އީރާނާ ގުޅުން އޮތް ކަމަށް ބުނެ އެމެރިކާއިން ތުރުކީވިލާތުގެ ބޭންކަކަށް ފިޔަވަޅު އަޅައިފި

އިގްތިސާދީ ގޮތުން އީރާން އެކަހެރިކުރުމަށް އެމެރިކާއިން ކުރަމުންދާ މަސައްކަތުގެ ދަށުން، އެ ގައުމާ ގުޅުން އޮންނަ ކަމަށް ތުހުމަތުކޮށް ތުރުކީގެ ބޭންކަކަށާއި އެ ބޭންކުގެ ސަބްސިޑިއަރީ ކުންފުނިތަކަކަށް އެމެރިކާގެ މާލީ ވުޒާރާއިން ދަތިކުރުމުގެ ފިޔަވަޅު އަޅައިފި އެވެ. މި ފިޔަވަޅުތަކާ އެކު، ތުރުކީވިލާތުގެ 'ގޯލްޑަން ގްލޯބަލް ބޭންކް' އާއި އެ ބޭންކުގެ ދެ ސަބްސިޑިއަރީ ކުންފުނި ވަނީ އެމެރިކާގެ އޮފީސް އޮފް ފޮރިން އެސެޓްސް ކޮންޓްރޯލްގެ (އޯއެފްއޭސީ) "ސްޕެޝަލީ ޑެސިގްނޭޓަޑް ނޭޝަނަލްސް" ލިސްޓުގައި ހިމަނާފަ އެވެ. މީގެ ސަބަބުން އެމެރިކާގެ މާލީ ނިޒާމުގައި މުއާމަލާތު ކުރުމުގެ ފުރުސަތު އެ ބޭންކަށް ވަނީ ބަންދުވެފަ އެވެ.

އެމެރިކާގެ މާލީ ވުޒާރާއިން ގޯލްޑަން ގްލޯބަލް ބޭންކާ ދެކޮޅަށް ފިޔަވަޅު އަޅާފައި ވަނީ، އީރާނުގެ އިސްލާމިކް ރިވޮލޫޝަނަރީ ގާޑް ކޯގެ (އައިއާރްޖީސީ) ގުދުސް ލަޝްކަރަށް އެހީތެރިވުމުގެ ގޮތުން "ދިހަވަރަކަށް މިލިއަން ޑޮލަރުގެ މުއާމަލާތްތައް" ހިންގާފައިވާ ކަމަށް ތުހުމަތުކޮށެވެ. އަދި، އީރާނު ސަރުކާރުގެ ފައިސާ ބޭނުންކޮށްގެން ބައިނަލްއަގްވާމީ މާލީ ނިޒާމުގެ ތެރެއިން މުއާމަލާތު ހިންގުމަށް އެ ބޭންކުން މަގުފަހިކޮށްދީފައި ކަމަށް ވެސް އެމެރިކާގެ މާލީ ވުޒާރާއިން ތުހުމަތު ކުރެ އެވެ. މީގެ އިތުރުން ވޮޝިންގޓަނުން ތުހުމަތުކުރާ ގޮތުގައި، އެ ބޭންކަކީ ރަނާއި ނަގުދު ފައިސާ ބޭނުންކޮށްގެން ޗައިނާއިން ތުރުކީވިލާތަށްއީރާނުގެ ތެލުގެ އާމްދަނީ ބަދަލުކުރުމަށް ޓަކައި ތުރުކީވިލާތުގައި ގާއިމު ކޮށްފައިވާ ބޭންކެކެވެ.

ގޯލްޑަން ގްލޯބަލް ބޭންކުން ވަނީ އެމެރިކާގެ މި ތުހުމަތުތައް ދޮގުކޮށްފަ އެވެ. ހުކުރު ދުވަހު ނެރުނު ބަޔާނެއްގައި އެ ބޭންކުން ވަނީ، އެމެރިކާއިން ކުރާ ތުހުމަތުތަކަށް ބާރުދޭނެ އެއްވެސް މުއާމަލާތެއް އެ ބޭންކުން ހިންގާފައި ނުވާނެ ކަމަށާއި، އޯއެފްއޭސީގެ ނިންމުމުގައި ބަޔާންކޮށްފައިވާ ފަރާތްތަކަކީ އެއްވެސް އިރެއްގައި އެ ބޭންކުގެ ކަސްޓަމަރުންނޫން ކަމަށް ބުނެފަ އެވެ. އަދި، އެ ބޭންކުން އަބަދުވެސް އަމަލުކުރަމުން ދަނީ ތުރުކީވިލާތުގެ އިތުރުން ބައިނަލްއަގުވާމީ ބޭންކިންގ ގަވާއިދުތަކާ އެއްގޮތަށް ކަން ފާހަގަކޮށް، އެމެރިކާގެ މި ނިންމުމާއި ތުހުމަތުތަކާ ދެކޮޅަށް އިއުތިރާޒުކޮށް ގާނޫނީ ގޮތުން ކުރެވެން ހުރި ހުރިހާ މަސައްކަތެއް ކުރާނެ ކަމަށާއި، އެންމެ އަވަސް ފުރުސަތެއްގައި އެކަމާ ގުޅޭ ގާނޫނީ ފިޔަވަޅުތައް އަޅާނެ ކަމަށް ވެސް އެ ބޭންކުން ބުނެ އެވެ.

