ފަހު ވަގުތު ބޯންމައުތު ބަލިކޮށް، ސިޓީ އިން ފެށުން ރަނގަޅުކޮށްފި

އައު ސީޒަންގެ އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން ފަހު ވަގުތު މޮޅުވެ، މެންޗެސްޓަރ ސިޓީ އިން ލީގުގެ ފެށުން ރަނގަޅުކޮށްފި އެވެ.

ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކޮށްފައި ވަނީ 2-1 އިންނެވެ. މެޗުގައި ބޯންމައުތުން ލަނޑު ޖަހައި ކުރި ހޯދާފައި ވަނިކޮށް، ސިޓީ އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން 26 ވަނަ މިނެޓުގައި ބޯންމައުތުން ވަނީ ސިޓީ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ މާކަސް ޓަވާނިއާ އެވެ. އޭގެ ފަހުން މެޗުގެ ނަތީޖާ ހަމަހަމަ ކުރުމަށް ފުރަތަމަ ހާފުގައި ސިޓީ އަށް ފުރުސަތު ލިބުނު ނަމަވެސް، ފުރުސަތުގެ ބޭނުން ކުރެވޭ ގޮތެއް ނުވި އެވެ. 

މެޗުގެ ނަތީޖާ ހަމަހަމަ ކުރުމަށް ސިޓީ އިން ކުރި މަސައްކަތް ކާމިޔާބު ކުރެވުނީ، މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށެވެ. އެ ލަނޑު ސިޓީ އަށް ޖަހައިދިނީ މާކް ގުއެހީ އެވެ. އެއީ ރަޔަން ޗާކީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި، މެޗުން ސިޓީ މޮޅުވީ ޖޮސްކޯ ގްވާޑިއޯލާ ޖެހި ލަނޑުންނެވެ. އެއީ ވެސް ޗާކީ ތަނަވަސްކޮށްދިން ފުރުސަތެއްގައި ގްވާޑިއޯލާ ޖެހި ލަނޑެކެވެ.

މެޗުން މޮޅުވެ ސިިޓީ އިން ލީގުގެ ފެށުން ރަނގަޅު ކޮށްފައިވާއިރު، މިއީ ސިޓީގެ ކޯޗުކަމާ ހަވާލުވި އެންޒޯ މަރެސްކާގެ އިރުޝާދުގެ ދަށުން އެ ޓީމު ޕްރިމިއާ ލީގުގައި ކުޅުނު ފުރަތަމަ މެޗެވެ. ލީގުގައި ސިޓީގެ ދެ ވަނަ މެޗުގައި ރަށުން ބޭރުގައި ނުކުންނާނީ ކްރިސްޓަލް ޕެލަސްއާ ދެކޮޅަށެވެ.