ޓްރަމްޕް: ކޮންގްރެސްގެ އަޣުލަބިއްޔަތު ހޯދިއްޖެނަމަ ކޮންމެ ބޮޑުމީހަކަށް 5,000 ޑޮލަރު ދޭނަން

ނޮވެމްބަރު މަހު އެމެރިކާގައި ބޭއްވުމަށް ހަމަޖެހިފައިވާ މިޑްޓާމް އިންތިޚާބުގައި، ކޮންގްރެސްގެ ދެ މަޖިލިސް ކަމަށްވާ ހައުސް އޮފް ރެޕްރެޒެންޓެޓިވްސްއާއި ސެނެޓުގެ އަޣުލަބިއްޔަތު ވެރިކަންކުރާ ރިޕަބްލިކަން ޕާޓީން ދަމަހައްޓައިފި ނަމަ، 18 އަހަރުން މަތީގެ ކޮންމެ ރައްޔިތަކަށް 5،000 ޑޮލަރު ދިނުމަށް ރައީސް ޑޮނަލްޑް ޓްރަމްޕް ވައުދުވެވަޑައިގަންނަވައިފި އެވެ. ވެރިކަން ކުރާ ޕާޓީގެ ބާރު ދެމެހެއްޓުމަށް ޓަކައި ޓްރަމްޕް މި ފަދަ އާދަޔާޚިލާފު ހުށަހެޅުމެއް ހުށަހަޅުއްވާފައި މި ވަނީ ސިޔާސީ ގޮތުން ބޮޑެތި ގޮންޖެހުންތަކަކާ ކުރިމަތިލާން ޖެހިފައިވާ ދަނޑިވަޅެއްގަ އެވެ.

ނަމަވެސް، މި ފައިސާ ދޭނީ ކޮން ގޮތަކުން ކަމާ ބެހޭ އެއްވެސް ތަފްސީލެއް ޓްރަމްޕް ހާމައެއް ނުކުރައްވަ އެވެ. އޭނާ މި ކަން ސިފަކުރެއްވީ ކުންފުނިތަކުން ހިއްސާދާރުންނަށް ބަހާ ފައިދާ ނުވަތަ 'ޑިވިޑެންޑް' ބެހުމާ އެއްފަދަ ގޮތަކަށެވެ. އަދި، މިއީ މިދިޔަ އަހަރު އޭނާގެ ސަރުކާރުން ސިފައިންނަށް ދޫކުރި 1،776 ޑޮލަރުގެ ޗެކްތަކާ އެއްފަދަ ކަމެއްގެ ގޮތުގައި ވެސް ޓްރަމްޕް ސިފަކުރެއްވި އެވެ.

"މިއީ އަޅުގަނޑުގެ ވައުދެއް: ރިޕަބްލިކަން ޕާޓީން ހައުސް އޮފް ރެޕްރެޒެންޓެޓިވްސްއާއި ޔުނައިޓެޑް ސްޓޭޓްސް ސެނެޓް، މި ދެ މަޖިލީހުގެ ގޮނޑިތައް ކާމިޔާބުކޮށްފި ނަމަ، އެމެރިކާގެ ކޮންމެ ބޮޑު މީހަކަށް 5،000 ޑޮލަރުގެ ޑިވިޑެންޑެއް އަޅުގަނޑު ދޭނަން،" ޓްރަމްޕް ވައުދުވެވަޑައިގެންނެވި އެވެ.

ޓްރަމްޕް މި ފަދައިން ވައުދުވެވަޑައިގަތީ ބުދަ ދުވަހުގެ ރޭ ޓެކްސަސްގެ ޑެލެސްގައި ފެށި ރިޕަބްލިކަން ޕާޓީގެ ޚާއްސަ ކޮންވެންޝަނެއްގައި ވާހަކަފުޅު ދައްކަވަމުންނެ އެވެ. ޓްރަމްޕް މި ފަދަ ހުށަހެޅުމެއް ހުށަހެޅުއްވީ، އޭނާއަށް އޮތް ތާއީދު ދަށްވަމުންދިއުމާއި، އިގްތިސާދީ ގޮތުން ކުރިމަތިވެފައިވާ ހުރަސްތަކުން އަރައިގަތުމަށް ގިނަ ގޮންޖެހުންތަކެއް ކުރިމަތިވެފައިވާ ދަނޑިވަޅެއްގަ އެވެ. އަދި، އިންތިޚާބުގައި ރިޕަބްލިކަން ޕާޓީގެ އަޣުލަބިއްޔަތު ދަމަހައްޓައި، އިދިކޮޅު ޑިމޮކްރެޓިކް ޕާޓީން ފަށާފާނެ ތަހުގީގުތަކާއި އޭނާގެ ސިޔާސަތުތަކަށް ކުރިމަތިވާ ހުރަސްތަކުން ސަލާމަތްވެ، ވެރިކަމުގެ ފަހު ދެ އަހަރު އަމާންކަމާއެކު ކުރިއަށް ގެންދިއުމުގެ މަގްސަދުގައި ކަމަށް މަސްރަހު ދިރާސާކުރާ ފަރާތްތަކުން ދެކެ އެވެ.

