ވަރުގަދަ އަށް ތައްޔާރުވި ވިކްޓަރީ އަށް، ވަރުގަދަ ފެށުމެއް

ދިރާގު ދިވެހި ޕްރިމިއާ ލީގުގައި ޓީސީ ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، ވިކްޓަރީ ސްޕޯޓްސް ކުލަބުން އެ ޓީމުގެ ފެށުން ރަނގަޅުކޮށްފި އެވެ.

ހުކުރު ދުވަހުގެރޭ ގަލޮޅު ރަސްމީ ދަނޑުގައި ކުޅުނު މެޗު ވިކްޓަރީ އިން ކާމިޔާބު ކުރީ 5-1 އިންނެވެ. މެޗުގައި ފުރަތަމަ ހާފުގައި ވިކްޓަރީ އިން ލީޑު ނަގާފައި ވަނިކޮށް، ޓީސީ އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ހާފުގައި ހަތަރު ލަނޑު ޖަަހައިގެން ވިކްޓަރީ ވަނީ މެޗުން މޮޅުވެފަ އެވެ.

މެޗު ފަށައިގެން ތިން ވަނަ މިނެޓުގައި ވިކްޓަރީ އަށް ލިބުނު ޕެނަލްޓީ ކާމިޔާބުކޮށް ލީޑު ނަގައިދިނީ ބިދޭސީ ކުޅުންތެރިޔާ މިރްޖަލޯލް ކަސިމޯވް އެވެ. އޭގެ ހަތް މިނެޓު ފަހުން ޓީސީގެ މާޔިޒް ވަހީދު ވަނީ އެ ޓީމަށް މެޗުގެ ނަތީޖާ ހަމަހަމަ ކޮށްދީފައި އެވެ.

ދެ ވަނަ ފަހަރަށް ވިކްޓަރީ އިން ލީޑު ނެގީ ދެ ވަނަ ހާފުގެ 66 ވަނަ މިނެޓުގައި އަހުމަދު ހަސަން ޖެހި ލަނޑުންނެވެ. އޭގެ ހަތަރު މިނެޓު ފަހުން އަހުމަދު ރިޒުވާން (ރިޒޭ) ވަނީ ވިކްޓަރީގެ ތިން ވަނަ ލަނޑު ޖަހައިފަ އެވެ. މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް ވިކްޓަރީ އަށް ލިބުނު ޕެނަލްޓީ ކާމިޔާބުކޮށް ހަތަރު ވަނަ ލަނޑު ޖެހީ ވެސް ރިޒޭ އެވެ. އޭގެ މިނެޓެއް ފަހުން އެ ޓީމުގެ ފަހު ލަނޑު ޖެހީ ބިދޭސީ ކުޅުންތެރިޔާ ގޭރޯ އަލްހާޖީ އެވެ.

ވިކްޓަރީ އަކީ މިފަހަރުގެ ފުޓުބޯޅަ ސީޒަނަށް އެންމެ ވަރުގަދަ އަށް ތައްޔާރުވި އެއް ޓީމެވެ. ލީގު ފެށުމުގެ ކުރިން އެ ޓީމުން ވަނީ ސްރީ ލަންކާގައި ކޭމްޕު ވެސް ކޮށްފަ އެވެ. ރާއްޖޭގެ އިތުރުން، ބިދޭސީ ފެންވަރުގެ ފާހަގަކޮށްލެވޭ ކުޅުންތެރިން ވިކްޓަރީގެ ސްކޮޑުގައި ހިމެނެ އެވެ.