ހަމްޕު އާއި ދާދު، ނިހާޓް އަދި ޝަފީއު ވިކްޓަރީ އަށް

ކުރިއަށް އޮތް ސީޒަނަށް ތައްޔާރުވަމުން އަންނަ ވިކްޓަރީ ސްޕޯޓްސް ކުލަބުން ރާއްޖޭގައި ފާހަގަކޮށްލެވޭ މަޝްހޫރު ކުޅުންތެރިންތަކެއްގެ ސޮއި ހޯދައި، ޓީމުގެ ސްކޮޑު ވަރުގަދަކޮށްފި އެވެ.

އެގޮތުން ވިކްޓަރީ އިން އެންމެ ފުރަތަމަ ސޮއި ހޯދާފައި ވަނީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އަށް ކުޅެމުން އައި ހަމްޒާ މުޙައްމަދު (ހަމްޕު)ގެ އެވެ. 2019 ވަނަ އަހަރުން ފެށިގެން މާޒިޔާ އަށް ކުޅެމުން އައި ހަމްޕު އަކީ ރާއްޖޭގެ ފުރަތަމަ ޑިވިޝަންގައި މޮޅު ކުޅުމެއް ދައްކަމުން އަންނަ ކުޅުންތެރިޔެކެވެ. އޭނާ ވަނީ ރާއްޖޭގެ އެންމެ މޮޅު ފުޓުބޯޅަ ކުޅުންތެރިޔާގެ މަގާމު ވެސް ހޯދައިފަ އެވެ.

މީގެ އިތުރުން އަށް އަހަރު ވަންދެން މާޒިޔާ އަށް ކުޅުމަށް ފަހު، ނާއިޒް ޙަސަން (ދާދު) ވެސް ވަނީ އެ ކުލަބު ދޫކޮށްލައި، ވިކްޓަރީ އަށް ބަދަލުވެފައި އެވެ. މާޒިޔާ އާއެކު ގިނަ ކާމިޔާބީ ތަކެއް ހޯދާފައިވާ ދާދު ވިކްޓަރީ އަށް ބަދަލުވެފައިވާއިރު، މިއީ އޭނާގެ ކެރިއަރުގައި ކުޅޭނެ ތިން ވަނަ ކުލަބެވެ. މީގެ ކުރިން ދާދު ވަނީ ޓީސީ ސްޕޯޓްސް ކުލަބަށް ވެސް ކުޅެފައި އެވެ.

ހަމްޕު އާއި ދާދުގެ އިތުރުން ދެން ވިކްޓަރީ އިން ސޮއި ހޯދާފައިވާ ދެ ކުޅުންތެރިންނަކީ މިދިޔަ ސީޒަންގައި އޮޑި ސްޕޯޓްސް ކުލަބަށް ކުޅުނު ޙުސެއިން ނިހާން (ނިހާޓް) އާއި، ގޯލު ކީޕަރު މުޙައްމަދު ޝަފީއު (ޗެކް) އެވެ. މިއީ ނިހާޓްގެ ކެރިއަރުގައި އޭނާ ވިކްޓަރީ އަށް ކުޅޭނެ ދެ ވަނަ ފަހަރެވެ. ނިހާޓްގެ އިތުރުން ދެން ވިކްޓަރީ އަށް ބަދަލުވި ކީޕަރު ޝަފީއު އަކީ ވެސް ރާއްޖޭގެ ފުރަތަމަ ޑިވިޝަންގައި ގިނަ ކުލަބުތަކަށް ކުޅެފައިވާ ތަޖުރިބާކާރު ކުޅުންތެރިޔެކެވެ. 

ހަތަރު ކުޅުންތެރިންގެ ސޮއި ހޯދާފައިވާާކަން ވިކްޓަރީ އިން އިއުލާން ކޮށްފައިވާއިރު، އެ ޓީމުން އަންނަނީ ސްކޮޑު ވަރުގަދަ ކުރުމުގެ މަސައްކަތް ކުރަމުންނެވެ. މިދިޔަ އަހަރުގެ އޮކްޓޫބަރު މަހުގެ ތެރޭގައި ވަނީ ވިކްޓަރީގެ ހިންގާ ކޮމެޓީ އަށް އައު މެމްބަރުން ތަކެއް އިންތިޚާބު ކޮށްފައި އެވެ. ވިކްޓަރީގެ ރައީސް އަކީ ރައްޔިތުންގެ މަޖިލީހުގެ ކެލާ ދާއިރާގެ މެމްބަރު ޢަބްދުﷲ ޝަރީފް އެވެ. މީގެ އިތުރުން އެ ކުލަބުގެ ހިންގާ ކޮމެޓީގައި ސަރުކާރުގެ އިސްވެރިން ހިމެނެ އެވެ.