އޮހާޔޯގެ ގަވަރުނަރު ކަމަށް ވާދަކުރައްވާ ޑިމޮކްރެޓިކް ކެނޑިޑޭޓަށް ހަމަލާދޭން އުޅެފި

އެމެރިކާގެ އޮހާޔޯ ސްޓޭޓްގެ ގަވަރުނަރުކަމަށް އިދިކޮޅު ޑިމޮކްރެޓިކް ޕާޓީގެ ފަރާތުން ވާދަކުރައްވާ ކެންޑިޑޭޓް އޭމީ އެކްޓަން، ކެމްޕޭން ކުރައްވަމުން ގެންދަވަނިކޮށް ހަތިޔާރު އެޅި މީހަކު ހަމަލާދޭން މަސައްކަތްކޮށްފި އެވެ. މި ހާދިސާގައި ބައެއް މީހުން ޒަޚަމްވި ނަމަވެސް، އެކްޓަންއަށް އެއްވެސް އަނިޔާއެއް ނުވެ އެވެ. އޭނާގެ ކެމްޕޭން ތަރުޖަމާނު އެޑީ ބުލޮކް ވިދާޅުވީ، ހަތިޔާރު ހިފައިގެން ހުރި މީހާ އެކްޓަންއަށް ހަމަލާދޭން މަސައްކަތް ކޮށްފައި ވަނީ އޭނާ ކެމްޕޭން ޖަލްސާގައި ވާހަކަފުޅު ދައްކަވަން ހުއްޓާ ކަމަށެވެ.

މެހޯނިންގް ކައުންޓީގެ ޑިމޮކްރެޓިކް ޕާޓީގެ ޗެއާމަން ކްރިސް އެންޑަސަން  ވިދާޅުވީ، އެކްޓަންއަށް ހަމަލާދޭން މަސައްކަތް ކޮށްފައި ވަނީ އުމުރުން 38 އަހަރުގެ ޕެޓްރިކް ހަވާސް ކިޔާ މީހެއް ކަމަށެވެ. އަދި، އޭނާ ހައްޔަރު ކޮށްފައި ވަނީ، ކެމްޕޭންގައި ހަރަކާތްތެރިވަމުން ދިޔަ ވޮލަންޓިއަރުންގެ އެހީތެރިކަމާ އެކުގައި ކަމަށެވެ. އޭނާގެ އަތުން ގިނަ އަދަދެއްގެ ހަތިޔާރު ފެނިފައިވާ ކަމަށް ފުލުހުން ބުނެ އެވެ. އެ ސަރަހައްދުގެ ފުލުހުންގެ އިސް އޮފިޝަލެއް ކަމަށްވާ ޖެރީ ގްރީން ވިދާޅުވީ، ހަވާސް ހައްޔަރުކުރުމަށް ކުރި މަސައްކަތުގެ ތެރެއިން އުމުރުން ދުވަސްވީ ދެ މީހަކަށް އަނިޔާވި ކަމަށެވެ.

އޮހާޔޯ ސްޓޭޓް ހައިވޭ ޕެޓްރޯލުން ބުނީ، ހަވާސް ހުއްޓުވި އިރު އޭނާގެ އަތުން ދެ ފިސްތޯލާއި "ޓޭޒަރ" ބަޑިއެއް ފެނިފައިވާ ކަމަށެވެ. އަދި، ގޮށްމުށުން ހަމަލާދިނުމަށް ބޭނުންކުރެވޭނެ ފަދަ "ބްރާސް ނަކްލްސް" އެއް ވެސް ފެނިފައިވާ ކަމަށެވެ. ފުލުހުން ވަނީ ހަވާސް ހައްޔަރުކޮށް، ދެ ހަމަލާގެ ދައުވާއާއި އާންމު މަސްލަހަތު ނަގާލުމުގެ ދައުވާ އުފުލާފަ އެވެ. މައްސަލައިގެ ތަހުގީގު ކުރިއަށްދާތީ އިތުރު ތަފުސީލެއް އަދި ނުލިބެ އެވެ.

