ހާލަންޑުގެ ލަނޑުން މޮޅުވެ، ސިޓީގެ ރެކޯޑު ކުރިއަށް

އިނގިރޭސި ޕްރިމިއާ ލީގުގައި ކޮވެންޓްރީ ސިޓީއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީ އިން އެ ޓީމުގެ މޮޅުވުމުގެ ރެކޯޑު ދަމަހައްޓައިފި އެވެ.

ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި ކުޅުނު މެޗު އެ ޓީމުން ކާމިޔާބުކޮށްފައި ވަނީ 1-0 އިންނެވެ. މެޗުގައި ސިޓީ އިން ލަނޑު ޖެހީ ފުރަތަމަ ހާާފުގަ އެވެ. 

މެޗު ފަށައިގެން ސިޓީ އިން ރަނގަޅަށް ކުޅެމުންދިޔައިރު، އާލިން ހާލަންޑު ފޮނުވާލި ބާރު ހަމަލާއެއް ކޮވެންޓްރީގެ ގޯލު ކީޕަރު ވަނީ މަތަކޮށްފަ އެވެ. އޭގެ ފަހުން ސިޓީގެ ރަޔަން ޗާކީ އަށް ލިބުނު ފުރުސަތެއްގައި އޭނާ ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއާ އެވެ.

މެޗުގައި ސިޓީ އިން ލަނޑު ޖަހައި ލީޑު ނެގީ 26 ވަނަ މިނެޓުގައި އެވެ. އެއީ ސިޓީގެ އެންޓޮއިން ސެމެންޔޯ ހުރަސްކޮށްދިން ބޯޅައެއް، ބޮލުން ޖަހައި ގޯލަށް ވައްދާލައިގެން ހާލަންޑު ޖެހި ލަނޑެކެވެ. އެ ލަނޑާ އެކު ހާލަންޑު ވަނީ އޭނާގެ ކުލަބު ކެރިއަރުގައި 300 ލަނޑު ހަމަކޮށްފަ އެވެ.

އޭގެ ފަހުން ސިޓީ އަށް ލީޑު ފުޅާކޮށްދޭން ވެސް ހާލަންޑަށް ވަނީ ފުރުސަތު ލިބިފަ އެވެ. ހާލަންޑަށް ލިބުނު ދެ ފުރުސަތެއްގައި ވެސް އޭނާ ފޮނުވާލި ބޯޅަ ކޮވެންޓްރީގެ ކީޕަރު މަތަކުރި އެވެ. މެޗުގައި ކޮވެންޓްރީ އަށް ވެސް ވަނީ ލަނޑު ޖަހައި ނަތީޖާ ހަމަހަމަ ކުރާނެ ފުރުސަތު ލިބިފަ އެވެ. 

މެޗުން މޮޅުވެ ސިޓީ އިން ވަނީ، މިހާތަނަށް ލީގުގައި އެ ޓީމުން ކުޅެފައިވާ ތިން މެޗުން ވެސް މޮޅުވެފަ އެވެ. ލީގުގައި ދެން ސިޓީ އަށް އޮތީ ރަށުން ބޭރުގައި ވާދަވެރި މެންޗެސްޓަރ ޔުނައިޓެޑާ ދެކޮޅަށް ކުޅޭ މެޗެވެ. އޭގެ ކުރިން ޔުއެފާ ޗެމްޕިއަންސް ލީގުގައި ސިޓީ އިން ޕޯޓޯއާ ދެކޮޅަށް ކުޅޭނެ އެވެ.