އީރާން ހަނގުރާމައިގެ ސިއްރު މައުލޫމާތުތަކެއް ލީކުވި މައްސަލައިގައި، އެމެރިކާގެ އަސްކަރިއްޔާގެ ޖޮއިންޓް ސްޓާފްގެ ގާތްގަނޑަކަށް 50 މެންބަރަކަށް ދޮގު ހަދާތޯ ބަލާ ޓެސްޓުތަކަކަށް ކުރިމަތިލާން ޖައްސައިފި
5 ސެޕްޓެމްބަރު 2026 | ހޮނިހިރު 09:30އެމެރިކާގެ ހަތިޔާރުގެ ރިޒާވް މަދުވަމުންދާ މައުލޫމާތު ލީކުވި މައްސަލައިގައި ޕެންޓަގަނުން ފުޅާ ތަހުގީގެއް ފަށާފައިވާއިރު، މީގެ ސަބަބުން އަސްކަރިއްޔާގެ ތެރޭގައި ވަނީ ނުތަނަވަސްކަން އުފެދިފައި. މި މައްސަލައާ ގުޅިގެން ވޯ ސެކްރެޓަރީ ޕީޓް ހެގްސެތުގެ ނިންމުންތަކަށް ބޮޑެތި ފާޑުކިޔުންތަކެއް އަމާޒުވެ، އޭނާ މަގާމުން ވަކިކުރުމަށް ބައެއް ސެނެޓަރުން ދަނީ ގޮވާލަމުން
ޕެންޓަގަންގައި ނޫސްވެރިންނާ ބައްދަލު ކުރައްވައި، ޑިފެންސް ސެކްރެޓަރީ ހެގްސެތު ވާހަކަ ދައްކަވަނީ | ރޮއިޓާސް
އީރާނާ ދެކޮޅަށް ކުރަމުންދާ ހަނގުރާމައިގެ ސިއްރު މައުލޫމާތުތަކެއް ލީކުވި މައްސަލައިގައި، އެމެރިކާގެ އަސްކަރިއްޔާގެ ޖޮއިންޓް ސްޓާފްގެ ގާތްގަނޑަކަށް 50 މެންބަރަކު "ޕޮލިގްރާފް" ނުވަތަ ދޮގު ހަދާތޯ ބަލާ ޓެސްޓުތަކަކަށް ޕެންޓަގަނުން ކުރިމަތިލާން ޖައްސައިފި އެވެ. ނިއުޔޯކް ޓައިމްސްއިން ރިޕޯޓްކޮށްފައިވާ ގޮތުގައި، މިއީ މީގެ ކުރިން ދުވަހަކުވެސް ހިންގާފައިނުވާ ފަދަ ބޮޑު ތަހުގީގެކެވެ. މި ތަހުގީގު ފަށާފައިވަނީ އީރާނު ހަނގުރާމައިގެ ތެރޭގައި އެމެރިކާގެ ހަތިޔާރުގެ ރަސްމީ ރިޒާވް މަދުވަމުންދާކަމުގެ މައުލޫމާތު ނޫސްވެރިންނަށް ލިބުނު މައްސަލައިގަ އެވެ.
އެމެރިކާގެ އޮފިޝަލުންނާ ހަވާލާދީ ނިއުޔޯކް ޓައިމްސްއިން ބުނި ގޮތުގައި، މި ޓެސްޓުތައް ކުރިއަށް ގެންގޮސްފައިވަނީ މިދިޔަ އޯގަސްޓް މަހުގެ ތެރޭގަ އެވެ. އެއީ ދުރު ރާސްތާގެ މިސައިލްތަކާއި "ޕެޓްރިއަޓް އިންޓަރސެޕްޓަރ" ފަދަ މުހިންމު ހަތިޔާރުތައް އެމެރިކާގައި މަދުވަމުންދާކަމުގެ ތަފްސީލީ ރިޕޯޓުތަކެއް މީޑިއާތަކުން ފެންމަތިކުރި ދުވަސްވަރެވެ.
