އީރާނުގެ ޚާރްގް ޖަޒީރާ ކައިރިން ބާރުގަދަ ގޮވުންތަކެއްގެ އަޑު އިވިއްޖެ

އީރާނުގެ ތެޔޮ އެކްސްޕޯޓްކުރާ މައި މަރުކަޒު ކަމަށްވާ ޚާރްގް ޖަޒީރާ ކައިރިން ހޮނިހިރު ދުވަހު ބާރުގަދަ ގޮވުންތަކެއްގެ އަޑު އިވިފައިވާ ކަމަށް އެ ގައުމުގެ ސެމީ-އޮފިޝަލް ފާރްސް ނިއުސް އެޖެންސީން ރިޕޯޓްކޮށްފި އެވެ. ނަމަވެސް މި ގޮވުންތައް ގޮވަން މެދުވެރިވި ސަބަބެއް އަދި މިހާތަނަށް ދެނެގަނެވިފައެއް ނުވެ އެވެ.

އީރާނުގެ ދައުލަތާ ގުޅުން އޮންނަ ނޫރު ނިއުސް އިން ރިޕޯޓްކޮށްފައިވާ ގޮތުގައި، އެމެރިކާގެ ސިފައިން ދިން މިސައިލް ހަމަލާއެއް ޚާރްގް އައިލެންޑް ކައިރީގައި އޮތް އީރާނުގެ ތެޔޮ ޓޭންކަރަކަށް އަމާޒުވެފައިވާ ކަމަށް ބުނެ، އެ ސަރަހައްދުގެ މަސްދަރުތަކުން ކަށަވަރުނުވާ ރިޕޯޓްތަކެއް ދަނީ ލިބެމުންނެވެ.

ޚާރްގް ޖަޒީރާގައި ހުރި ފާރްސް ނިއުސް އެޖެންސީގެ ރިޕޯޓަރަކު މައުލޫމާތު ދީފައިވާ ގޮތުގައި، ގަލްފްގެ ތެރެއިން ގޮވުންތަކެއްގެ އަޑު އިވުނު ނަމަވެސް، އެއްވެސް ސަރަހައްދަކުން ދުން އެރުން ފަދަ އަލާމާތެއް ފެންނާކަށް ނެތެވެ.

މި ހާދިސާއާ ގުޅޭގޮތުން ފެތުރެމުންދާ ރިޕޯޓްތަކާ ގުޅިގެން އީރާނުގެ ރަސްމީ އެއްވެސް އިދާރާއަކުން މިހާތަނަށް ވަކި އެއްޗެއް ހާމަކޮށްފައެއް ނުވެ އެވެ.