އޮހާޔޯގެ ގަވަރުނަރު މައިކް ޑިވައިން ވަނީ އެކްޓަންއަށް ދޭން އުޅުނު ހަމަލާ ކުށްވެރި ކުރައްވާފަ އެވެ. އަދި، ހަމަލާ ހުއްޓުވުމަށް ފުލުހުން ވަރަށް އަވަހަށް އިޖާބަދީފައިވާ ކަން އޭނާ ފާހަގަކުރެއްވި އެވެ. އިންތިޚާބީ ދައުރު ހަމަވާތީ ކުރިއަށް އޮތް އިންތިޚާބުގައި އޭނާ ވާދައެއް ނުކުރައްވަ އެވެ. އިންތިޚާބުގައި އެކްޓަންއާ ވާދަކުރައްވާ ވެރިކަންކުރާ ރިޕަބްލިކަން ޕާޓީގެ ކެނޑިޑޭޓު، ވިވެކް ރާމަސްވާމީ ވަނީ އެކްޓަންއަށް ދޭން އުޅުނު ހަމަލާއާ މެދު ކަންބޮޑުވުން ފާޅުކުރައްވައި، މިއީ ބަލައިގަނެވޭނެ ކަމެއް ނޫން ކަމަށް ވިދާޅުވެފަ އެވެ. ރާމަސްވާމީއަކީ ޓެކްނޮލޮޖީގެ ދާއިރާގައި ހަރަކާތްތެރިވާ ކުންފުނިތަކާ ގާތް ގުޅުމެއް ބާއްވަވާ، އަދި ރައީސް ޑޮނަލްޑް ޓްރަމްޕްގެ އަރިސް ބޭފުޅެކެވެ. އިންތިޚާބުގެ ކެމްޕޭންގެ ތެރެއިން އޭނާ ވަނީ އެކްޓަންއަށް ފާޑުވިދާޅުުވެ، ގިނަ ވީޑިއޯތަކާ ކެމްޕޭން މެޓީރިއަލް ޝާއިއު ކުރައްވާފައެވެ.

އޮހާޔޯގެ ގަވަރުނަރު ކަމަށް ބޭފުޅަކު އިންތިޚާބު ކުރުމަށް ބާއްވާ އިންތިޚާބު އޮންނާނީ ނޮވެމްބަރު 3 އެމެރިކާގެ މިޑްޓާމް އިންތިޚާބާ އެކުއެކީގަ އެވެ. މި އިންތިޚާބަށް ކެމްޕޭން ކުރުމަށް ދެން ބާކީ އޮތީ ހައެއްގެ ހަފުތާ އެވެ. 2023 އާއި 2024 ވަނަ އަހަރު އެމެރިކާގައި ބާއްވާފައިވާ އިންތިޚާބުތަކުގައި ވާދަކުރެއްވި ކެނޑިޑޭޓުންގެ ސަލާމަތާއި ރައްކާތެރިކަން ކަށަވަރު ކޮށްދިނުމަށް 40 މިލިއަން އެމެރިކާ ޑޮލަރު ހޭދަކޮށްފައިވާ ކަމަށް 'ޕަބްލިކް ސާވިސް އެލަޔަންސް' އިން ހާމަކޮށްފައިވާ ތަފާސްހިސާބުތަކުން ސާފުވެ އެވެ.

މިއީ، ފާއިތުވި ދިހަވަރަކަށް އަހަރު އެމެރިކާގައި އިތުރުވަމުންދާ ސިޔާސީ އަނިޔާވެރިކަމުގެ ބައެއްގެ ގޮތުގައި މަސްރަހު ދިރާސާކުރާ ފަރާތްތަކުން ފާހަގަކުރެ އެވެ. މި ގޮތުން، 2025 ގައި މިނެސޯޓާގެ ގާނޫނުހަދާ މަޖިލީހުގެ މެންބަރު މެލީސާ ހޯޓްމަންއާއި އޭނާގެ ފިރިކަލުން މާކް ހޯޓްމަންއަށް ހަމަލަދީ އަވަހާރަ ކޮށްލާފައިވެ އެވެ. އަދި، 2022 ގައި ޤާނޫނުހަދާ މަޖިލީހުގެ ކުރީގެ ރައީސް ނޭންސީ ޕެލޯސީގެ ފިރިކަލުންނަށް ވެސް ހަމަލާދީފައިވެ އެވެ. މީގެ އިތުރުން، 2024 ގެ ރިޔާސީ ކެމްޕޭނުގައި ޑޮނަލްޑް ޓްރަމްޕް އަވަހާރަކޮށްލަން ދެ ފަހަރަކު މަސައްކަތް ކޮށްފައިވެ އެވެ. އަދި، މި އަހަރުގެ ވައިޓް ހައުސް ކޮރެސްޕޮންޑެންޓްސް އެސޯސިއޭޝަންގެ އަހަރީ ފަރިއްކޮޅުގެ ސަލާމަތީ ފިޔަވަޅުތައް މުގުރާލައި އެ ތަނަށް ވަނުމަށް ވެސް ހަތިޔާރު އެޅި މީހަކު މަސައްކަތް ކޮށްފައިވެ އެވެ.