ދެ ވަނަ މެޗުގައި ޗެލްސީ އިން ބްރައިޓަން ވެސް ބަލިކޮށްފި

އިނގިރޭސި ޕްރިމިއާ ލީގުގެ އައު ސީޒަންގައި ޗެލްސީ އިން ކުޅުނު ދެ ވަނަ މެޗުގައި ބްރައިޓަން ބަލިކޮށް، އެ ޓީމުގެ ފޯމު ދަމަހައްޓައިފި އެވެ.

ޗެލްސީގެ އަމިއްލަ ދަނޑުގައި އާދީއްތަ ދުވަހުގެރޭ ކުޅުނު މެޗު އެ ޓީމުން ކާމިޔާބުކޮށްފައި ވަނީ 4-3 އިންނެވެ. މެޗުގެ ފުރަތަމަ ހާފުގައި ޗެލްސީ އިން ތިން ލަނޑު ޖެހިއިރު، ބްރައިޓަން އިން ވެސް ލަނޑެއް ޖެހި އެވެ. ދެ ވަނަ ހާފުގައި ޗެލްސީ އިން އަނެއް ލަނޑު ޖެހިއިރު، ބްރައިޓަން އިން ދެ ލަނޑު ޖެހި އެވެ. 

މެޗު ފަށައިގެން ހަތަރު ވަނަ މިނެޓުގައި ޗެލްސީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ރޮމެއޯ ލަވިއާ އެވެ. އޭގެ ދިހަ މިނެޓު ފަހުން ޕެޑްރޯ ނެޓޯ ވަނީ ޗެލްސީގެ ދެ ވަނަ ލަނޑު ޖަހައި ލީޑު ފުޅާކޮށްފަ އެވެ. މެޗުގައި ޗެލްސީގެ ތިން ވަނަ ލަނޑު 32 ވަނަ މިނެޓުގައި ޖެހީ ޔާއޯ ޕެޑްރޯ އެވެ.

ފުރަތަމަ ހާފުގެ 35 ވަނަ މިނެޓުގައި ބްރައިޓަންގެ ފުރަތަމަ ލަނޑު ޖެހީ މަލިކް ޔަލްކޫޔީ އެވެ. އޭގެ ފަހުން ދެ ވަނަ ހާފުގެ 63 ވަނަ މިނެޓުގައި ބްރައިޓަންގެ ދެ ވަނަ ލަނޑަކީ ޗެލްސީގެ ނެޓޯ އަތުން ބައި ކޮޅަށް ވަތް ލަނޑެކެވެ. އޭގެ ފަހުން މެޗުގެ 72 ވަނަ މިނެޓުގައި ކޯލް ޕާމާ ވަނީ ޗެލްސީގެ ހަތަރު ވަނަ ލަނޑު ޖަހައި ލީޑު ފުޅާކޮށްފަ އެވެ. މެޗުގައި ބްރައިޓަންގެ ފަހު ލަނޑު މެޗުގެ އިތުރު ވަގުތުގައި ޖެހީ ޕަސްކަލް ގްރޮބް އެވެ.

މި މެޗުގައި ޗެލްސީގެ ގޯލު ބަލަހައްޓާފައި ވަނީ، އެސްޓަން ވިލާ ދޫކޮށް އެ ޓީމަށް ބަދަލުވި އެމިލިއާނޯ މާޓިނޭޒް އެވެ. މި މޮޅާ އެކު ޗެލްސީ ވަނީ މިހާތަނަށް ކުޅެފައިވާ ދެ މެޗުން ހަ ޕޮއިންޓު ހޯދައިފަ އެވެ. ލީގުގައި ޗެލްސީ އަށް ދެން އޮންނާނީ ރަށުން ބޭރުގައި ޗެމްޕިއަން އާސެނަލްއާ ދެކޮޅަށް ކުޅޭ މެޗެވެ.