އަދަދު ނޫހުގެ ނޫސްވެރިން ޖަލަށްލި މައްސަލަ އެޗްއާރްސީއެމް އިން ތަހުގީގު ކުރަނީ
ކޯޓު އަމުރަކާ ހިލާފުވެގެން "އަދަދު" ނޫހުގެ ދެ ނޫސްވެރިން ޖަލަށްލި މައްސަލައާއި މުޒާހަރާތަކުން ހައްޔަރުކުރި މީހުންގެ ހާލަތު އެޗްއާރްސީއެމްއިން ބަލަން ފަށައިފި. ނޫސްވެރިކަމުގެ މިނިވަންކަމަށް ހުރަސްއެޅޭ ކަމަށް ބުނެ ގިނަ ބަޔަކު ކަންބޮޑުވުން ފާޅުކުރަމުންދާ މި ދަނޑިވަޅުގައި، އެ ކޮމިޝަނުން ވަނީ ބަންދުގައި ތިބި ހައްހަރީންނާ ބައްދަލުކޮށް ތަހުގީގު ކުރަންޖެހޭ ކަންކަން ފާހަގަކޮށްފަ. ނޫސްވެރިން ވަގުތުން މިނިވަންކުރުމަށް ގޮވާލާ މާލޭގައި ސިލްސިލާ މުޒާހަރާތަކެއް ވެސް ދަނީ ކުރަމުން.
ޖަލަށްލި އަދަދުގެ ދެ ނޫސްވެރިން ލީވާން އަލީ ނާސިރާއި، ޝަހުޒާން މުހައްމަދު | އަދަދު
އަދަދު" އޮންލައިންގެ ދެ ނޫސްވެރިން ކަމަށްވާ މުހައްމަދު ޝަހުޒާން އާއި ލީވާން އަލީ ނަސީރު ޖަލަށްލާފައިވާ މައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބަލަމުން ދާ ކަމަށް އެ ކޮމިޝަނުން ބުނެފި އެވެ.
އެޗްއާރްސީއެމް އިން ބުނީ ކްރިމިނަލް ކޯޓުން 2026 މެއި 10 ވަނަ ދުވަހު ނެރުނު އަމުރާ ޚިލާފުވުމާގުޅިގެން، ބަންދުކޮށް ޙުކުމް ތަންފީޒު ކުރަމުންދާ، އަދަދު ނޫހުގެ ދެ ނޫސްވެރިންނާއި، މިހާރު މާލޭގައި ކުރިއަށްދާ މުޒާހަރާތަކުން ދިވެހި ފުލުހުންގެ ޚިދުމަތުގެ ބެލުމުގެ ދަށަށް ގެނެސް ބަންދުކޮށްފައިވާ މީހުންނާ އެ ކޮމިޝަނުން ބައްދަލުކޮށް، އެމީހުންގެ ޙާލު ބަލާފައިވާ ކަމަށެވެ.
އެޗްއާރްސީއެމް އިން ބުނީ އެ ކޮމިޝަނުގެ މި ޒިޔާރަތްތަކުގައި، އެ ފަރާތްތަކުން ފާހަގަކުރި ކަންކަމުގެ މައްޗަށް ރިއާޔަތްކޮށް ތަހުގީގު ކުރަންޖެހޭ ކަންކަން ތަހުގީގު ކުރުމަށް ނިންމާފައިވާ ކަމަށެވެ.
ކްރިމިނަލް ކޯޓުން، ނޫސްވެރިޔާ ލީވާން 10 ދުވަހަށް ޖަލަށްލުމަށް ހުކުމް ކޮށްފައިވަނީ އަދަދު ނޫހުގައި ލިޔުނު ޚަބަރަކާއި ގުޅިގެންނެވެ. އަދި ޝަހުޒާން 15 ދުވަހަށް ޖަލަށްލުމާއެކު 25،000 ރުފިޔާއިން ޖޫރިމަނާ ކޮށްފައިވަނީ ރައީސް މުއިއްޒުއާ ސުވާލުކުރި މައްސަލައަކާ ގުޅިގެންނެވެ.
މި ދެ ނޫސްވެރިން ޖަލަށް ލުމާއި ގުޅިގެން ރާއްޖެ އާއި ބޭރުގެ ގިނަ ޖަމިއްޔާތަކާއި، ސިޔާސީ ޕާޓީތަކުންގެ އިތުރުން ކުރީގެ ރައީސުންނާއި، ސިޔާސީ އިސް ބޭފުޅުން އަދި ގިނަ އަދަދެއްގެ އާއްމު ރައްޔިތުން ދަނީ މިކަމުގެ ކަންބޮޑުވުންފާޅު ކޮށް އެ ދެ ނޫސްވެރިން ވަގުތުން މިނިވަން ކުރުމަށް ގޮވާލަމުންނެވެ. އަދި މިއީ މިނިވަން ނޫސްވެރިކަމާއި، ހިޔާލުފާޅު ކުރުމުގެ މިނިވަންކަމަށް މިސަރުކާރުން ދިން ވަރަށް ވަރުގަދަ ހަމަލާއެއް ކަމަށާއި، ރައްޔިތުންނަށް ބިރު ދެއްކުމަށްޓަކައި ކުރާ ކަމެއް ކަމަށް ގިނަ ބަޔަކު ދަނީ ބުނަމުންނެވެ.
ޖަލަށްލާފައިވާ ނޫސްވެރިން ދޫކޮށްލަން ގޮވާލާ މާލޭގައި ސިލްސިލާކޮށް މުޒާހަރާ ކުރަމުންދާއިރު މި މުޒާހަރާގެ ތެރެއިން ބައެއް މީހުން ހައްޔަރުކޮށް ބަންދުގެ މުއްދަތު ޖަހާފައިވެ އެވެ.