'އޮޕަރޭޝަން އިކޮނޮމިކް އައުޓްކާސްޓް' އާ މެދު އެމެރިކާ އޮތީ ސީރިއަސްކޮށްކަން މާލީ އިދާރާތަކަށް މިހާރު ވަރަށް ހިތްދަތި ގޮތަކަށް ސާފުވަމުންދާ ކަމަށް، އެމެރިކާގެ މާލީ ވަޒީރު ސްކޮޓް ބެސެންޓް ވިދާޅުވި އެވެ. ޖީ20 ސަމިޓުގެ ހަވާސާގައި އަންގާރަ ދުވަހު ވާހަކަފުޅު ދައްކަވަމުން އޭނާ ވަނީ، އީރާނާ ދެކޮޅަށް ކުރިއަށްގެންދާ އިގްތިސާދީ ކެމްޕޭން ވަރުގަދަކުރުމުގެ ގޮތުން މި ހަފުތާއިން ފެށިގެން ބޭރު ޤައުމުތަކުގެ ބޭންކުތަކާ ދެކޮޅަށް ހަރުކަށި ފިޔަވަޅުތަކެއް އަޅާނެކަން އިޢުލާނު ކުރައްވާފަ އެވެ. މި ފިޔަވަޅުތައް އަމާޒުކުރާނީ، އީރާނުގެ ސަރުކާރަށް މާލީ މުއާމަލާތުތައް ހިންގުމުގައި އެހީތެރިކަން ފޯރުކޮށްދޭ، އަދި އެ ކަމުގައި ބައިވެރިވާ ބޭންކުތަކަށް ކަމަށް އޭނާ ވިދާޅުވި އެވެ. ހުސްވި ހަފުތާގައި ވެސް އެމެރިކާއިން ަނީ މިސްރުގެ ދެވަނައަށް އެންމެ ބޮޑު ބޭންކުން އެކުވެރި އަރަބި އިމާރާތުގައި (ޔޫއޭއީ) މާލީ އަދި ވިޔަފާރީގެ މުއާމަލާތު ހިންގުމަށް ހުރަސް އަޅާފަ އެވެ. އަދި، ބައިނަލްއަގްވާމީ މާލީ ނިޒާމުން އެކަހެރި ކުރުމަށް ފިޔަވަޅުތަކެއް އަޅާފަ އެވެ.

ގޯލްޑަން ގްލޯބަލް ބޭންކާ ދެކޮޅަށް އެމެރިކާއިން އަޅާފައިވާ ފިޔަވަޅުތަކަށް އަލިއަޅުވާލައްވާ ތުރުކީވިލާތުގައި ހުންނަވާ އެމެރިކާގެ ސަފީރު ޓޮމް ބަރާކް ވަނީ، މިއީ ތުރުކީވިލާތުގެ ސަރުކާރާ ދެކޮޅަށް ވޮޝިންގޓަނުން އަޅާފައިވާ ދަތިކުރުމުގެ ފިޔަވަޅެއްގެ ގޮތުގައި ނުބެލުމަށް ގޮވައިލައްވާފަ އެވެ. އެ ފަދަ މޭރުމަކުން ދެކުމަކީ ކުށްހީއެއް ކަމަށް ވެސް އޭނާ ވިދާޅުވި އެވެ. އަދި، ތުރުކީގެ މާލީ ނިޒާމުގެ ދުޅަހެޔޮކަމާ މެދު އެއްވެސް ސުވާލެއް ނެތް ކަމަށާއި، މައްސަލައަކީ ހަމައެކަނި އެއް މުއައްސަސާއަކުން އަމަލުކުރި ގޮތް ކަމަށް ވެސް ވިދާޅުވި އެވެ.