ފަހު ވަގުތު ވިކްޓަރީ ބަލިކޮށް، ބުރު އުންމީދުގައި

ޕްރެޒިޑެންޓްސް ކަޕްގެ ގުރޫޕް ސްޓޭޖުގައި ވިކްޓަރީ ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، ބުރު ސްޕޯޓްސް ކުލަބުން މުބާރާތުގެ ސެމީ ފައިނަލްގެ އުންމީދު ހިފަހައްޓައިފި އެވެ.

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ބުރުން ކާމިޔާބު ކުރީ 2-1 އިންނެވެ. މެޗުގައި ބުރުން ލަނޑު ޖަހައި ކުރި ހޯދާފައި ވަނިކޮށް، ވިކްޓަރީ އިން ނަތީޖާ ހަމަހަމަ ވެސް ކުރި އެވެ. ނަމަވެސް، މެޗުގެ ފަހު ވަގުތުގައި ލަނޑު ޖަހައިގެން ބުރު ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގައި ދެ ޓީމަށް ވެސް ލަނޑު ޖަހާނެ ފުރުސަތު ލިބުނު ނަމަވެސް، ފުރުސަތުގެ ބޭނުން ކުރެވޭ ގޮތެއް ނުވި އެވެ. ނަަމަވެސް، ދެ ވަނަ ހާފު ފަށައިގެން ދެ ވަނަ މިނެޓުގައި ބުރުގެ ބިދޭސީ ކުޅުންތެރިޔާ ހުޑްސަން ޑިއާޒް ވަނީ ލަނޑު ޖަހައި އެ ޓީމަށް ލީޑު ނަގައިދީފަ އެވެ.

އޭގެ ފަހުން މެޗުގެ 71 ވަނަ މިނެޓުގައި ވިކްޓަރީ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު ވިކްޓަރީ އަށް ޖަހައިދިނީ އެ ޓީމުގެ ބިދޭސީ ކުޅުންތެރިޔާ މިލޯސް ލަޗްނީ އެވެ. މެޗުން ބުރު މޮޅުވީ، މެޗުގެ 81 ވަނަ މިނެޓުގައި ޑިއާޒް ޖެހި ދެ ވަނަ ލަނޑުންނެވެ.

ގުރޫޕް ސްޓޭޖުގައި ބުރުގެ ފުރަތަމަ މެޗުގައި ވަނީ މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވެފަ އެވެ. ދެ ވަނަ މެޗުގައި ވިކްޓަރީ އަތުން ބުރު މޮޅުވެ އުންމީދު ހޯދިއިރު، މި ގުރޫޕުން ސެމީ ފައިނަލްގެ ޖާގަ ލިބޭ ޓީމުތައް ކަށަވަރު ވާނީ މާޒިޔާ އާއި ވިކްޓަރީ ބައްދަލު ކުރާ މެޗުންނެވެ.