އަދަދު ނޫހުން ހުރަސްއެޅުމުން މިއަދުގެ ނޫސްވެރިންގެ ބައްދަލުވުން ކެންސަލްކޮށްފި
5 ސެޕްޓެމްބަރު 2026 | ހޮނިހިރު 13:47'އަދަދު' ނޫހުގެ ނޫސްވެރިއަކު ހުއްދަނެތި ޕީއެސްއެމްގެ ސްޓޫޑިއޯއަށް ވަދެ، އެތަނުން ނުކުތުމަށް އިންކާރުކުރުމާ ގުޅިގެން މިއަދު ބާއްވަން އޮތް ތަރުޖަމާނުގެ ނޫސްވެރިންގެ ބައްދަލުވުން ކެންސަލްކޮށްފި. މި އަމަލުގެ ސަބަބުން ޓީވީ ޝެޑިއުލަށް ބުރޫއަރާތީ ބައްދަލުވުން ކުރިއަށް ނުގެންދަން ނިންމީ ކަމަށާއި ޒިންމާދާރު ނޫސްވެރިންނާއެކު ވަރަށް އަވަހަށް މި ބައްދަލުވުން ބާއްވާނެ ކަމަށް ސަރުކާރުން ބުނޭ
ޕްރެސް ކޮނަފަރެންސް ކެންސަލްވުމާއި ގުޅިގެން މުންދު ވާހަކަދައްކަވަނީ | ރާއްޖެ އެމްވީ
މިއަދު ހަވީރު ބޭއްވުމަށް ހަމަޖެހުނު ރައީސުލްޖުމްހޫރިއްޔާގެ އޮފީހުގެ ތަރުޖަމާނުގެ ނޫސްވެރިންގެ ބައްދަލުވުން އަދަދު ނޫހުން ހުރަސްއެޅުމާއި ގުޅިގެން ކެންސަލްކުރަން ޖެހުނުކަން ޗީފް ގަވަރންމަންޓް ސްޕޯކްސްޕަރސަން މުހައްމަދު ހުސައިން ޝަރީފް (މުންދު) ހާމަކުރައްވައިފި އެވެ.
މީޑިއާތަކާ މުއާމަލާތުކޮށް، ނޫސްވެރިންގެ ސުވާލުތަކަށް ޖަވާބުދިނުމަށް ބާއްވަމުން އަންނަ "ޕްރެސް ވިތް ސްޕޯކްސްޕަރސަން" ސިލްސިލާގެ ބައްދަލުވުން ތާވަލުކުރެވިފައި އޮތީ މިއަދު ހަވީރު 4:00 ގައި ޕީއެސްއެމްގެ ސްޓޫޑިއޯގަ އެވެ. މި ބައްދަލުވުމަށް ދައުވަތު ފޮނުވާފައިވަނީ ރައީސުލްޖުމްހޫރިއްޔާގެ އޮފީހުގެ ރަސްމީ މީޑިއާ ގްރޫޕް މެދުވެރިކޮށް، ކަނޑައެޅިފައިވާ އުސޫލުގެ ދަށުން ސްކްރީންކޮށްފައިވާ ނޫސްވެރިންނަށެވެ.
މިކަމާ ގުޅޭގޮތުން ތަފްސީލު ދެއްވަމުން މުންދު ވިދާޅުވީ، މީގެ ދެމަހެއްހާ ދުވަސް ކުރިން 'އަދަދު' ނޫހުން ރައީސް އޮފީހުގައި ހިންގި ގާނޫނާ ޚިލާފު އަމަލުތަކަކާއި، އެ ފަރާތާ ގުޅޭ ޖިނާއީ މައްސަލަތަކެއް ބަލަމުންދާތީ، އެ މައްސަލަ ވަކިގޮތަކަށް ނިމެންދެން އެ ނޫސް ރަސްމީ މީޑިއާ ގްރޫޕުން އުނިކޮށްފައިވާ ކަމަށެވެ. އަދި މިވޭތުވެދިޔަ މުއްދަތުގައި ރައީސް، ވަޒީރުން ނުވަތަ ތަރުޖަމާނު ބޭއްވެވި އެއްވެސް ނޫސްވެރިންގެ ބައްދަލުވުމެއްގައި ވެސް އެ ނޫހުގެ ނޫސްވެރިން ބައިވެރިވެފައި ނުވާކަން އޭނާ ފާހަގަކުރެއްވި އެވެ.
