ޗެމްޕިއަން އާސެނަލް އަށް ވަރުގަދަ ފެށުމެއް

އިނގިރޭސި ޕްރިމިއާ ލީގުގެ އައު ސީޒަންގެ ފުރަތަމަ މެޗުގައި ކަވެންޓްރީ ސިޓީ ބަލިކޮށް، އެންމެ ފަހުގެ ޗެމްޕިއަން އާސެނަލް އިން ވަރުގަދަ ފެށުމެއް ހޯދައިފި އެވެ.

ހުކުރު ދުވަހުގެ ރޭ ދަންވަރު އާސެނަލްގެ އެމިރޭޓްސް ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކޮށްފައި ވަނީ 3-0 އިންނެވެ. މެޗުގެ ފުރަތަމަ ހާފުގައި އާސެނަލް އިން ދެ ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގައި އެވެ.

މެޗު ފަށައިގެން 15 ވަނަ މިނެޓުގައި އާސެނަލް އަށް ލީޑު ނަގައިދިނީ ކައި ހަވާޓްޒް އެވެ. އެއީ ރިކާޑޯ ކަލަފިއޯރީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ އަށް މިނެޓު ފަހުން ބުކަޔޯ ސަކާ ވަނީ އާސެނަލްގެ ދެ ވަނަ ލަނޑު ޖަހައި ލީޑު ފުޅާކޮށްފައި އެވެ.

އާސެނަލް އިން މެޗުގައި ރަނގަޅަށް ކުޅުނުއިރު، އެ ޓީމުން ވަނީ އިތުރު ލަނޑު ޖަހަން ވެސް ފުރުސަތުތަކެއް ހޯދައިފަ އެވެ. މެޗުގެ ދެ ވަނަ ހާފު ފަށައިގެން ހަތަރު ވަނަ މިނެޓުގައި އާސެނަލްގެ ތިން ވަނަ ލަނޑު ޖެހީ މާޓިން އޮޑެގާޑް އެވެ. އެ ލަނޑު ޖަހަން އޮޑެގާޑް އަށް ފުރުސަތު ތަނަވަސްކޮށްދިނީ ބެން ވައިޓް އެވެ.

މޮޅާ އެކު އާސެނަލް އިން އައު ސީޒަން ފެށިއިރު، ލީގުގައި އެ ޓީމުގެ ދެ ވަނަ މެޗުގައި ރަށުން ބޭރުގައި ނުކުންނާނީ އެސްޓަން ވިލާއާ ދެކޮޅަށެވެ. އަދި ތިން ވަނަ މެޗުގައި އަމިއްލަ ދަނޑުގައި ނުކުންނާނީ ޗެލްސީއާ ދެކޮޅަށެވެ. 

މިފަހަރުގެ ސީޒަން ފެށުމުގެ ގޮތުން ކުޅުނު ޗެރިޓީ ޝީލްޑު މެޗުގައި އާސެނަލް އިން ވަނީ ވާދަވެރި މެންޗެސްޓަރ ސިޓީ ބަލިކޮށް، ޝީލްޑު ކާމިޔާބު ކޮށްފައި އެވެ.