އެމެރިކާގެ މަނަވަރުތަކަށް މިސައިލް ހަމަލާތައް އަރައި ގެއްލުންވި: އައިއާރްޖީސީ
6 ސެޕްޓެމްބަރު 2026 | އާދީއްތަ 04:36އީރާނުގެ ތެޔޮ ޓޭންކަރުތަކަށް އެމެރިކާއިން ދިން ހަމަލާތަކުގެ ބަދަލުހިފުމުގެ ގޮތުން، އެމެރިކާއާ ގުޅުން އޮތް ބައެއް އުޅަނދުތަކަށް އީރާނުން ވަނީ މިސައިލް ހަމަލާތަކެއް ދީފައި. މި ހަމަލާތަކުގައި އެމެރިކާގެ އަސްކަރީ ދެ މަނަވަރަކަށް ގެއްލުން ލިބުނު ކަމަށް އީރާނުން ބުނި ނަމަވެސް، އެމެރިކާގެ ސެންޓްކޮމްއިން ވަނީ އެ އުޅަނދުތައް ސަލާމަތްވެފައިވާ ކަމަށް ބުނެފައި. ދެ ގައުމުގެ ދެމެދުގައި އޮތް ހަމަލާ ބަދަލުކުރުން ހުއްޓާލުމުގެ އެއްބަސްވުން އުވާލުމާ ގުޅިގެން، މަސްރަހު މިހާރު ވަނީ ވަރަށް ބޮޑަށް ނުރައްކާވެފައި
އެމެރިކާގެ ކަނޑުގެ ސިފައިން އޮޕަރޭޓްކުރާ އަސްކަރީ މަތިންދާބޯޓު އުފުލާ މަނަވަރެއް ދަތުރުކުރަނީ | އަނަޑޯލޫ
އެމެރިކާގެ އަސްކަރީ މަތިންދާބޯޓު އުފުލާ މަނަވަރަކަށާއި ޑިސްޓްރޯޔާ މަރުކާގެ މަނަވަރަކަށް ދިން މިސައިލް ހަމަލާތަކެއްގައި އެ އުޅަނދުތަަކަށް ގެއްލުންތަކެއް ލިބުނު ކަމަށް އީރާނުގެ އިސްލާމިކް ރިވޮލޫޝަނަރީ ގާޑު ކޯއިން (އައިއާރްޖީސީ) ބުނެފި އެވެ. އީރާނުގެ ރަސްމީ ނޫސް އޭޖެންސީ، އައިއާރްއެންއޭއިން އާންމުކުރި އައިއާރްޖީސީގެ ބަޔާނެއްގައި، އެމެރިކާގެ މި ދެ މަނަވަރަށް މިސައިލް ހަމަލާ ފޮނުވާލާފައި ވަނީ އެ ގައުމުގެ އޭރޯސްޕޭސް ފޯސްއިން ކަމަށް ވަނީ ބުނެފަ އެވެ. އަދި މި ހަމަލާތަކުގައި އެ ދެ އުޅަނދަށް ވެސް ގެއްލުން ލިބި، ކުރިމަތިލުން ހިނގި ސަރަހައްދު ދޫކޮށް އެ ދެ މަނަވަރު ގޮސްފައިވާ ކަމަށް އައިއާރްޖީސީން ބުނެ އެވެ.
އީރާނުން ބުނީ، ހަމަލާދީފައިވާ އެމެރިކާގެ ދެ މަނަވަރަކީ، އީރާންގެ އާގުބޯޓުފަހަރަށް ފުރައްސާރަކޮށް، އީރާންގެ ބަނދަރުތައް ހިސާރު ކުރުމުގައި ހަރަކާތްތެރިވަމުންދިޔަ ދެ މަނަވަރެވެ. އެމެރިކާގެ އަސްކަރިއްޔާގެ ސެންޓްރަލް ކޮމާންޑުން (ސެންޓްކޮމް) ވަނީ، ދެ މަނަވަރަކަށް އީރާނުން ހަމަލާދީފައިވާ ކަން ކަށަވަރު ކޮށްދީފަ އެވެ. މިއީ، އައިއާރްޖީސީގެ ހަމަލާތަކުގެ ކާމިޔާބީގެ ހެއްކެއް ކަމަށް އެ ލަޝްކަރުން ބުނެ އެވެ. މީގެ އިތުރުން، އެމެރިކާގެ އަސްކަރީ ހަރަކާތްތައް މި ގޮތަށް ކުރިއަށްދާ ނަމަ، އީރާނުގެ ލަޝްކަރުތަކުން މިއަށް ވުރެ "ވަރުގަދަ" ރައްދު ހަމަލާތަކެއް ދޭނެ ކަމުގެ އިންޒާރު ވެސް އެ ގައުމުން ވަނީ ދީފަ އެވެ.
މީގެ ކުރިން ހޮނިހިރު ދުވަހު އައިއާރްޖީސީގެ ކަނޑުގެ ސިފައިން ހާމަކުރި ގޮތުގައި، އީރާނުގެ ތެޔޮ ޓޭންކަރުތަކަށް އެމެރިކާއިން ދިން ހަމަލާތަކުގެ ބަދަލުހިފުމުގެ ގޮތުން، ހޯރްމޫޒް ކަނޑުއޮޅިން ދަތުރުކުރި ތިން ތެޔޮ ޓޭންކަރަކަށާއި އެމެރިކާއާ ގުޅުން އޮތް އެހެން ތިން އުޅަނދަކަށް ވަނީ ހަމަލާދީފަ އެވެ.
ނަމަވެސް، ސަރަހައްދީ ކަނޑުގެ ސަރަހައްދު ބަލަހައްޓަމުން ދިޔަ އެމެރިކާގެ ދެ މަނަވަރަކަށް އީރާނުން ބެލިސްޓިކް މިސައިލް ފޮނުވާލި ނަމަވެސް، އެ ދެ އުޅަނދު ވެސް ހަމަލާތަކުން ސަލާމަތްވެފައިވާ ކަމަށް ސެންޓްކޮމްއިން ވަނީ ބުނެފަ އެވެ. އަދި، މި ހާދިސާގައި އެމެރިކާގެ ސިފައިންގެ ފުރާނައަށް ނުރައްކާވެފައި ނުވާ ކަމަށް ވެސް ސެންޓްކޮމްއިން ބުނެ އެވެ. ރައްދުގައި އިރާނުން ތެޔޮ ބަރުކޮަށްގެން ދަތުރުކުރަމުން ދިޔަ ތިން ޓޭންކަރަކަށް ހަމަލާދީފައިވާނެ ކަމަށް ވެސް ސެންޓްކޮމްއިން ބުނެ އެވެ.
ފެބުރުވަރީ 28 ގައި އިސްރާއީލާ ގުޅިގެން އެމެރިކާއިން އީރާނާ ދެކޮޅަށް ފެށި ޣައިރުޤާނޫނީ ހަނގުރާމައިގެ ދަށުން، އީރާނާއި އެމެރިކާއާ ދެމެދު ބަދަލު ކުރަމުންދާ ހަމަލާތައް ފަހަކަށް އައިސް ވަނީ އިތުރުވެ، ނުރައްކާވެފަ އެވެ. ދެ ފަރާތުން ހަމަލާތައް މެދުކަނޑާލަން ވަގުތީ އެއްބަސްވުމެއްގައި ސޮއިކުރި ނަމަވެސް، އެމެރިކާއިން ވަނީ އެ އެއްބަސްވުން އުވާލައި، އަލުން ހަމަލާތައް ފަށާފަ އެވެ.
މަސްދަރު: އަނަދޯލް އޭޖެންސީ
