ލީގުގެ ގަދަ ހަތަރު ޓީމު ޕްރެޒިޑެންޓްސް ކަޕަށް
އެންމެ ފަހުން ޕްރެޒިޑެންޓްސް ކަޕް ބާއްވާފައި ވަނީ 2023 ވަނަ އަހަރު. އެފަހަރުގެ މުބާރާތުގެ ފައިނަލްގައި ކުލަބު އީގަލްސް ބަލިކޮށް ޕްރެޒިޑެންޓްސް ކަޕް ކާމިޔާބު ކުރީ މާޒިޔާ ސްޕޯޓްސް އެންޑް ރެކްރިއޭޝަން އިން.
އެންމެ ފަހުން 2023 ވަނަ އަހަރު އޮތް ޕްރެޒިޑެންޓްސް ކަޕް ކާމިޔާބު ކުރި މާޒިޔާ އަށް، އޭރުގެ ރައީސް އިބްރާހީމް މުޙައްމަދު ސޯލިހް ތަށި ހަވާލު ކޮށްދެއްވަނީ | ރައީސް އޮފީސް
ރައީސުލްޖުމްހޫރިއްޔާގެ ވާދައިގެ ތައްޓަށް ކުޅޭ، ޕްރެޒިޑެންޓްސް ކަޕް ކުރިއަށް ގެންދާނެ ފޯމެޓު، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ކަނޑައަޅައިފި އެވެ.
ބުރާސްފަތި ދުވަހު އޮތް އެފްއޭއެމްގެ ހިންގާ ކޮމެޓީގެ 10 ވަނަ ބައްދަލުވުމުގައި ނިންމާފައި ވަނީ، ޕްރެޒިޑެންޓްސް ކަޕް މިފަހަރު ދެ ގުރޫޕަކަށް ބަހާލައިގެން ކުރިއަށް ގެންދާ ގޮތަށެވެ. އެގޮތުން މިހާރު ކުރިއަށްދާ ދިރާގު ދިވެހި ޕްރިމިއާ ލީގުގެ ގަދަ ހަތަރު ޓީމަށް ޕްރެޒިޑެންޓްސް ކަޕް އިން ސީދާ ޖާގަ ލިބޭނެ އެވެ. އަނެއް ދެ ޖާގަ ލިބޭނީ ނޮކް އައުޓް މެޗު ތަކެއް ކުޅެގެން މޮޅުވާާ ދެ ޓީމަކަށެވެ.
ލީގުގެ ގަދަ ހަތަރު ޓީމު ދެ ގުރޫޕަކަށް ބަހާލާނީ ތާވަލްގައި ޕޮއިންޓު ލިބިފައިވާ ތަރުތީބުން ސީޑު ކޮށްގެންނެވެ. ނޮކް އައުޓް މެޗުތަކުގައި ކުޅެން ޖެހޭނީ ތާވަލްގެ ފަސް ވަނަ އާއި، އަށް ވަނައާ ދެމެދު އޮންނަ ހަތަރު ޓީމެވެ. އެ މެޗު ތަކުން މޮޅުވާ ދެ ޓީމާ އެކު، ޖުމުލަ ހަ ޓީމު ދެ ގުރޫޕަށް ބަހާލަން ވަނީ ނިންމައިފަ އެވެ.
ގުރޫޕް ސްޓޭޖުގެ މެޗުތައް ކުޅުމަށް ފަހު، ކޮންމެ ގުރޫޕެއްގެ ވެސް އެއް ވަނަ ޓީމާއި، ދެ ވަނަ ޓީމަށް ސެމީ ފައިނަލްގެ ޖާގަ ލިބޭއިރު، ކްރޮސްކޮށް ސެމީ ފައިނަލް ކުޅުމަށް ފަހު މޮޅުވާ ދެ ޓީމު ފައިނަލަށް ދާނެ އެވެ. އެފްއޭއެމް އިން ނިންމާފައި ވަނީ ފެބްރުވަރީ މަހުގެ ނުވަ ވަނަ ދުވަހު ޕްރެޒިޑެންޓްސް ކަޕް ފެށުމަށެވެ.
އެންމެ ފަހުން ޕްރެޒިޑެންޓްސް ކަޕް ބާއްވާފައި ވަނީ 2023 ވަނަ އަހަރު އެވެ. އެފަހަރުގެ މުބާރާތުގެ ފައިނަލްގައި ކުލަބު އީގަލްސް ބަލިކޮށް ޕްރެޒިޑެންޓްސް ކަޕް ކާމިޔާބު ކުރީ މާޒިޔާ ސްޕޯޓްސް އެންޑް ރެކްރިއޭޝަން އިންނެވެ.