މި ތަހުގީގުގައި ޖޮއިންޓް ސްޓާފްގައި ހިމެނޭ އަސްކަރީ އޮފިސަރުންނާއި މަދަނީ މުވައްޒަފުންނާ ސުވާލުކޮށްފައިވަނީ، ސިއްރު މައުލޫމާތުތައް ނޫސްވެރިންނަށް ހިއްސާކުރިތޯ އާއި، ހާއްސަކޮށް އެމެރިކާގެ ހަތިޔާރުގެ ރިޒާވް ހުސްވަމުންދާ މައްސަލައިގައި މައުލޫމާތު ދިނީ ކޮން ބައެއްތޯ ބެލުމަށެވެ.
މި ފުޅާ ތަހުގީގުގެ ބޭނުމަކީ ހަމައެކަނި މައުލޫމާތު ލީކުކުރި މީހުން ހޯދުން ނޫން ކަމަށާއި، މިއީ ކުރިއަށް އޮތް ތަނުގައި އެފަދަ ކަމެއް ކުރަން ބޭނުންވާ އެހެން މީހުންނަށް ދެވޭ އިންޒާރެއް ކަމަށްވެސް ބެލެވެ އެވެ.
މި ތަހުގީގުގެ ބޮޑުމިނަކީ އާދަޔާ ހިލާފު ކަމެކެވެ. ޒަމާނީ ތާރީޚެއްގައި އެމެރިކާގެ އަސްކަރިއްޔާގެ އިސް އޮފިސަރުންތަކެއް މިހާ ބޮޑު މިންވަރަކަށް އެއްފަހަރާ ޕޮލިގްރާފް ޓެސްޓުތަކަކަށް ކުރިމަތިލާން ޖެހިފައެއް ނުވެ އެވެ.
"މިހާ ގިނަ އަދަދެއްގެ، އަދި މިހާ މަތީ ފަންތީގެ އޮފިސަރުންތަކެއް ޕޮލިގްރާފް ޓެސްޓު ކުރި ތަނެއް އަހަރެން ދުވަހަކުވެސް ނުދެކެން،" 2000 އިން 2002 އަށް އެމެރިކާގެ ނޭވީގެ އެންމެ އިސް ލޯޔަރުގެ މަގާމު އަދާކުރެއްވި ރިޓަޔަރޑް ރިއަރ އެޑްމިރަލް ޑޮނަލްޑް ޖޭ. ގޫޓާ ވިދާޅުވި އެވެ. އޭނާ ސިފަކުރެއްވި ގޮތުގައި މިއީ މީގެ ކުރިން ދުވަހަކުވެސް ހިނގާފައިވާ ކަމެއް ނޫނެވެ.
މި ތަހުގީގު ފަށާފައިވަނީ އީރާނާ ދެކޮޅަށް ކުރާ ހަނގުރާމައިގެ ސަބަބުން އެމެރިކާގެ ހަތިޔާރުގެ ރިޒާވް ހުސްވަމުންދާ ގޮތާއި، މި ހަނގުރާމަ ކުރިއަށްދާ ގޮތާ މެދު ސަރުކާރުގެ ތެރޭގައި އުފެދިފައިވާ ކަންބޮޑުވުންތަކާ ގުޅޭ ރިޕޯޓުތައް ބައިނަލްއަގުވާމީ މީޑިއާތަކުން ފަތުރަމުންދާ ދަނޑިވަޅެއްގަ އެވެ.
