އެންމެ ފަހުން ރޮޑްރީ ހޯދުމުގެ ޑީލް ބާސެލޯނާ އިން ކާމިޔާބުކޮށްފި

މެންޗެސްޓަރ ސިޓީ އަށް ކުޅެމުން އަންނަ ސްޕެއިންގެ ރޮޑްރީ ހޯދުމަށް ބާސެލޯނާ އިން ކުރި މަސައްކަތް ކާމިޔާބު ކޮށްފައިވާ ކަމަށް ރިޕޯޓުތައް ބުނެފި އެވެ.

ރޮޑްރީ ހޯދުމަށް ބާސެލޯނާ އިން އެންމެ ފުރަތަމަ ހުށަހެޅި ދެ ބިޑު ވެސް ސިޓީ އިން ރިޖެކްޓުކޮށްފައިވާއިރު، ބާސެލޯނާ އިން ހުށަހެޅި ތިން ވަނަ ބިޑު އެ ކުލަބުން ވަނީ ޤަބޫލުކޮށްފައި އެވެ. ސްޕެއިންގެ މީޑިއާތަކުގައި ބުނެފައިވާ ގޮތުން، ހޯމަ ދުވަހު ބާސެލޯނާ އަށް ދަތުރު ކުރުމުގެ ހުއްދަ މިހާރު ވަނީ ރޮޑްރީ އަށް ދީފައި އެވެ. 

ބާސެލޯނާ އަށް ބަދަލުވުމުގެ ކުރިން ފުރިހަމަ ކުރަން ޖެހޭ މެޑިކަލްގެ ކަންކަން ކުރިއަށް ގެންދިޔުމުގެ އިންތިޒާމު ރާވަމުން އަންނަ ކަމަށާއި، އެއަށް ފަހު ބާސެލޯނާގެ އެއްބަސްވުމުގައި ރޮޑްރީ ސޮއި ކުރާނެ ކަމަށް ބުނެފައިވެ އެވެ. މީޑިއާތަކުގައި ބުނެފައިވާ ގޮތުން، ބާސެލޯނާ އާއެކު ރޮޑްރީ ސޮއި ކުރާނީ ހަތަރު އަހަރު ދުވަހުގެ އެއްބަސްވުމެއްގައި އެވެ. އެހެންކަމުން، 2030 ވަނަ އަހަރުގެ ޖޫން މަހުގެ ނިޔަލަށް އޭނާ ބާސެލޯނާގައި ހުންނާނެ އެވެ. 

ބާސެލޯނާ އިން ވަނީ ރޮޑްރީ ހޯދުމަށް ގާތް ގަނޑަކަށް 60 މިލިއަން ޔޫރޯގެ ބިޑެއް ހުށަހަޅައިފަ އެވެ. މިއީ އައު ސީޒަނަށް ތައްޔާރުވުމުގެ ގޮތުން ބާސެލޯނާ އިން ހޯދާ އެންމެ މުހިންމު ކުޅުންތެރިޔާ އަށް ވާނެ އެވެ. ބާސެލޯނާގެ ކުރިން ރޮޑްރީ ހޯދުމަށް ރެއާލް މެޑްރިޑުން ޝައުޤުވެރިކަން ގެންގުޅުނު ނަމަވެސް، ފަހުން ރޮޑްރީ ބޭނުންވީ ބާސެލޯނާ އަށް ބަދަލުވުމަށެވެ. 

ރޮޑްރީ ވަނީ ސިޓީގައި ހޭދަކޮށްފައިވާ ހަތް ސީޒަންގެ ތެރޭގައި މޮޅު ކުޅުމެއް ދައްކައިފަ އެވެ. އޭނާ ވަނީ އެ ޓީމަށް ކުޅެދީފައިވާ 298 މެޗުގައި 28 ލަނޑު ޖަހައިފަ އެވެ. އަދި ސިޓީ އާއެކު އޭނާ ވަނީ 13 ތައްޓެއް ވެސް ކާމިޔާބު ކޮށްފައި އެވެ. ސްޕެއިން އާއެކު މިއަހަރުގެ ފީފާ ވޯލްޑް ކަޕް ރޮޑްރީ ކާމިޔާބު ކުރިއިރު، މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ވެސް އޭނާ އެވެ.