މި ކޮންވެންޝަންގެ ފުރަތަމަ ރޭގެ ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން، ޓްރަމްޕް ވަނީ ޑިމޮކްރެޓުންނަށް މަލާމާތްކޮށް "ޑަމޮކްރެޓްސް" ގެ ނަމުން މުޚާތަބުކުރައްވައި، ޑިމޮކްރެޓިކް ޕާޓީގެ މެންބަރުންނާއި އެ ޕާޓީއަށް ތާއީދުކުރާ މީހުންނަކީ "މޮޔައިންގެ" ގޮތުގައި ސިފަކުރައްވާފަ އެވެ. މީގެ އިތުރުން، ބޯޑަރުގެ ސަލާމަތީ ކަންކަމާ ގުޅޭގޮތުން ކުރައްވާ މަސައްކަތްތަކަށް ތައުރީފުކުރައްވައި، އަންހެނުންގެ ކުޅިވަރު މުބާރާތްތަކުގައި ބައިވެރިވެވޭނެ މީހުންނާމެދު އޭނާގެ ސަރުކާރުން ގެންގުޅޭ ސިޔާސަތަށް އޮތް ތާއީދާ މެދު ފަޚުރުވެރިވެވަޑައިގަންނަވާ ކަން އޭނާ ހާމަކުރެއްވި އެވެ.

އަދި، ނޮވެންބަރު 3 އާ ހަމައަށް ރިޕަބްލިކަން ޕާޓީގެ ކެމްޕޭނުގައި ވަރަށް ފުޅާކޮށް ބައިވެރިވެވަޑައިގަންނަވާނެ ކަން އޭނާ އިއުލާނުކުރެއްވި އެވެ. "އަޅުގަނޑު އެދެނީ މި އިންތިޚާބުގެ ވޯޓު ކަރުދާހުގައި އަޅުގަނޑުގެ ނަން އޮތް ކަމަށް ތިޔަބޭފުޅުން ތަސައްވަރު ކުރެއްވުމަށް. އަޅުގަނޑުގެ ނަން އެބައޮތް. ހަމައެކަނި މިފަހަރު ވެސް،" ޓްރަމްޕް ވިދާޅުވި އެވެ.

ރިޕަބްލިކަން ކެނޑިޑޭޓުންނަށް ތައުރީފާއެކު، އިދިކޮޅު ކެނޑިޑޭޓުންނަށް މަލާމާތާއި ފުރައްސާރަ

ކޮންވެންޝަނުުގައި ވާހަކަފުޅު ދައްކަވަމުން ޓްރަމްޕް ވަނީ ކުރިއަށް އޮތް ދުވަސްތަކުގެ ތެރޭގައި ރިޕަބްލިކަން ޕާޓީއަށް މިޑްޓާމް އިންތިޚާބު ކާމިޔާބު ކޮށްދެއްވުމަށް ގިނަގުނަ މަސައްކަތްތަކެއް ކުރައްވާނެ ކަށެވެ. މި ގޮތުން، ކޮންގްރެސްގެ އަޣުލަބިއްޔަތު ދެމެހެއްޓުމަށް ޓަކައި، ވާދަވެރި ދާއިރާތަކުން ހައުސްއާއި ސެނެޓަށް ކުރިމަތިލާ 35 ކެންޑިޑޭޓުންނާއެކު ކެމްޕޭން ހަރަކާތްތަކުގައި ބައިވެރިވެވަޑައިގަންނަވާނެ ކަން ޓްރަމްޕް އިއުލާނު ކުރެއްވި އެވެ.

އެމެރިކާގެ ރައީސް ޑޮނަލްޑް ޓްރަމްޕް، ޓެކްސަސްގެ ޑަލަސްގައި ބޭއްވި ރިޕަބްލިކަން ޕާޓީގެ ކޮންވެންޝަންގައި ވާހަކަފުޅު ދައްކަވަނީ. | ސީއެންއެން | ސީއެންއެން

މިއީ، ވެރިކަން ކުރާ ޕާޓީއަށް މިޑްޓާމް އިންތިޚާބުތަކުގައި އާންމުކޮށް ކުރިމަތިވާ ނާކާމިޔާބީގެ ސަގާފަތް ބަދަލުކުރުމަށް ޓްރަމްޕް ކުރައްވާ މަސައްކަތެއްގެ ގޮތުގައި އޭނާއަށް ތާއީދުކުރާ މީހުން ސިފަކުރެ އެވެ. "އަޅުގަނޑުމެން މި ފަދަ ބޮޑެތި އެއްވުންތައް ބާއްވާނަން. މީހުން ފުރިފައިވާ ބޮޑެތި މާލަންތަކުގައި އަޅުގަނޑުމެންގެ ހަރަކާތްތައް ކުރިއަށްދާނެ،" ޓްރަމްޕް ވިދާޅުވި އެވެ.