ރައީސް ޑޮނަލްޑް ޓްރަމްޕް ވަނީ މައުލޫމާތު ލީކުކުރާ މީހުން ހޯދައި، އެމީހުންނާ މެދު ހަރުކަށި ފިޔަވަޅު އެޅުމަށް ސަރުކާރުގެ އޮފިޝަލުންނަށް ބާރުއަޅުއްވާފަ އެވެ. އަދި ހަނގުރާމަ ކުރިއަށްދާ ގޮތަށާއި ހަތިޔާރު މަދުވުމުގެ މައްސަލައަށް ފާޑުކިޔައި މީޑިއާތަކުން ގެނެސްދޭ ރިޕޯޓުތަކަކީ "ގައުމަށް ޣައްދަރުވުން" ކަމަށްވެސް ޓްރަމްޕް ވަނީ ސިފަކުރައްވާފަ އެވެ.
މި ތަހުގީގުތަކާ ގުޅިގެން ޕެންޓަގަނުގެ ތެރޭގައި އެކަކު އަނެކަކަށް އިތުބާރު ނުކުރުމާއި ޝައްކު އުފެދުމުގެ މާހައުލެއް ވަނީ އުފެދިފައެވެ. މިކަމަށް ބާރުދެއްވަނީ ވޯ ސެކްރެޓަރީ (ހަނގުރާމައާ ބެހޭ ވަޒީރު) ޕީޓް ހެގްސެތު ކަމަށް މިހާރުގެ އަދި ކުރީގެ އޮފިޝަލުން ބުނެ އެވެ.
ހެގްސެތު މަގާމާ ހަވާލުވެވަޑައިގަތް ފަހުން، އޭނާއަށް ވަފާތެރި މަދު ބައެއްގެ އެހީގައި، މަދުވެގެން 80 ޖެނެރަލުންނާއި އެޑްމިރަލުން އަދި އެހެނިހެން އިސް އޮފިޝަލުން ވަނީ މަގާމުން ވަކިކޮށް ނުވަތަ އެމީހުންގެ މަގާމުގެ ކުރިއެރުންތަކަށް ހުރަސް އަޅާފަ އެވެ.
މިދިޔަ އަހަރުގެ ކުރީކޮޅުން ފެށިގެން، ހެގްސެތުގެ ލީޑަޝިޕާ ގުޅޭގޮތުން މީޑިއާތަކުން ގެނެސްދޭ ރިޕޯޓުތަކާ ގުޅިގެން ޕެންޓަގަނުން ދަނީ ގިނަ ތަހުގީގުތަކެއް ހިންގަމުންނެވެ. ނަމަވެސް، މިދިޔަ އަހަރު ޔަމަނަށް ދިން ހަމަލާތަކުގެ ސިއްރު މައުލޫމާތުތަކެއް "ސިގްނަލް" ގްރޫޕެއްގައި ހެގްސެތު އަމިއްލައަށް ހާމަކުރެއްވި މައްސަލައިގައި އޭނާއަށް ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ.
މިދިޔަ މެއި މަހުގެ 5 ވަނަ ދުވަހުގެ ފަހުން، އީރާނު ހަނގުރާމައާ ގުޅޭ އެއްވެސް މައުލޫމާތެއް ހެގްސެތު ޕެންޓަގަނުގެ ނޫސްވެރިންނަށް ދެއްވާފައެއް ނުވެ އެވެ. އަދި ނޫސްވެރިން ޕެންޓަގަނަށް ވަނުން ހަނިކުރުމަށްވެސް އޭނާ ވަނީ މަސައްކަތް ކުރައްވާފަ އެވެ.
މީގެ އިތުރުން، އެމެރިކާގެ އަސްކަރިއްޔާއަށް ހާއްސަކޮށްގެން ސަރުކާރުގެ ހަރަދުގައި ހިންގާ "ސްޓާރސް އެންޑް ސްޓްރައިޕްސް" ނޫހުގެ ޕަބްލިޝަރާއި އެޑިޓަރ-އިން-ޗީފް ވެސް މިދިޔަ މަހު ވަނީ މަގާމުން ވަކިކޮށްފަ އެވެ.
