މާޒިޔާ އަތުން ބަލިވެ ވިކްޓަރީ ކަޓައިފި

ޕްރެޒިޑެންޓްސް ކަޕްގެ ގުރޫޕް ސްޓޭޖުގެ ފަހު މެޗުގައި އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަންއާ ދެކޮޅަށް ކުޅުނު މެޗުން ބަލިވެ، ވިކްޓަރީ ސްޕޯޓްސް ކުލަބު މުބާރާތުން ކަޓައިފި އެވެ.

ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ވިކްޓަރީއާ ދެކޮޅަށް ކުޅުނު މެޗު މާޒިޔާ އިން ކާމިޔާބު ކުރީ 2-0 އިންނެވެ. މި މެޗަަށް ނިކުތްއިރު، ވިކްޓަރީ އަށް މުބާރާތުގެ ސެމީ ފައިނަލް އިން ޖާގަ ލިބެން އޮތީ މާޒިޔާ ބަލިކޮށްގެންނެވެ. އެއީ ގުރޫޕްގައި ބުރު ސްޕޯޓްސް ކުލަބާ ދެކޮޅަށް ކުޅުނު މެޗުން ބަލިވުމުންނެވެ.

މެޗުގައި މާޒިޔާ އިން އެ ޓީމުގެ ދެ ލަނޑު ވެސް ޖެހީ ފުރަތަމަ ހާފުގަ އެވެ. އެގޮތުން މެޗުގެ 36 ވަނަ މިނެޓުގައި މާޒިޔާ އަށް ލީޑު ނަގައިދިނީ ބިދޭސީ ކުޅުންތެރިޔާ ސާޖިއޯ އިގްލީސިއަސް އެވެ. އޭގެ ތިން މިނެޓު ފަހުން މާޒިޔާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ހައިޝަމް ޙަސަން އެވެ. 

މޮޅާއެކު މާޒިޔާ އިން ވަނީ ދެ މެޗުން ހަ ޕޮޮއިންޓާ އެކު، މި ގުރޫޕުގެ އެއް ވަނަ ހޯދައިފަ އެވެ. ސެމީ ފައިނަލްގައި މާޒިޔާ ބައްދަލު ކުރަން ޖެހޭނީ އަނެއް ގުރޫޕުގެ ދެ ވަނަ، ނިއު ރޭޑިއަންޓް ސްޕޯޓްސް ކުލަބާ އެވެ. މި ގުރޫޕުގެ ދެ ވަނަ ބުރުން ހޯދީ ތިން ޕޮއިންޓާ އެކު އެވެ. ގުރޫޕުގެ ފުރަތަމަ މެޗުގައި މާޒިޔާ އަތުން ބަލިވި ނަމަވެސް، ދެ ވަނަ މެޗުގައި ބުރުން ވަނީ ވިކްޓަރީ ބަލިކޮށްފަ އެވެ. ސެމީ ފައިނަލްގައި ބުރު ނިކުންނާާނީ އަނެއް ގުރޫޕުގެ އެއް ވަނަ އޮޑި ސްޕޯޓްސް ކުލަބާ ދެކޮޅަށެވެ.