އޭއައި ސްމާޓް އައިނު ބޭނުންކޮށްގެން ގައުމީ ފެންވަރުގެ އިމްތިހާނެއްގައި މަކަރު ހެދި މައްސަލައެއްގައި، ދެކުނު ކޮރެއާގައި ފުރަތަމަ ފަހަރަށް ޖިނާއީ ދައުވާއެއް އުފުލައިފި

އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އުފައްދާފައިވާ ސްމާޓް އައިނު ބޭނުންކޮށްގެން ގައުމީ ފެންވަރުގެ އިމްތިހާނެއްގައި މަކަރު ހެދި މައްސަލައެއްގައި، ދެކުނު ކޮރެއާގެ ޕްރޮސެކިއުޓަރުން ފުރަތަމަ ފަހަރަށް ޖިނާއީ ދައުވާއެއް އުފުލައިފި އެވެ.

މިދިޔަ މެއި މަހު ބޭއްވި އިމްތިހާނެއްގައި އޭއައި ސްމާޓް އައިނު ބޭނުންކޮށްގެން މަކަރު ހެދި ކަމުގެ ތުހުމަތުގައި، އުމުރުން 40 އަހަރުގެ ފިރިހެނެއްގެ މައްޗަށް "ނޭޝަނަލް ޓެކްނިކަލް ކޮލިފިކޭޝަން އެކްޓް" އާ ޚިލާފުވި ކަމުގެ ދައުވާ ގުވަންޖޫ ޑިސްޓްރިކްޓް ޕްރޮސެކިއުޓަރުގެ އޮފީހުން މިދިޔަ މަހު ވަނީ އުފުލާފަ އެވެ.

ކޮރެއާ ޖޫންގްއަންގް ޑެއިލީން ގާނޫނީ މަސްދަރުތަކާ ހަވާލާދީ ރިޕޯޓްކޮށްފައިވާ ގޮތުގައި، ގުވަންޖޫގައި ބޭއްވި ފަޔަރ ޕްރޮޓެކްޝަން ފެސިލިޓީޒް އިންޖިނިއަރ ސެޓިފިކޭޝަން އިމްތިހާނުގެ ތެރެއިން މި މީހާ އަތުލައިގަނެވުނީ، އޭނާ އަޅައިގެން ހުރި އައިނުގެ ލެންސުން އަލި ރިފްލެކްޓްވާކަން އިމްތިހާނު ހޯލްގެ ސުޕަވައިޒަރަށް ފާހަގަވުމާ ގުޅިގެންނެވެ.

ސުވާލުކުރުމުން އެ މީހާ ވަނީ އިމްތިހާނުގައި މަކަރު ހެދިކަމަށް އިއުތިރާފުވެފަ އެވެ. އަދި އޭނާ ތަހުގީގު ކުރާ ފަރާތްތަކަށް ކިޔައިދީފައިވާ ގޮތުގައި، އޭނާ ވަނީ އެ އައިނާ އެކު މަސައްކަތްކުރާ އޭއައި އެޕްލިކޭޝަނެއް އަމިއްލައަށް ތައްޔާރުކޮށްފަ އެވެ. އޭނާ މިކަން ކުރީ އަސްލު އިމްތިހާނެއްގެ ތެރޭގައި އެ އެޕްލިކޭޝަން ބޭނުންކޮށްގެން ސައްހަ ޖަވާބުތައް ނެރެވިދާނެތޯ ބެލުމުގެ ބޭނުމުގައި ކަމަށް އޭނާ ބުނެފައިވެ އެވެ.

ކަމާބެހޭ ފަރާތްތަކުން ބުނާ ގޮތުގައި މިއީ ހަމައެކަނި އެކަހެރި ހާދިސާއެއް ނޫނެވެ.

މިދިޔަ މެއި މަހު ސޯލް އަދި މޮކްޕޯގައި ބޭއްވި ގައުމީ ޓެކްނިކަލް ކޮލިފިކޭޝަން އިމްތިހާނުތަކެއްގައި ވެސް އޭއައި ސްމާޓް އައިނު ބޭނުންކުރަން އުޅުނު އުމުރުން 20 އަހަރުގެ ދެ ޒުވާނަކު ވަނީ ހިފަހައްޓާފަ އެވެ. މީގެ އިތުރުން، އިނގިރޭސި ބަހުގެ ފެންވަރު ބަލާ އިމްތިހާނެއް ކަމަށްވާ "ޓެސްޓް އޮފް އިންގްލިޝް ފޯ އިންޓަނޭޝަނަލް ކޮމިއުނިކޭޝަން" (ޓޮއިކް) ގެ އެކި އިމްތިހާނުތަކުގައި ވެސް މިފަދަ އާލާތްތައް ބޭނުންކޮށްފައިވެ އެވެ. އެގޮތުން މެއި މަހު ދެ ކެންޑިޑޭޓަކު އަދި ޖޫން މަހު އެކަކު ވަނީ އަތުލައިގަނެފަ އެވެ.

މި ހާދިސާތަކާ ގުޅިގެން، އިމްތިހާނުތަކުގެ ސަލާމަތީ ފިޔަވަޅުތައް މުރާޖައާ ކުރުމަށް އޮފިޝަލުންނަށް ވަނީ މަޖުބޫރުވެފަ އެވެ.