އެ ނޫސްވެރިން ބުނާ ގޮތުގައި، އެމީހުން މަގާމުން ވަކިކުރީ "ޔޫއެސްއެސް އަބްރަހަމް ލިންކަން" މަނަވަރުގެ ހާލަތު ގޯސްވަމުންދާ ކަމަށް ރިޕޯޓްކުރުމުން، އެކަމުގެ ބަދަލުހިފުމުގެ ގޮތުންނެވެ.
ޕެންޓަގަނުގެ ލީޑަޝިޕްގެ ތެރޭގައި ބޮޑެތި ހަމަނުޖެހުންތަކެއް ހުރި ކަމުގެ ކަންބޮޑުވުންތައް އިތުރުވަމުން ދިޔަ ނަމަވެސް، ރައީސް ޓްރަމްޕް އަދިވެސް ހުންނެވީ ހެގްސެތުގެ ދިފާއުގަ އެވެ. ޓްރަމްޕް ވިދާޅުވީ ހެގްސެތު ކުރައްވަނީ "ވަރަށް ފުރިހަމަ މަސައްކަތެއް" ކަމަށެވެ.
ނަމަވެސް، ކޮންގްރެސްގައި ހިމެނޭ ރިޕަބްލިކަން ޕާޓީގެ ބައެއް މެންބަރުން މިހާރު ވަނީ ފާޅުގައި ހެގްސެތަށް ފާޑުކިޔަން ފައްޓަވާފަ އެވެ. އަދި އަސްކަރިއްޔާގެ އިސް އޮފިސަރުންނާ މެދު އޭނާ އިހާނެތިކޮށް ކަންތައް ކުރައްވާ ކަމަށް ބުނެ އެ މެންބަރުން ދަނީ ކަންބޮޑުވުން ފާޅުކުރަމުންނެވެ.
"ގައުމަށް ހިދުމަތްކުރާ ކެރޭ ފިރިހެނުންނާއި އަންހެނުންގެ ކަންކަން މިހާ ނާގާބިލުކޮށް ބަލަހައްޓާ ތަނެއް އަހަރެން ދުވަހަކުވެސް ނުދެކެން،" ސެނެޓް އާމްޑް ސާވިސަސް ކޮމިޓީގެ މެންބަރު ސެނެޓަރ ތޮމް ޓިލިސް މި ހަފުތާގައި ސޯޝަލް މީޑިއާގައި ލިޔުއްވާފައިވެ އެވެ. އޭނާ ވަނީ ހެގްސެތުގެ ބަދަލުގައި އެހެން މީހަކު އައްޔަންކުރުމަށް ޓްރަމްޕަށް ގޮވާލައްވާފަ އެވެ.
ޓިލިސް އިތުރަށް ވިދާޅުވީ، ހެގްސެތަކީ ގާބިލު މީހުން ފެނުމުން ބިރުގަންނަ މީހެއް ކަމަށާއި، ގައުމީ ދިފާއާއި ސިފައިންގެ ދުޅަހެޔޮކަމަށް މަސައްކަތް ކުރުމުގެ ބަދަލުގައި އޭނާ އުޅުއްވަނީ ސަގާފީ ހަނގުރާމަތަކެއް (ކަލްޗަރ ވޯސް) އުފެއްދުމުގައި ކަމަށެވެ.
ފާހަގަކޮށްލެވޭ ގޮތުގައި، 2025 ވަނަ އަހަރުގެ ކުރީކޮޅު ހެގްސެތު ވޯ ސެކްރެޓަރީގެ މަގާމަށް އައްޔަންކުރުމަށް ވޯޓު ދެއްވި ސެނެޓަރުންގެ ތެރޭގައި ޓިލިސް ހިމެނިވަޑައިގަންނަވަ އެވެ. އެހެންނަމަވެސް، އޭރުވެސް އޭނާ ވަނީ ހެގްސެތުގެ ނޮމިނޭޝަނާ މެދު ކަންބޮޑުވުން ފާޅުކުރައްވާފަ އެވެ.