އީރާން ހަނގުރާމައާއި ތެލުގެ އަގު

ޓްރަމްޕް އިސްވެ، އީރާނާ ދެކޮޅަށް ފެށި ޣައިރުގާނޫނީ ހަނގުރާމައިގެ ސަބަބުން ތެލުގެ އަގު ވަނީ ވަރަށް ބޮޑަށް އުފުލިފަ އެވެ. މި ގޮތުން، މިދިޔަ ޖުލައި މަހަށްފަހު ފުރަތަމަ ފަހަރަށް ސާފުނުކުރާ ތެޔޮ ފީފާއެއްގެ އަގު ވަނީ 100 ޑޮލަރަށް އުފުލިފަ އެވެ. މި ކަމުގެ އެންމެ ބޮޑު ތަކުލީފެއް އުފުލަން ޖެހިފައި ވަނީ އެމެރިކާގެ ރައްޔިތުންނެވެ. މިއީ، މިޑްޓާމް އިންތިޚާބާ ކުރިމަތިލާއިރު، ޓްރަމްޕްގެ ރިޕަބްލިކަން ޕާޓީއަށް ކުރިމަތިވާނެ އެންމެ ބޮޑު ގޮންޖެހުމެވެ.

މި ދަނޑިވަޅުގައި، ތަކެތީގެ އަގު ބޮޑުވުމުގެ މައްސަލައިގައި ވެސް ޑިމޮކްރެޓުން ދަނީ ރިޕަބްލިކަން ކެންޑިޑޭޓުންނަށް ވަރަށް ބޮޑަށް ފާޑުކިޔަމުންނެވެ. ޑެލެސް ކޮންވެންޝަންގައި ރިޕަބްލިކަން ޕާޓީން ވަނީ ދިރިއުޅުމުގެ ޚަރަދުތައް ކުޑަކުރުމާ ގުޅޭ މެސެޖުތަކެއް ދިނުމަށް މަސައްކަތްކޮށްފަ އެވެ. މި ގޮތުން، ޓިޕްސްއާއި އިތުރުގަޑީގެ ފައިސާއިން ޓެކްސް ކަނޑާލުން ހިމެނޭ ގޮތަށް ޓްރަމްޕް 2025 ވަނަ އަހަރަށް އެކުލަވާލައްވާފައިވާ ޓެކްސް ގާނޫނަށް ރިޕަބްލިކަން ޕާޓީގެ ކެނޑިޑޭޓުން ވަނީ ތައުރީފު ކުރައްވާފަ އެވެ.

އީރާނު ހަނގުރާމައާއި ތެލުގެ އަގާ ގުޅޭގޮތުން އެންމެ ސީދާކޮށް ވާހަކަދެއްކެވީ ޓްރަމްޕެވެ. އޭނާ ވިދާޅުވީ، އެމެރިކާއިން މި ހަނގުރާމަ ކާމިޔާބުކުރާ ހިސާބުން ފެށިގެން ތެލުގެ އަގު ދަށްވާނެ ކަމަށެވެ. އަދި، އީރާނުގެ "ހުރްމުޒް ކަނޑުއޮޅީގެ" ގެ ނަން "ޓްރަމްޕް ކަނޑުއޮޅި" އަށް ބަދަލުކުރަންޖެހޭ ކަމަށް ވެސް އޭނާ ވިދާޅުވި އެވެ.

