އޭއައި ބޭނުންކޮށްގެން ބަޔޮލޮޖިކަލް ހަތިޔާރާގުޅޭ ދިރާސާ ކުރި ކްލޯޑް އެކައުންޓުތަކެއް ބަންދުކޮށްފި

ބަޔޮލޮޖިކަލް ހަތިޔާރު ނުވަތަ ލެބޯޓްރީތަކުގައި އުފައްދާ ނުރައްކާތެރި ޖަރާސީމީ ހަތިޔާރު އުފެއްދުމަށް މަގުފަހިވާ ފަދަ ގޮތްގޮތަށް އާޓިފިޝަލް އިންޓެލިޖެންސް (އޭއައި) ބޭނުންކުރި ގިނަ އެކައުންޓްތަކެއް ބްލޮކްކޮށްފައިވާ ކަމަށް އެންތްރޮޕިކް ކުންފުނިން ހާމަކޮށްފި އެވެ. 'ކްލޯޑް' ނަމަކަށް ކިޔާ އޭއައި މޮޑެލް އުފެއްދި އެންތްރޮޕިކް ކުންފުނިން ނެރުނު ރިޕޯޓެއްގައި ބުނެފައި ވަނީ، ބަޔޮލޮޖިކަލް ދާއިރާއިން އޭއައި ނުރަނގަޅު ގޮތުގައި ބޭނުންކުރުމަކީ މިފަދަ ޓެކްނޮލޮޖީތަކުން ކުރިމަތިވެދާނެ އެންމެ ނުރައްކާތެރި އެއް ކަންތައް ކަމަށް އެ ކުންފުނިން ދެކޭ ކަމަށެވެ.

މި އާ ރިޕޯޓުގައި، އޭއައި ބޭނުންކުރާ ފަރާތްތަކުން ކުންފުނީގެ ރައްކާތެރިކަމުގެ ފިޔަވަޅުތަކަށް ހުރަސްއަޅައި، ވަކި ސަރަހައްދުތަކަކަށް ކަނޑައަޅާފައިވާ ހުރަސްތައް ނައްތާލާ، ދިރާސާތަކުގެ އަސްލު މަގުސަދު އޮޅުވާލަން މަސައްކަތްކޮށްފައިވާ ފަސް ހާދިސާއެއްގެ ތަފްސީލު ހިމަނާފައިވެ އެވެ. މީގެ ތެރޭގައި ދޫނި ރޯގާ ފަދަ ގައިންގަޔަށް އަރާ ނުރައްކާތެރި ބަލިތަކާއި، އާ ބާވަތްތަކުގެ ވިހަ އުފެއްދުމަށް ކުރާ 'ގެއިން-އޮފް-ފަންކްޝަން' (ވައިރަސްގެ ބާރުގަދަކުރުމުގެ) ދިރާސާތައް ހިމެނޭ ކަމުގައި އެ ކުންފުނިން ބުނެ އެވެ.

ވޭތުވެދިޔަ 30 ދުވަހުގެ ހަރަކާތްތަކަށް ބަލާއިރު، ނުރައްކާވެދާނެ ފަދަ 35 ދިރާސާއެއް ފާހަގަކުރެވިފައިވާ ކަމަށް އެންތްރޮޕިކްއިން ބުނެފައިވެ އެވެ. ނަމަވެސް، މި ދިރާސާތައް ކުރި ފަރާތްތަކުގެ ނިޔަތަކީ ގެއްލުން ދިނުން ކަމެއް ނުވަތަ އެއީ ސައިންޓިފިކް ބޭނުމަކަށް ކުރި ކަމެއްކަން ކަށަވަރު ނުވާ ކަމަށް އެ ކުންފުނިން އެއްބަސްވެ އެވެ. މި ހަރަކާތްތަކުގައި ބައިވެރިވެފައި ވަނީ ސައިންސްވެރިން ކަމަށް އެންތްރޮޕިކްއިން ބުނި ނަމަވެސް، އެއީ ކޮން ގައުމެއްގެ ނުވަތަ ކޮން އިދާރާއެއްގެ ބައެއްކަން ހާމަކޮށްފައެއް ނުވެ އެވެ.

"މިހާރު ނުރައްކާތެރި ހަމަލާތަކެއް ދިނުމަށް ޓަކައި މޮޅު ހަމަލާދޭ މީހަކަށް ވާކަށް ނުޖެހޭ،" އެ ރިޕޯޓުގައި ބުނެފައިވެ އެވެ. އޭއައި މޮޑެލްތަކުގެ ސައިބަރ ސެކިއުރިޓީ ހުނަރުތަކުގެ ސަބަބުން، ކުރިން ބޮޑެތި ގައުމުތަކުގެ ސަރުކާރުތަކަށް ނޫނީ ނުކުރެވޭ ފަދަ އުނދަގޫ މަސައްކަތްތައް، މިހާރު އާދައިގެ ވަކިވަކި ފަރުދުންނަށް ވެސް ކުރެވޭނެ މަގު ފަހިވެފައިވާ ކަމަށް އެ ކުންފުނިން ފާހަގަކުރެ އެވެ.

