އީގަލްސް އަތުން މޮޅުވެ، ވެލެންސިއާ އަށް އުންމީދެއް

ދިރާގު ދިވެހި ޕްރިމިއާ ލީގުގައި ކުލަބު އީގަލްސްއާ ދެކޮޅަށް ކުޅުނު މެޗުން މޮޅުވެ، ކުލަބު ވެލެންސިއާ އިން ރެލިގޭޝަން އިން ސަލާމަތް ވުމުގެ އުއްމީދެއް ހޯދައިފި އެވެ.

ލީގުގެ ފަހު މެޗުގައި އީގަލްސްއާ ދެކޮޅަށް ނިކުތްއިރު ރެލިގޭޝަންގެ ބިރު ބޮޑުވެފައި އޮތް ވެލެންސިއާ އަށް އުއްމީދެއް އޮތީ އެ މެޗުން މޮޅުވެގެންނެވެ. އެ މެޗުގައި ވެލެންސިއާ އިން ވަނީ 2-0 އިން އީގަލްސް ބަލިކޮށްފަ އެވެ. މެޗުގެ ފުރަތަމަ ހާފުގައި ވެލެންސިއާ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ އިތުރު ވަގުތުގައި ވެލެންސިއާ އަށް ލަނޑު ޖަހައި ކުރި ހޯދައިދިނީ އައިދު މުޙައްމަދު ޖަވީޒު އެވެ. އޭގެ ފަހުން މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި ވެލެންސިއާ އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު ވެލެންސިއާ އަށް ޖަހައިދިނީ ބިދޭސީ ކުޅުންތެރިޔާ އަމަޓިއަސް އަޕެލްޓް މާޓިނޭޒް އެވެ.

ލީގުގައި ކުޅުނު 18 މެޗުން ވެލެންސިއާ އަށް 12 ޕޮއިންޓު ލިބޭއިރު، އެ ޓީމު އޮތީ ނުވަ ވަނައިގަ އެވެ. ވެލެންސިއާ އަށް ވުރެ އެއް މެޗު މަދުން ކުޅެގެން އަށް ވަަނައިގައި އޮތް ކުލަބު ގްރީން ސްޓްރީޓްސް އަށް ވެސް 12 ޕޮއިންޓު ލިބޭއިރު، އެ ޓީމު ކުރީގައި އޮތީ ލަނޑުގެ ތަފާތުންނެވެ. ލީގުގެ ފަހު މެޗުގައި ގްރީން އިން ނިއު ރޭޑިއަންޓް ސްޕޯޓްސް ކުލަބާ ދެކޮޅަށް ނިކުންނައިރު، އެ މެޗުގައި ނިއު އިން ބޮޑު ތަފާތަކުން ގްރީން ބަލިކޮށްފި ނަމަ ވެލެންސިއާ ރެލިގޭޝަން އިން ސަލާމަތް ވާނެ އެވެ.

ވެލެންސިއާ އަތުން އީގަލްސް ބަލިވިއިރު، އެ ޓީމުން ލީގު ނިންމާލަން ޖެހުނީ ފަސް ވަނައިގަ އެވެ. ލީގުގައި އީގަލްސް އިން ކުޅުނު 18 މެޗުން އެ ޓީމަށް ލިބެނީ 23 ޕޮއިންޓެވެ.