ދެ އަހަރުގެ ޗެމްޕިއަން ބަންގްލަދޭޝް ބަލިކޮށް، އިންޑިއާ އިން ސާފްގެ އަންހެން މުބާރާތުގެ ޗެމްޕިއަންކަން ހޯދައިފި

ސާފް ވިމަންސް ޗެމްޕިއަންޝިޕްގެ ފައިނަލްގައި ބަންގްލަދޭޝް ބަލިކޮށް، އިންޑިއާ އިން މުބާރާތުގެ ޗެމްޕިއަންކަން ހޯދައިފި އެވެ.

އިންޑިއާ އިން މުބާރާތުގެ ޗެމްޕިއަންކަން ހޯދީ ފައިނަލްގައި 3-1 އިން ބަންގްލަދޭޝް ބަލިކޮށްގެންނެވެ. މިއަހަރުގެ މުބާރާތް ކުރިއަށް ގެންދިޔައީ އިންޑިއާގެ ގޯއާގައި އެވެ. ހޮނިހިރު ދުވަހުގެ ރޭ ކުޅުނު ފައިނަލްގެ މެޗުގެ ފުރަތަމަ ހާފުގައި އިންޑިއާ އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ ފަހު ވަގުތުގައި އިންޑިއާ އަށް ލީޑު ނަގައިދިނީ ޕިޔާރީ ޒާޒާ އެވެ. އިންޑިއާ އިން ލީޑު ނެގި ފަހުން، ބަންގްލަދޭޝް އަށް ނަތީޖާ ހަމަހަމަ ކޮށްދިނީ ރީތޫ ޕޯރްނާ ޗަކްމާ އެވެ. ދެ ވަނަ ހާފުގައި އަލުން އިންޑިއާ އަށް ލީޑު ނަގައިދިނީ ސަންފިދާ ނޮންގްރަމް އެވެ. އަދި މެޗުގައި އިންޑިއާގެ ތިން ވަނަ ލަނޑު ޖެހީ ލިންޑާ ކޯމް ސެރްތޯ އެވެ.

މޮޅާ އެކު އިންޑިއާ އިން މި ވަނީ ހަ ވަނަ ފަހަރަށް ސާފްގެ އަންހެން މުބާރާތުގެ ޗެމްޕިއަންކަން ހޯދައިފަ އެވެ. އިންޑިއާ އަތުން ބަލިވި ބަންގްލަދޭޝް އަކީ އެންމެ ފަހުން ދެ އަހަރު ވެސް މުބާރާތް ކާމިޔާބު ކުރި ޤައުމެވެ. 2022 ވަނަ އަހަރާއި، 2024 ވަނަ އަހަރުގެ މުބާރާތް ބަންގްލަދޭޝް އިން ކާމިޔާބު ކުރިއިރު، ޖެހި ޖެހިގެން ތިން ވަނަ ފަހަރަށް މުބާރާތް ކާމިޔާބު ކުރުމުގެ ފުރުސަތު ބަންގްލަދޭޝް އަށް ވަނީ ގެއްލިފައި އެވެ. 

އެންމެ ފުރަތަމަ ސާފްގެ އަންހެން މުބާރާތް ބާއްވަން ފެށީ 2010 ވަނަ އަހަރު އެވެ. އޭގެ ފަހުން އިންޑިއާ އިން ވަނީ 2010، 2012، 2014، 2016 އަދި 2019 ވަނަ އަހަރު މުބާރާތުގެ ޗެމްޕިއަންކަން ހޯދައިފަ އެވެ. މިއަހަރުގެ މުބާރާތާ އެކު ޖުމުލަ ހަ ފަހަރު އިންޑިއާ އިން މުބާރާތް ކާމިޔާބު ކޮށްފައިވާއިރު، އިންޑިއާ އަކީ މުބާރާތުގެ އެންމެ ކާމިޔާބު ޓީމެވެ. 

މި ފަހަރުގެ ސާފް ޗެމްޕިއަންޝިޕްގައި ވާދަ ކުރީ ހަ ޤައުމަކުންނެވެ. އެއީ އިންޑިއާގެ އިތުރުން ބަންގްލަދޭޝް އާއި، ރާއްޖެ އާއި، ބޫޓާން އާއި ނޭޕާލް އަދި ސްރީ ލަންކާ އެވެ.