ގައުމީ ފެންވަރުގެ ބޮޑެތި އިމްތިހާނުތައް ހިންގާ އިދާރާތަކުގެ މަންދޫބުން ޖުލައި މަހުގެ 10 ވަނަ ދުވަހު ބައްދަލުކޮށް، މިކަމާ ދެކޮޅަށް އެޅިދާނެ ފިޔަވަޅުތަކާ ބެހޭގޮތުން ވަނީ މަޝްވަރާކޮށްފަ އެވެ. އޭގެ ތެރޭގައި އިމްތިހާނު ހޯލަށް ވެއްދުން މަނާ ތަކެތީގެ ލިސްޓަށް އޭއައި ސްމާޓް އައިނު ސީދާ ގޮތެއްގައި އިތުރުކުރުމާއި، މިފަދަ އާލާތްތައް ބޭނުންކޮށްގެން މަކަރު ހަދާ މީހުންނަށްދޭ އަދަބުތައް ބޮޑުކުރުން ހިމެނެ އެވެ.

މި މައްސަލައިގައި ދައުވާ އުފުލާފައި މިވަނީ، ހަށިގަނޑުގައި އަޅައިގެން އުޅެވޭ އޭއައި ޓެކްނޮލޮޖީ ކުރިއަރަމުން ދިއުމުގެ ސަބަބުން، އިމްތިހާނުތަކުގައި މަކަރު ހަދާ މީހުން އަތުލައިގަތުމަށް ކުރިން ބޭނުންކުރި އާދައިގެ ގޮތްތައް ބޭނުންކުރަން އުނދަގޫވަމުންދާ ދަނޑިވަޅެއްގަ އެވެ.

ކެމެރާ އާއި އޯޑިއޯގެ ޚިދުމަތް އެކަނި ލިބޭ ކުރީގެ ސްމާޓް އައިނުތަކާ ޚިލާފަށް، އޭއައި ބޭނުންކޮށްގެން އުފައްދާފައިވާ އާ މޮޑެލްތަކުގެ އައިނުން، އޭގައި ހުންނަ ކެމެރާ މެދުވެރިކޮށް ފެންނަ ލިޔުންތައް ދެނެގަނެ، ސުވާލުތައް "ލާޖް ލެންގުއޭޖް މޮޑެލް" ތަކަށް ފޮނުވައި، އޭގެ ޖަވާބު އައިނުގެ ލެންސުން ނުވަތަ އަޑުން ބޭނުންކުރާ މީހާއަށް ފޯރުކޮށްދެ އެވެ.

މި ހާދިސާތަކުގެ ސަބަބުން މުޅި އޭޝިއާ ސަރަހައްދުގައި ވަނީ ކަންބޮޑުވުން އުފެދިފަ އެވެ. ސަބަބަކީ އޭޝިއާގެ ގައުމުތަކުގައި ބާއްވާ ބޮޑެތި އިމްތިހާނުތަކަކީ ޔުނިވަރސިޓީތަކުން ފުރުސަތު ހޯދުމާއި، ވަޒީފާ އަދި ޕްރޮފެޝަނަލް ލައިސަންސް ހޯދުމަށް ވަރަށް މުހިންމު އިމްތިހާނުތަކަކަށް ވާތީ އެވެ. ދެކުނު ކޮރެއާގެ އެޑިއުކޭޝަން މިނިސްޓްރީން މިހާރުވެސް ދަނީ މިއަހަރު ބާއްވާ "ކޮލެޖް ސްކޮލަސްޓިކް އެބިލިޓީ ޓެސްޓް" (ސީއެސްއޭޓީ) ގެ ކުރިން އިތުރު ސަލާމަތީ ފިޔަވަޅުތައް އެޅުމަށް ވިސްނަމުންނެވެ. ހަމައެއާއެކު، ޗައިނާ އާއި ތައިވާނުގެ ކަމާބެހޭ ފަރާތްތަކުން ވެސް ވަނީ އިމްތިހާނުތަކުގައި އޭއައި ސްމާޓް އާލާތްތައް ބޭނުންކުރާ މިންވަރު ބެލުމަށް ފާރަވެރިވުން ވަރުގަދަކޮށްފަ އެވެ.

އޭއައި ސްމާޓް އައިނާއި އެހެނިހެން ސްމާޓް އާލާތްތައް ބޭނުންކޮށްގެން ތައުލީމީ ދާއިރާގައި މަކަރު ހަދާ މިންވަރާ ބެހޭގޮތުން ދިރާސާ ކުރައްވާ އޮސްޓްރޭލިއާގެ ޑީކިން ޔުނިވަރސިޓީގެ ލެކްޗަރާ ތޯމަސް ކޯބިން ސީއެންއެންއަށް ދެއްވި އިންޓަވިއުއެއްގައި ވިދާޅުވީ، މަދު މައްސަލަތަކެއް ރިޕޯޓް ކުރެވުނު ނަމަވެސް، ރިޕޯޓް ނުކުރެވި މިފަދަ އެތައް މައްސަލަތަކެއް ހިނގަމުންދާނެ ކަމަށް ބެލެވޭ ކަމަށެވެ.