ޕްރޮގްރެސިވް ކެންޑިޑޭޓުންނަށް ވެސް ރިޕަބްލިކަނުންގެ ހަމަލާތައް

މިޝިގަންގެ ސެނެޓްގެ ގޮނޑިއަށް ޑިމޮކްރެޓިކް ޕާޓީގެ ފަރާތުން ވާދަކުރައްވާ ޢަބްދުއްރަހްމާން މުޙައްމަދު އަލް-ސައްޔިދަކީ ޑެލެސް ކޮންވެންޝަންގައި އެންމެ ގިނައިން ނަންގަނެވުނު އެއް ބޭފުޅާ އެވެ. ނޮވެންބަރުގެ އިންތިޚާބުގައި އޭނާ ގެންދަވަނީ ރިޕަބްލިކަން ޕާޓީގެ ކެނޑިޑޭޓު، އަދި ކުރިން ކޮންގްރެސްގެ މެންބަރުކަން ފުރުއްވާފައިވާ މައިކް ރޮޖާސްއާ ދެކޮޅަށް ކެންޕޭން ކުރައްވަމުންނެވެ. މިއީ، ސެނެޓުގެ އެންމެ މުހިންމު އެއް ގޮނޑީގެ ގޮތުގައި މަސްރަހު ދިރާސާކުރާ ފަރާތްތަކުން ގަބޫލުކުރެ އެވެ. އަދި، މިއީ ޑިމޮކްރެޓުންގެ އަތުން ގޮނޑިއެއް އަތުލުމަށް ރިޕަބްލިކަން ޕާޓީއަށް އޮތް އެންމެ ފަހި ފުރުސަތު ކަމަށް ވެސް އެ ފަރާތްތަކުން ބުނެ އެވެ. ސެނެޓުގެ އަޣުލަބިއްޔަތު ހޯދުމަށް ޑިމޮކްރެޓުންނަށް އިތުރު ހަތަރު ގޮނޑި ބޭނުންވާނެ އެވެ.

"އޭނާ (ސައްޔިދު) އަމިއްލަ ސްޓޭޓްގެ ބައެއް ދެކެ ރުޅިއާދޭ. އިސްރާއީލްގެ ދައުލަތް އޮންނަންޖެހޭނެ ކަމާ މެދު އޭނާ ޝައްކުކުރޭ،" ދެކުނު ކެރޮލައިނާގެ ސެނެޓަރު ޓިމް ސްކޮޓް ވިދާޅުވި އެވެ. ސައްޔިދަކީ 2023 ވަނަ އަހަރުގެ އޮކްޓޫބަރު 7 ގައި ހަމާސްއިން ދިން ހަމަލާއަށް ފަހު އިސްރާއީލުން ޣައްޒާގެ ރައްޔިތުންގެ ނަސްލުހޭދު ކުރުމަށް ފެށި ގަތުލުއާންމަށް ވަރަށް ބޮޑަށް ފާޑުވިދާޅުވަމުން ގެންދަވާ ބޭފުޅެކެވެ. 

ރިޕަބްލިކަން ޕާޓީން ވަނީ ޑިމޮކްރެޓިކް ސޯޝަލިސްޓުންނާއި ސައްޔިދު ފަދަ ޕްރޮގްރެސިވް ބޭފުޅުންނަކީ އެމެރިކާގެ އަގުތަކާ ޚިލާފު، ހަރުކަށި ފިކުރުގެ، ކޮމިއުނިސްޓް އަދި ޓެރަރިސްޓުންނަށް ތާއީދުކުރާ ބައެއްގެ ގޮތުގައި ސިފަކޮށްފަ އެވެ. މީގެ އިތުރުން، މުޅި ޑިމޮކްރެޓިކް ޕާޓީއަކީ ސައްޔިދުއާއި، ނިއު ޔޯކް ސިޓީގެ މޭޔަރު ޒޮހްރާން މަމްދާނީ އަދި މިނެސޯޓާގެ މެންބަރު އިލްހާން އުމަރު ފަދަ ބޭފުޅުންނާ ގުޅިފައިވާ ބައެއްގެ ގޮތުގައި ދެއްކުމަށް ރިޕަބްލިކަން ޕާޓީން މަސައްކަތްކުރި އެވެ. މި ތިން ބޭފުޅުންނަކީ ވެސް މުސްލިމުންނެވެ.

"މި އިންތިޚާބަކީ ވަރަށް ސާފު އިންތިޚާބެއް. މިއީ މެދުމިނުގެ ސިޔާސަތާއި ހަރުކަށި ފިކުރާ ދެމެދު އޮތް ހަނގުރާމައެއް. އެމެރިކާއަކީ ދުވަހަކުވެސް މޮޅު ގައުމެއް ކަމަށް ގަބޫލުނުކުރާ ސިޔާސީ ހަރަކާތެއް މި ގައުމުގައި އެބައޮތް،" ޓެކްސަސްގެ މެންބަރު ބްރެންޑަން ގިލް ވިދާޅުވި އެވެ. ގިލްއަކީ މީގެ ކުރިން މުސްލިމުން އެމެރިކާއަށް ހިޖުރަކުރުން މަނާކުރަންޖެހޭނެ ކަމަށް ވިދާޅުވެފައިވާ ބޭފުޅެކެވެ. އޭނާ ވިދާޅުވީ މުސްލިމުން ބައެއް ފަހަރު އަމިއްލައަށް ސޯޝަލިސްޓުން ނުވަތަ ކޮމިއުނިސްޓުންގެ ގޮތުގައި ތައާރަފުވި ނަމަވެސް، ގިނަ މީހުންނަށް ކިޔަނީ "ޑިމޮކްރެޓުން" ކަމަށެވެ.