ޕީއެސްޖީ މީހަކަށް ބެލެންޑިއޯ ދެންޏާ ދޭންވީ އެންރީކޭ އަށް، ސްޕެއިން މީހަކަށް ދެންޏާ ފުއެންޓޭ އަށް: މޮރީނިއޯ

މިއަހަރުގެ ބެލެންޑިއޯ އެވޯޑު ލިބެން ޖެހޭނީ ރެއާލް މެޑްރިޑަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭ އަށް ކަމަށާއި، އެއީ ފީފާ ވޯލްޑް ކަޕް ނުވަތަ ޔުއެފާ ޗެމްޕިއަންސް ލީގުގެ ކާމިޔާބީ އަށް ބަލައިގެން ދޭން ޖެހޭ އެވޯޑެއް ނޫން ކަމަށް ރެއާލްގެ ކޯޗު ހޯސޭ މޮރީނިއޯ ބުނެފި އެވެ. 

ސްޕެނިޝް ލީގުގައި ރެއާލް އިން މަލާގާއާ ދެކޮޅަށް ކުޅުނު މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން މޮރީނިއޯ ބުނެފައި ވަނީ، މިވަގުތު ދުނިޔޭގެ އެންމެ ރަނގަޅު ކުޅުންތެރިންގެ ތެރޭގައި ދެ ކުޅުންތެރިޔަކު، ތިން ކުޅުންތެރިޔަކު ނުވަތަ ހަތަރު ކުޅުންތެރިޔަކު ތިބި ކަމަށެވެ. އަދި އެއީ ކޮން ކުޅުންތެރިންނެއްކަން އެންމެނަށް ވެސް އެނގޭ ކަމަށް އޭނާ ބުންޏެވެ. 

މޮރީނިއޯ ބުނީ އޭނާގެ ނަޒަރުގައި އެންމެ މޮޅު ކުޅުންތެރިޔަކަށް ހުރީ އެކަކު ކަމަށެވެ. އެއީ ވޯލްޑް ކަޕްގެ ތާރީޚުގައި އެންމެ ގިނަ ލަނޑު ޖަހައި، ރެކޯޑު ހަދާފައިވާ ކުޅުންތެރިޔާ ކަމަށް މޮރީނިއޯ ބުންޏެވެ. މޮރީނިއޯ އެ އިޝާރާތް ކުރަނީ މިދިޔަ ޖުލައި މަހު ނިމުނު ވޯލްޑް ކަޕްގައި އެމްބާޕޭ ހެދި ރެކޯޑަށެވެ. ވޯލްޑް ކަޕް ކާމިޔާބު ކުރުމުގެ ފުރުސަތު މިފަހަރު ނުލިބުނު ނަމަވެސް، އެމްބާޕޭ ވަނީ ވޯލްޑް ކަޕްގައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑު ހޯދައިފައި އެވެ. 

މިއަހަރުގެ ބެލެންޑިއޯ އެވޯޑަށް ވާދަކުރާ ކުޅުންތެރިންގެ ތެރޭގައި އިންގްލެންޑުގެ ކެޕްޓަން ހެރީ ކޭން އާއި ސްޕެއިންގެ ރޮޑްރީ އާއި ޕެރިސް ސެއިންޓް ޖާމަން (ޕީއެސްޖީ)ގެ އޮސްމާން ޑެމްބެލޭ އަދި އެ ޓީމުގެ ކްވިޗާ ކްވަރެޝްކޭލިއާ ހިމެނޭނެ ކަމަށް ބެލެވެ އެެވެ. 

ދުނިޔޭގައި ހުރި އެންމެ ތަޖުރިބާކާރު އެއް ކޯޗު މޮރީނިއޯ ބުނީ، ޗެމްޕިއަންސް ލީގު ނުވަތަ ވޯލްޑް ކަޕް ކާމިޔާބު ކުރުމުން ބެލެންޑިއޯ ދޭން ޖެހޭ ކަމަށް ޤަބޫލު ނުކުރާ ކަމަށެވެ. އޭނާ ބުނީ ބެލެންޑިއޯ ދޭ ކުޅުންތެރިޔާ ވާން ޖެހޭނީ، އެ ކުޅުންތެރިޔަކު ރިޓަޔާ ކުރުމުން އޭނާގެ މަތިން އެންމެން ވެސް ހަނދާން ހުންނާނެ ކުޅުންތެރިޔަކަށް ކަމަށެވެ. މިސާލެއްގެ ގޮތުގައި މޮރީނިއޯ ވަނީ މަރަޑޯނާ އާއި ރޮނާލްޑީނިއޯ އާއި ރޮނާލްޑޯ ނަޒާރިއޯ އާއި ކްރިސްޓިއާނޯ ރޮނާލްޑޯ އާއި ލިއޮނަލް މެސީ އަދި ޒިނެދިން ޒިދާން ފަދަ ކުޅުންތެރިންގެ ނަން ހިއްސާކޮށްފަ އެވެ. 

އެއާއެކު މޮރީނިއޯ ބުނީ، ޗެމްޕިއަންސް ލީގު ކާމިޔާބު ކުރި މީހަކަށް ދެންޏާ ބެލެންޑިއޯ ދޭން ޖެހޭނީ ޕީއެސްޖީގެ ކޯޗު ލުއިސް އެންރީކޭ އަށް ކަމަށެވެ. އަދި ވޯލްޑް ކަޕް ކާމިޔާބު ކުރި މީހަކަށް ބެލެންޑިއޯ ދެންޏާ ދޭން ޖެހޭނީ، ސްޕެއިންގެ ކޯޗު ލުއިސް ޑި ލާ ފުއެންޓޭ އަށް ކަމަށް މޮރީނިއޯ ބުންޏެވެ. އެކަން ފާހަގަކޮށް މޮރީނިއޯ ބުނީ، ދުނިޔޭގެ އެންމެ މޮޅު ކުޅުންތެރިޔާ އަށް ވާނީ ވަކި ކަމެއް ފުރިހަމަ ވެގެން ކަމަށާއި އެއީ ޕީއެސްޖީ ނުވަތަ ސްޕެއިންގެ ކުޅުންތެރިޔަކަށް ވާން ނުޖެހޭ ކަމަށެވެ. 

މިއަހަރުގެ ބެލެންޑިއޯ އެވޯޑު އޮންނާނީ އޮކްޓޫބަރު މަހުގެ ތެރޭގައި އެވެ. އެންމެ ފަހުން މިދިޔަ އަހަރުގެ ބެލެންޑިއޯ ކާމިޔާބު ކޮށްފައި ވަނީ ޕީއެސްޖީ އަށް ކުޅެމުން އަންނަ ފްރާންސްގެ ޑެމްބެލޭ އެވެ.