، ފައިނަލް މެޗު އޮންނާނީ ނޮވެމްބަރު 17 ގަ އެވެ.

މި ގްރޫޕުގައި ހިމެނޭ ދެ ގައުމާ ދެކޮޅަށް ވެސް އިންޑިއާގެ ރެކޯޑްތައް ވަރަށް ރަނގަޅެވެ. ޕާކިސްތާނާ ދެކޮޅަށް މިހާތަނަށް ކުޅުނު 25 މެޗުގެ ތެރެއިން 16 މެޗުން އިންޑިއާ މޮޅުވެފައިވާއިރު، ހަތް މެޗު އެއްވަރުވެ، ބަލިވެފައިވަނީ އެންމެ ދެ މެޗުންނެވެ. މި ދެ ގައުމު އެންމެ ފަހުން ބައްދަލުކުރީ 2023 ވަނަ އަހަރުގެ ސާފް ޗެމްޕިއަންޝިޕްގައެވެ. އެ މެޗު އިންޑިއާ ކާމިޔާބުކުރީ 4-0 ގެ ބޮޑު ތަފާތަކުންނެވެ.

ދިވެހިރާއްޖެއާ ދެކޮޅަށް އިންޑިއާ މިހާތަނަށް 18 މެޗު ކުޅެފައިވާއިރު، އޭގެ ތެރެއިން 13 މެޗުން އެ ގައުމު ވަނީ މޮޅުވެފަ އެވެ. ދެ މެޗު އެއްވަރުވެފައިވާއިރު، ރާއްޖެ އަތުން އިންޑިއާ ބަލިވެފައިވަނީ ތިން މެޗުންނެވެ. މި ދެ ގައުމު އެންމެ ފަހުން ބައްދަލުކުރީ 2025 ވަނަ އަހަރުގެ މާޗް މަހު ޝިލޮންގްގައި ކުޅުނު ބައިނަލްއަގުވާމީ އެކުވެރިކަމުގެ މެޗެއްގަ އެވެ. އެ މެޗު 3-0 އިން ކާމިޔާބުކުރީ އިންޑިއާ އެވެ.

އިންޑިއާއިން ވަނީ މީގެ ކުރިން ނުވަ ފަހަރެއްގެ މަތިން ސާފް ޗެމްޕިއަންޝިޕް ކާމިޔާބުކޮށްފަ އެވެ. އެއީ 1993، 1997، 1999، 2005، 2009، 2011، 2015، 2021 އަދި އެންމެ ފަހުން 2023 ވަނަ އަހަރެވެ. ބެންގަލޫރުގައި ބޭއްވި އެންމެ ފަހުގެ މުބާރާތުގެ ފައިނަލުގައި އިންޑިއާ މޮޅުވީ މުބާރާތުގައި މެހެމާނެއްގެ ގޮތުގައި ބައިވެރިވި ކުވެއިތު ބަލިކުރުމަށްފަހު އެވެ.