ޕްލޭ އޮފްގެ މެޗުތައް ކާމިޔާބުކޮށް އީގަލްސް އާއި، ވިކްޓަރީ ޕްރެޒިޑެންޓްސް ކަޕަށް
ޕްރެޒިޑެންޓްސް ކަޕްގެ ފޯމެޓު އޮތީ ލީގުގެ ހަތަރު ޓީމަށް މުބާރާތުގެ ގްރޫޕް ސްޓޭޖް އިން ޖާގަ ލިބޭ ގޮތަށް. ލީގު ތާވަލްގެ ފަސް ވަނަ އާއި، އަށް ވަނައާ ދެމެދު އޮތް ޓީމުތަކަށް ޖެހުނީ ޕްލޭ އޮފްގައި ކުޅެގެން، ގުރޫޕް ސްޓޭޖް އިން ޖާގަ ހޯދަން.
ގްރީންއާ ދެކޮޅަށް ކުޅުނު މެޗުގައި ލަނޑު ޖެހުމަށް ފަހު އީގަލްސްގެ ފޭދޫ އިއްބެ އުފާ ފާޅު ކުރަނީ | އެފްއޭއެމް
ޕްރެޒިޑެންޓްސް ކަޕްގެ ޕްލޭ އޮފްގައި ކުޅުނު މެޗުތައް ކާމިޔާބުކޮށް، ކުލަބު އީގަލްސް އާއި، ވިކްޓަރީ ސްޕޯޓްސް ކުލަބުން މުބާރާތުގެ ގުރޫޕް ސްޓޭޖުގެ ޖާގަ ހޯދައިފި އެވެ.
އާދީއްތަ ދުވަހުގެ ހަވީރު ކުޅުނު ޕްލޭ އޮފްގެ ފުރަތަމަ މެޗުގައި އީގަލްސް ބައްދަލު ކޮށްފައި ވަނީ ކުލަބު ގްރީން ސްޓްރީޓްސްއާ އެވެ. އެ މެޗު އީގަލްސް އިން ކާމިޔާބު ކޮށްފައި ވަނީ 6-0 ގެ ތަފާތު ބޮޑު ނަތީޖާ އަކުންނެވެ.
މެޗުގައި އީގަލްސް އަށް ލީޑު ލިބުނީ ގްރީންގެ ބިދޭސީ ކުޅުންތެރިޔާ އަލްސައީދު ޢަބްދުލްފައްތާހު އަލްސައީދު މަހުމޫދު އަތުން ބައި ކޮޅަށް ވަތް ލަނޑުންނެވެ. އޭގެ ފަހުން ފުރަތަމަ ހާފުގައި އީގަލްސްގެ ދެ ލަނޑު ވެސް ޖެހީ އިބްރާހީމް މަހުދީ ޙުސެއިން (ފޭދޫ އިއްބެ) އެވެ. އެއާއެކު އީގަލްސް އިން ފުރަތަމަ ހާފު ނިންމާލީ ތިން ލަނޑުގެ ލީޑުގައި އޮވެ އެވެ.
މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި ފޭދޫ އިއްބެ ވަނީ އީގަލްސްގެ ހަތަރު ވަނަ ލަނޑު ޖަހައި މެޗުގައި އޭނާގެ ހެޓްރިކް ހަމަ ކޮށްފަ އެވެ. އޭގެ ފަހުން މެޗުގެ 73 ވަނަ މިނެޓުގައި އީގަލްސްގެ ފަސް ވަނަ ލަނޑު ޖެހީ މުޙައްމަދު ޝަމްހާން އެވެ. އޭގެ ތިން މިނެޓު ފަހުން އީގަލްސްގެ ފަހު ލަނޑު ޖެހީ އަލީ ހާފިޒު އެވެ.
މޮޅާއެކު އީގަލްސް އަށް ވަނީ ޕްރެޒިޑެންޓްސް ކަޕްގެ ގުރޫޕު ބީ އިން ޖާގަ ލިބިފަ އެވެ. އެ ގުރޫޕުގައި އީގަލްސްއާ އެކު ދެން އޮތީ އޮޑި ސްޕޯޓްސް ކުލަބާއި، ނިއު ރޭޑިއަންޓް ސްޕޯޓްސް ކުލަބެވެ.
އާދީއްތަ ދުވަހުގެ ރޭ ކުޅުނު ޕްލޭ އޮފްގެ ދެ ވަނަ މެޗުގައި ވިކްޓަރީ އިން ވަނީ 2-0 އިން ޓީސީ ސްޕޯޓްސް ކުލަބު ބަލިކޮށްފަ އެވެ. މެޗުގެ ފުރަތަމަ ހާާފުގެ 31 ވަނަ މިނެޓުގައި ވިކްޓަރީ އަށް ލީޑު ނަގައިދިނީ އަލީ ނަސޫހު ރަޝީދު އެވެ. އޭގެ ފަހުން ދެ ވަނަ ހާފު ފަށައިގެން އަށް ވަނަ މިނެޓުގައި ވިކްޓަރީގެ ދެ ވަނަ ލަނޑު ޖެހީ އަޙުމަދު ރިޒްވާން އެވެ.
ޕްލޭ އޮފް މެޗު ކާމިޔާބުކޮށް ވިކްޓަރީ ހިމެނުނީ ޕްރެޒިޑެންޓްސް ކަޕްގެ ގުރޫޕް އޭގަ އެވެ. އެ ގުރޫޕުގައި ދެން އޮތީ ދިވެހި ޕްރިމިއާ ލީގުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އާއި، ބުރު ސްޕޯޓްސް ކުލަބެވެ.
ޕްރެޒިޑެންޓްސް ކަޕްގެ ފޯމެޓު އޮތީ ލީގުގެ ހަތަރު ޓީމަށް މުބާރާތުގެ ގްރޫޕް ސްޓޭޖް އިން ޖާގަ ލިބޭ ގޮތަށެވެ. ލީގު ތާވަލްގެ ފަސް ވަނަ އާއި، އަށް ވަނައާ ދެމެދު އޮތް ޓީމުތަކަށް ޖެހުނީ ޕްލޭ އޮފްގައި ކުޅެގެން، ގުރޫޕް ސްޓޭޖް އިން ޖާގަ ހޯދާށެވެ.
