ރެލިގޭޓުވި ޔޫވީ އަތުން ވިކްޓަރީ ބަލިވެއްޖެ
ޔޫވީ އަތުން ބަލިވެ، ވިކްޓަރީ އިން މިފަހަރުގެ ލީގު ނިންމާލަން ޖެހުނީ ހަ ވަނައިގައި. ލީގުގައި ކުޅުނު 18 މެޗުން ވިކްޓަރީ އަށް ލިބެނީ 21 ޕޮއިންޓު. 10 ޓީމު ވާދަކުރާ ލީގުގެ އެންމެ ފުލަށް ދާ ދެ ޓީމު ރެލިގޭޓުވާއިރު، ލީގުގައި ކުޅުނު 18 މެޗުން ޔޫވީ އަށް ލިބެނީ 11 ޕޮއިންޓު.
ލީގުގައި ޔުނައިޓެޑު ވިކްޓަރީ (ޔޫވީ) އާއި، ވިކްޓަރީ ސްޕޯޓްސް ކުލަބު ބައްދަލު ކުރި މެޗުގެ ތެރެއިން | އަދަދު ސްޕޯޓްސް
ދިރާގު ދިވެހި ޕްރިމިއާ ލީގުގައި ޔުނައިޓެޑު ވިކްޓަރީ (ޔޫވީ) އާ ދެކޮޅަށް ކުޅުނު މެޗުން، ވިކްޓަރީ ސްޕޯޓްސް ކުލަބު ބަލިވެއްޖެ އެވެ.
ބުދަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ޔޫވީ އިން ކާމިޔާބު ކުރީ 2-0 އިންނެވެ. ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު މެޗުގައި ޔޫވީ އިން ލަނޑު ޖެހީ އެންމެ ފަހު ވަގުތުގަ އެވެ. ވިކްޓަރީއާ ދެކޮޅަށް ނިކުތްއިރު ވެސް، ޔޫވީ ވަނީ ފުރަތަމަ ޑިވިޝަން އިން ރެލިގޭޓު ވެފަ އެވެ.
މެޗުގެ ދެ ވަނަ ހާފުގެ 83 ވަނަ މިނެޓުގައި ޔޫވީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ޔޫވީ އަށް ޖަހައިދިނީ އެ ޓީމުގެ ބިދޭސީ ކުޅުންތެރިޔާ މުސްތަފާ މުޙުމޫދު އަލީ އެލްޝާޒްލީ އެވެ. ފުރަތަމަ ލަނޑު ޖެހިތާ ހަތަރު މިނެޓު ފަހުން އޭނާ ވަނީ ޔޫވީގެ ދެ ވަނަ ލަނޑު ޖަހައި، އިތުރަށް ލީޑު ފުޅާ ވެސް ކޮށްފަ އެވެ. މެޗުގައި ވިކްޓަރީ އަށް ވެސް ލަނޑު ޖަހަން ފުރުސަތު ލިބުނުއިރު، އެ ޓީމަށް އެއްވެސް ފުރުސަތެއްގެ ބޭނުން ކުރެވޭ ގޮތެއް ނުވި އެވެ.
ޔޫވީ އަތުން ބަލިވެ، ވިކްޓަރީ އިން މިފަހަރުގެ ލީގު ނިންމާލަން ޖެހުނީ ހަ ވަނައިގަ އެވެ. ލީގުގައި ކުޅުނު 18 މެޗުން ވިކްޓަރީ އަށް ލިބެނީ 21 ޕޮއިންޓެވެ. 10 ޓީމު ވާދަކުރާ ލީގުގެ އެންމެ ފުލަށް ދާ ދެ ޓީމު ރެލިގޭޓުވާއިރު، ލީގުގައި ކުޅުނު 18 މެޗުން ޔޫވީ އަށް ލިބެނީ 11 ޕޮއިންޓެވެ.