މި ރިޕޯޓުގައި ފާހަގަކޮށްފައިވާ އެއް ހާދިސާއަކީ، 'ޗިކުންގުންޔާ' ވައިރަސް ފެތުރޭ މިންވަރު އިތުރުކުރުމަށާއި ހަށިގަނޑުގެ ދިފާއީ ނިޒާމަށް ނުފެންނަ ގޮތަށް އެ ވައިރަސް ބަދަލުކުރުމުގެ ދިރާސާއަކަށް ފައިސާ ހޯދުމަށް އެދި ހުށަހަޅާ ޕްރޮޕޯސަލެއް ލިޔުމަށް އޭއައިގެ އެހީތެރިކަމަށް އެދުނު ހާދިސާ އެވެ. އެހެން ހާދިސާއެއްގައި، އެމެރިކާއިން ބޭރުގައި ހުރި ދާރިސަކު ވަނީ ދޫނި ރޯގާގެ ވައިރަސް އިންސާނުންނާއި ޖަނަވާރުންގެ ހަށިގަނޑަށް ހޭނޭނެ ގޮތްތަކާއި، އެ ވައިރަހުގެ ސަބަބުން ބޮޑެތި ބަލިތައް ޖެހޭ ގޮތްތައް ދެނެގަތުމަށް ކްލޯޑް ބޭނުންކޮށްފަ އެވެ.

މީގެ އިތުރުން، މޫދާއި އެއްގަމުގެ ސޫފިތަކުގެ ވިހައާ ބެހޭ ދިރާސާތަކާއި، ސްމޯލްޕޮކްސްއާއި އެމްޕޮކްސް ފަދަ ބަލިތައް ހިމެނޭ 'އޯތޯޕޮކްސްވައިރަސް' އާއިލާގެ ވައިރަސްތަކާ ބެހޭ ދިރާސާތައް ކުރުމަށް އޭއައި ބޭނުންކުރި މައްސަލަތައް ވެސް ރިޕޯޓުގައި ހިމަނާފައިވެ އެވެ.

"ބޭސްވެރިކަމަށް އޭއައި މުހިންމު، ނަމަވެސް ނުރައްކާތައް މާ ބޮޑު"

ބޭސް އުފެއްދުމުގެ ދާއިރާއަކީ އޭއައިގެ ސަބަބުން އެންމެ ބޮޑު ކުރިއެރުމެއް ލިބޭނެ އެއް ދާއިރާ އެވެ. މި ސިނާއަތުގެ އިސްވެރިން ގަބޫލުކުރާ ގޮތުގައި ކެންސަރާއި އެހެނިހެން ބަލިތަކަށް ފަރުވާ ހޯދުމަށް އޭއައި ބޮޑު އެހީއަކަށް ވާނެ އެވެ. ނަމަވެސް، އާ މާއްދާތަކާއި ބޭސްތައް ހޯދުމަށް އޭއައިއަށް ލިބިފައިވާ ގާބިލުކަމަކީ، ނުބައި ނިޔަތެއް އޮތް ބައެއްގެ އަތަށް އަރައިފިނަމަ ބަޔޮލޮޖިކަލް ހަތިޔާރު އުފެއްދުމަށް ވެސް ބޭނުންކުރެވިދާނެ ނުރައްކާތެރި ވަސީލަތެއް ކަމަށް މާހިރުން ބުނެ އެވެ.

އެންތްރޮޕިކްއިން ބުނީ، އެ ކުންފުނީގެ އޭއައި މޮޑެލްތަކަކީ ސައިންޓިފިކް ދިރާސާތަކަށް ބޭނުންތެރި އެއްޗަކަށް ވާން ބޭނުންވާ ކަމަށެވެ. ނަމަވެސް، ކުރީގެ މޮޑެލްތަކަށްވުރެ މިހާރުގެ މޮޑެލްތައް މާ ބޮޑަށް ކުރިއަރާފައިވުމާއެކު، އޭގެ ފައިދާ އިތުރުވާ ވަރަށް، ނުރަނގަޅު ގޮތުގައި ބޭނުންކުރުމުގެ ފުރުސަތު ވެސް ބޮޑުވަމުންދާ ކަމަށް އެ ކުންފުނިން ބުންޏެވެ. އަދި، ނުބައި ނިޔަތް އޮންނަ ފަރާތްތަކުން، ގެއްލުންދެނިވި ދިރާސާތައް ކުރުމަށްފަހު އެއީ ސައިންޓިފިކް ބޭނުމަކަށް ކުރި ކަމެއް ކަމަށް ދެއްކުމަށް އޭއައި ބޭނުންކޮށްފާނެ ކަމަށް ވެސް އެ ކުންފުނިން ބުންޏެވެ.

