ގެގް އަމުރު ނިސްބަތްވާ މައްސަލައިގައި ދައުވާ އުފުލާފައިވާ ފިޔާޒުގެ ފަރާތުން އެ އަމުރު ހައިކޯޓުގައި އިސްތިއުނާފު ކުރުމުން މައްސަލަ ބަލައިގެންފި
އަދަދު ނޫހުގެ "އައިޝާ" ޑޮކިއުމަންޓްރީއާ ގުޅިގެން ނެރުނު ގެގް އޯޑަރު އިސްތިއުނާފު ކުރުމަށް ނޫސްވެރިންގެ ޖަމިއްޔާއިން ހުށަހެޅި މައްސަލަ، އެއީ މައްސަލައިގެ ޚަޞްމަކަށް ނުވާތީ ހައިކޯޓުން ވަނީ ބޭރުކޮށްލާފައި. އެހެންކަމުން، މި މައްސަލައިގައި ދައުވާ ލިބޭ ހުސައިން ފިޔާޒު މޫސާގެ ފަރާތުން އެ އަމުރު އިސްތިއުނާފު ކުރުމުން ހައިކޯޓުން މިހާރު ވަނީ އެ މައްސަލަ ބަލައިގެންފައި.
"އައިޝާ" ޑޮކިއުމެންޓްރީ އާ ގުޅިގެން ބުދަ ދުވަހު ޖިނާއީ ތުހުމަތު ތަކެއް ކޮށް ފުލުހަށް ހާޒިރު ކުރި އަދަދު ނޫހުގެ ސީއީއޯ ހުސައިން ފިޔާޒު މޫސާ އަދި އެ ނޫހުގެ އެޑިޓަރު ހަސަން މުހައްމަދު. އެއް ފަރާތެއްގަ ގާނޫނީ ވަކީލު އަލީ ހުސެއިން. | ރާއްޖެ އެމްވީ
އަދަދު ނޫހުން ނެރުނު ޑޮކިއުމަންޓްރީއާ ގުޅިގެން ކޯޓުން ނެރެފައިވާ ގެގް އޯޑަރ އަމުރުގެ އިސްތިއުނާފު ހައިކޯޓުން ބޭރުކޮށްލާފައިވާތީ، ގެގް އަމުރު ނިސްބަތްވާ މައްސަލައިގައި ހިމެނޭ ހުސައިން ފިޔާޒު މޫސާގެ ފަރާތުން އެ އަމުރު ހައިކޯޓުގައި އިސްތިއުނާފު ކުރުމުން މައްސަލަ ބަލަިއގެންފިއެވެ.
މި އަމުރު ހައިކޯޓުގައި ފުރަތަމަ އިސްތިއުނާފު ކުރީ ނޫސްވެރިންގެ ޖަމިއްޔާ (މޯލްޑިވްސް ޖަރނަލިސްޓް އެސޯސިއޭޝަން) އިންނެވެ. ނަމަވެސް އާދިއްތަ ދުވަހު ހައިކޯޓުން ވަނީ މި މައްސަލަ ބޭރުކޮށްލާފަ އެވެ. ސަބަބެއްކަމަށް ބަޔާންކޮށްފައި އޮތީ ނޫސްވެރިންގެ ޖަމިއްޔާއަކީ ގެގް އަމުރު ނިސްބަތްވާ މައްސަލައިގައި ހިމެނޭ ބައެއް ނޫންކަމަށްވާތީ މައްސަލަ ބަލައިގަނެވެން ނެތް ކަމަށެވެ.
މި މައްސަލައިގައި ދައުވާ އުފުލާފައިވަނީ އަދަދު އޮންލައިން ނޫހުގެ އެޑިޓަރ އިން ޗީފް އަދި ސީއީއޯ ހުސައިން ފިޔާޒް މޫސާއާއި އެޑިޓަރ ހަސަން މުހައްމަދުގެ މައްޗަށެވެ.
އެހެންވެ މި މައްސަލައިގައި ދައުވާ އުފުލާފައިވާ ފިޔާޒުގެ ފަރާތުން އާދިއްތަ ދުވަހު ވަނީ މި އަމުރު ހައިކޯޓުގައި އިސްތިއުނާފު ކޮށްފައެވެ. އަދި ހައިކޯޓުން މިހާރު ވަނީ މައްސަލަ ބަލައިގެންފައެވެ.
އައިޝާ ޑޮކިއުމެންޓްރީގެ މައްސަލައާ ގުޅިގެން އަދަދު އޮންލައިން ނޫހުގެ އެޑިޓަރ އިން ޗީފް އަދި ސީއީއޯ ހުސައިން ފިޔާޒް މޫސާ އާއި އެޑިޓަރ ހަސަން މުހައްމަދުގެ މައްޗަށް އުފުލާފައިވާ ޤަޒުފުގެ ކުށުގެ ދައުވާގެ ޝަރީއަތްތައް ކުރިއަށް ގެންދަނީ އާންމުކޮށް ހުޅުވާނުލައި ސިއްރުކޮށްގެންކަންވެސް ފާހަގަކޮށްލެވެއެވެ.
