ފަސް ވަނަ ފަހަރަށް މާޒިޔާ އިން ލީގުގެ އައްޑަނަ އުފުލާލައިފި

ދިރާގު ދިވެހި ޕްރިމިއާ ލީގުގައި އޮޑި ސްޕޯޓްސް ކުލަބާ ދެކޮޅަށް ކުޅުނު ފަހު މެޗުން މޮޅުވެ، މާޒިޔާ ސްޕޯޓްސް އެންޑް ރެކްރިއޭޝަން އިން ލީގުގެ ޗެމްޕިއަން އައްޑަނަ އުފުލާލައިފި އެވެ. 

ހުކުރު ދުވަހުގެ ރޭ ގަލޮޅު ދަނޑުގައި އޮޑިއާ ދެކޮޅަށް ނިކުތްއިރު ވެސް، މާޒިޔާ އަށް ލީގު ޗެމްޕިއަންކަން އޮތީ ކަށަވަރުވެފަ އެވެ. އެ މެޗުގައި މާޒިޔާ އިން ވަނީ 1-0 އިން އޮޑީގެ މައްޗަށް ކުރި ހޯދައިފަ އެވެ. މެޗުގައި މާޒިޔާ އިން ލަނޑު ޖެހީ ވެސް މެޗުގެ ފުރަތަމަ ހާފުގަ އެވެ. 

މެޗު ފަށައިގެން 14 ވަނަ މިނެޓުގައި މާޒިޔާ އަށް ލީޑު ނަގައިދިނީ އެ ޓީމުގެ ބިދޭސީ ކުޅުންތެރިޔާ، ސާޖިއޯ މެންޑީ އިގްލީސިއަސް އެވެ. އޭގެ ފަހުން މެޗުގައި އޮޑި އަށް އެންމެ ބޮޑު ގެއްލުމެއް ދެއްކީ، މެޗުގެ 28 ވަނަ މިނެޓުގައި އެ ޓީމުގެ އަޙުމަދު ބައްސާމް މުޙައްމަދު ނައީމް އަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ.

މޮޅާ އެކު މާޒިޔާ އިން ލީގުގެ ޗެމްޕިއަން އައްޑަން އުފުލާލާފައިވާއިރު، އެ ޓީމުން މިފަހަރުގެ ލީގު ކާމިޔާބު ކުރީ ކުޅުނު އެއްވެސް މެޗަކުން ބަލި ނުވެ އެވެ. އެއާ އެކު މާޒިޔާ އިން މި ވަނީ މެޗަކުން ބަލި ނުވެ ތިން ފަހަރު ލީގު ކާމިޔާބު ކޮށްފަ އެވެ. ލީގުގެ އެއް ވަނަ މަގާމު މާޒިޔާ އިން ހޯދީ ކުޅުނު 18 މެޗުން 48 ޕޮއިންޓާ އެކު އެވެ. މާާޒިޔާ އަތުން ބަލިވި އޮޑި އަށް ލިބުނީ ލީގުގެ ދެ ވަނަ އެވެ. އެއީ އެ ޓީމު ކުޅުނު 18 މެޗުން 39 ޕޮއިންޓާ އެކު އެވެ.

ލީގު ތާވަލްގެ ތިން ވަނައިގައި ނިއު ރޭޑިއަންޓް ސްޕޯޓްސް ކުލަބު އޮތީ 37 ޕޮއިންޓާ އެކު އެވެ. ހަތަރު ވަަނައިގައި ބުރު ސްޕޯޓްސް ކުލަބަށް 29 ޕޮއިންޓު ލިބޭއިރު، ފަސް ވަަނައިގައި ކުލަބު އީގަލްސް އަށް ލިބެނީ 23 ޕޮއިންޓެވެ.