"އަޅުގަނޑުމެންގެ މޮޑެލްތަކުގެ ގާބިލުކަން އިތުރުވެ، އުނދަގޫ ސައިންޓިފިކް މަސައްކަތްތަކުގައި މާހިރުންނާ އެއްވަރަށް ނުވަތަ އެއަށްވުރެ މަތީ ފެންވަރަކަށް މަސައްކަތް ކުރަން ފެށުމުން، އޭގެ ފައިދާއާއި ގެއްލުން ވެސް އިތުރުވާނެ،" އެންތްރޮޕިކްގެ ރިޕޯޓުގައިވެ އެވެ. އަދި، އޭއައި ބޭނުންކުރާ މިންވަރު އިތުރުވުމުން، ދުނިޔޭގެ ސަރުކާރުތަކާއި ބައިނަލްއަގުވާމީ ޖަމިއްޔާތަކަށް ވެސް ނުފެންނަ ފަދަ ނުރައްކާތައް ދެނެގަތުމުގެ ފުރުސަތު އޭއައި އުފައްދާ ކުންފުނިތަކަށް ލިބޭނެ ކަމަށް ވެސް ބުނެފައިވެ އެވެ.

އެ ކުންފުނިން ބުނީ، އެންމެ ފަހުގެ މޮޑެލްތައް ކަމަށްވާ 'ކްލޯޑް ފޭބްލް 5' ފަދަ މޮޑެލްތަކުގައި، ބަޔޮލޮޖިކަލް ދިރާސާތަކާ ގުޅޭ ނުރައްކާތެރި ސުވާލުތަކަށް ޖަވާބު ނުދެވޭނެ ފަދަ ވަރުގަދަ ރައްކާތެރިކަމުގެ ފިޔަވަޅުތަކެއް ވަނީ އަޅާފަ އެވެ. އެންތްރޮޕިކްއިން ބުނީ، މިހާރު އަޅާފައިވާ ފިޔަވަޅުތައް ކާމިޔާބު ކަމަށެވެ. ނަމަވެސް، އޭއައި މޮޑެލްތަކާއި ކުރިމަތިވާ ނުރައްކާތައް އިތުރަށް ތަރައްގީވަމުންދާ ވަރަކަށް، މިއަށްވުރެ ވަރުގަދަ ސަލާމަތީ ނިޒާމުތަކެއް ބޭނުންވާނެ ކަމަށް އެ ކުންފުނިން ފާހަގަކުރި އެވެ. މީގެ އިތުރުން، މީހުންނަށް ފާރަލުމަށާއި، މަކަރާއި ހީލަތް ހެދުމަށާއި، ޑްރޯން އަދި މިސައިލް ފަދަ ހަތިޔާރު އުފެއްދުމަށް އޭއައި ބޭނުންކުރަން ކުރި މަސައްކަތްތައް ވެސް ހުއްޓުވާފައިވާ ކަމަށް އެ ރިޕޯޓުގައި ބުނެފައިވެ އެވެ.

މި މައުލޫމާތުތައް ހާމަކޮށްފައި މި ވަނީ، އޭއައި އުފައްދާ ކުންފުނިތަކުގެ ސަލާމަތީ ފިޔަވަޅުތަކާ މެދު ކަންބޮޑުވުން ފާޅުކޮށް، އެ ކުންފުނިތަކުން ވަކިވި މުވައްޒަފުންތަކެއް އިންޒާރު ދެމުންދާ ދަނޑިވަޅުގައި އެވެ. ބައެއް މުވައްޒަފުން ބުނަނީ، މި ޓެކްނޮލޮޖީ ކުރިއަރަމުންދާ ދުވެލި މާ އަވަސް ކަމަށެވެ. އަދި، އިންސާނުންގެ ކޮންޓްރޯލުން މި ޓެކްނޮލޮޖީ ނެއްޓިދާނެ ކަމުގެ ބިރު އޮތުމުން، ކަންކަން ގޯސްވާނަމަ މި މަސައްކަތް މަޑުޖައްސާލެވޭނެ ގޮތްތަކެއް ސަރުކާރުތަކުން ހޯދަންޖެހޭ ކަމަށް އެ ފަރާތްތަކުން ބުނެ އެވެ.

"މުސްތަގުބަލަށް ބަލާއިރު، މި އޭއައިތަކުގެ ގާބިލުކަން ހުރި މިންވަރުން... މިއީ އިންތިހާއަށް ބޮޑެތި ގެއްލުންތަކެއް ދީފާނެ އެއްޗެއް،" އެންތްރޮޕިކްގެ ކުރީގެ މުވައްޒަފެއް ކަމަށްވާ ޖޭކަބް ކޮކްސަން ބުންޏެވެ. މި ހަފުތާގައި އެކްސްގައި އާންމުކުރި ލިޔުންތަކެއްގައި، އުމުރުން 27 އަހަރުގެ ކޮކްސަން ބުނީ، "މި ޓެކްނޮލޮޖީ އުފައްދާ މީހުން ވެސް ގަބޫލުކުރާ ގޮތުގައި، ކުރިއަށް އޮތް ދިހަ އަހަރުގެ ތެރޭގައި އޭއައިގެ ސަބަބުން އިންސާނިއްޔަތު އެކީގައި ނެތިގޮސްދާނެ" ކަމަށެވެ.