މުންދު ވިދާޅުވީ މިއަދުގެ ޕްރެސް ކޮންފަރެންސަށް 20 ވަރަކަށް ނޫސްވެރިން ރަސްމީކޮށް ނަން ނޯޓުކުރި ކަމަށެވެ. ނަމަވެސް، ކުރިން އެ ގްރޫޕުގައި އޮތުމުން ނަންބަރު އެނގިފައި އޮތް 'އަދަދު' ނޫހުން ނޫސްވެރިޔާ ލީވާންގެ ނަން ފޮނުވި ނަމަވެސް، ރައީސް އޮފީހުން އެ މެސެޖު ބަލައިގެންފައި ނުވާ ކަމަށް ވިދާޅުވި އެވެ. އަދި ބައްދަލުވުން ފެށެން ކައިރިވެފައިވަނިކޮށް، ހުއްދައަކާ ނުލައި ލީވާން ޕީއެސްއެމްގެ ސްޓޫޑިއޯއަށް ވަދެ، އެތަނުން ނުކުތުމަށް އިންކާރުކޮށްފައިވާ ކަމަށް ވެސް މުންދު ވިދާޅުވި އެވެ.
މި އަމަލުގެ ސަބަބުން ޕްރެސް ކޮންފަރެންސް ފެށުން ލަސްވެ، ވަގުތު ފާއިތުވަމުން ދިޔުމާއި، އަދި ވަގުތުން ދުރަށްދައްކާ ޕްރޮގްރާމަކަށް ވުމުން ޓީވީ ޝެޑިއުލަށް ބުރޫއަރާތީ، މިއަދުގެ ޕްރެސް ކޮންފަރެންސް ކުރިއަށް ނުގެންދިޔުމަށް އަޅުގަނޑު ނިންމީމުހައްމަދު ހުސައިން ޝަރީފް (މުންދު)
މި ހާދިސާގެ ސަބަބުން ޕީއެސްއެމް އަދި އެހެނިހެން މީޑިއާތަކުގެ ވަގުތު ގެއްލިގެން ދިޔުމުން އެކަމާ ނިހާޔަތަށް މައާފަށް އެދިވަޑައިގަންނަވާ ކަމަށް މުންދު ވިދާޅުވި އެވެ.
މުންދު އިތުރަށް ވިދާޅުވީ، ވަރަށް އަވަހަށް ރަސްމީ އަދި ޒިންމާދާރު ނޫސްވެރިންނާ އެކު އެހެން މާހައުލެއްގައި މި ޕްރެސް ކޮންފަރެންސް ބާއްވާނެ ކަމަށެވެ. އަދި ހަގީގަތް އޮޅުވާލައި ފިތުނަ އުފެއްދުމަށް ފުރުސަތު ނުދެވޭނެ ކަމަށާއި މި ހިނގައިދިޔަ ކަންކަމާ ގުޅިގެން ޕީއެސްއެމްއިން އަޅަންޖެހޭ ފިޔަވަޅުތައް އަޅާނެ ކަމަށް ވެސް އޭނާ ވިދާޅުވި އެވެ.
މި މައްސަލައިގައި ދޮގު މައުލޫމާތު ފެތުރުމުގެ ކުރިން، ކަން ހިނގި ގޮތުގެ ހަގީގަތް ރައްޔިތުންނަށް ސާފުކޮށްދިނުމަކީ މި ވަގުތުން ވަގުތަށް މި މައުލޫމާތު ހިއްސާކުރި މައިގަނޑު ބޭނުން ކަމުގައި ވެސް ތަރުޖަމާނު މުންދު ވިދާޅުވި އެވެ.
އަދަދުގެ ނޫސްވެރިޔާ ޕީއެސްއެމްގެ ހޯލަށް ވަދެވޭނީ ޕީއެސްއެމް އިން ހުއްދަލިބިގެންނެވެ. ނަމަވެސް މިކަމާ ބެހޭގޮތުން މުންދު އެއްޗެއް ވިދާޅުވެފައެއް ނުވެ އެވެ.
