ގްރީން އިން ގަސްތުގައި މެޗު ދޫކޮށްލި ކަމަށް ބުނާ މައްސަލަ އެފްއޭއެމް އިން ބަލަނީ

ދިރާގު ދިވެހި ޕްރިމިއާ ލީގުގައި ނިއު ރޭޑިއަންޓް ސްޕޯޓްސް ކުލަބާ ދެކޮޅަށް އޮތް މެޗު، ކުލަބު ގްރީން ސްޓްރީޓްސް އިން ގަސްތުގައި ދޫކޮށްލި ކަމަށް ބުނާ މައްސަލަ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބަލަން ފަށައިފި އެވެ.

ނިއުއާ ދެކޮޅަށް ކުޅެން އޮތް މެޗަށް ގްރީންގެ ކުޅުންތެރިން ހަމަނުވުމުގެ ސަބަބުން، އެ ޓީމު ހާޒިރުވެފައި ނުވެ އެވެ. އެއާ އެކު، 2-0 ގެ ނަތީޖާ އަކުން ނިއު އަށް ވަނީ އެ މެޗު ލިބިފަ އެވެ. އެ މެޗުގެ ނަތީޖާ އެހެން އައުމާ އެކު، ކުލަބު ވެލެންސިއާ ވަނީ ފުރަތަމަ ޑިވިޝަން އިން ރެލިގޭޓުވެފަ އެވެ. 

ވެލެންސިއާ އަށް ރެލިގޭޝަން އިން ސަލާމަތް ވުމުގެ ފުރުސަތު އޮތީ، އެ މެޗުގައި ނިއު އިން ފަސް ލަނޑުގެ ތަފާތުން ގްރީން ބަލިކޮށްގެންނެވެ. ނަމަވެސް، ގްރީން ހާޒިރު ނުވެ ނިއު އަށް މެޗު ލިބުނުއިރު، ވެލެންސިއާ އިން ވަނީ އެއީ ގްރީން އިން ގަސްތުގައި އެ ޓީމު ރެލިގޭޓު ކޮށްލުމަށް ކުރި ކަމެއް ކަމަށް ތުހުމަތު ކޮށްފަ އެވެ.

ވެލެންސިއާ އިން ވަނީ އެ މައްސަލަ އެފްއޭއެމް އަށް ހުށަހަޅައިފަ އެވެ. މީގެ އިތުރުން އެ މައްސަލަ ދުނިޔޭގެ ފުޓުބޯޅައިގެ މައި އިދާރާ (ފީފާ) އާއި، އޭއެފްސީ އަށް ހުށަހަޅަން ވެސް ވެލެންސިއާ އިން ވަނީ ނިންމައިފަ އެވެ. ވެލެންސިއާ އިން އެފްއޭއެމް އަށް ހުށަހެޅި މައްސަލައިގެ ޖަވާބުގައި އެ އެސޯސިއޭޝަން އިން ބުނެފައި ވަނީ، އެ މައްސަލަ ބަލަމުން އަންނަ ކަމަށެވެ. އެ މައްސަލަ ބަލަމުން އަންނަނީ އެފްއޭއެމްގެ ޑިސިޕްލިނަރީ ކޮމެޓީ އިންނެވެ. 

ގްރީން އިން މެޗު ފިކްސް ކުރި ކަމަށް ތުހުމަތު ކުރުމާ އެކު، އެ ކުލަބުން ވަނީ އެކަމަށް ރައްދު ދީފަ އެވެ. އެގޮތުން ގްރީން އިން ބުނެފައި ވަނީ އެ ކުލަބުން ގަސްތުގައި މެޗު ފިކްސް ކުރި ކަމަށް ބުނެ ދައްކަމުން އަންނަ ވާހަކަ އަކީ ކަނޑައެޅިގެން ދޮގެއް ކަމަށެވެ. އަދި އެ ކުލަބުން އަބަދު ވެސް ޤަވާއިދަށް އިޙުތިރާމް ކުރާނެ ކަމަށް ވެސް ބުނެފައިވެ އެވެ. 

މިއީ ފުރަތަމަ ޑިވިޝަން އިން ވެލެންސިއާ ރެލިގޭޓުވި ފުރަތަމަ ފަހަރެވެ. މީގެ ކުރިން 2018 ވަނަ އަހަރު ވެސް އެ ޓީމު ރެލިގޭޓުވެފައިވާއިރު، އަލުން ފުރަތަމަ ޑިވިޝަން އަށް އައިސްފައި ވަނީ 2020 ވަނަ އަހަރު އެވެ.