ޖަލަށް ލާއިފަވާ ނޫސްވެރިން ދޫކޮށްލުމަށް ގޮވާލާ އެމްޑީޕީ އިން ކުރި އިހުތިޖާޖަށް ފުލުހުން ހުރަސް އަޅައިފި
ނޫސްވެރިންގެ މިނިވަންކަމަށް ގޮވާލައި އެމްޑީޕީން ސިލްސިލާކޮށް ކުރިއަށްގެންދާ އިހުތިޖާޖުތަކުގެ ތެރެއިން އާދީއްތަ ދުވަހުގެ ރޭ މާލޭގައި ކުރި މުޒާހަރާއަށް ފުލުހުން ވަނީ ހުރަސްއަޅައި، ބާރުގެ ބޭނުންކޮށްގެން ރޫޅާލާނެ ކަމުގެ އިންޒާރު ދީފަ. ހަރުގެ ކުރިމަތީގައި ކުރިއަށްދިޔަ މި ހަރަކާތުގައި ހައްޔަރުކޮށްފައިވާ ނޫސްވެރިންނާއި އެކި މުޒާހަރާތަކުން ހައްޔަރުކުރި މީހުން ދޫކޮށްލުމަށް ގޮވާލާފައިވާއިރު، ކުރީގެ ތިން ރައީސުންގެ މަންދޫބުން ބާއްވާ ބައްދަލުވުމަށްފަހު ހޯމަ ދުވަހުގެ ރޭ އިތުރު ވަރުގަދަ މުޒާހަރާ އެއް ބާއްވާނެކަން އެ ޕާޓީން ވަނީ އިއުލާންކޮށްފަ.
އާދިއްތަ ދުވަހުގެ ރޭ އެމްޑީޕީ އިން ކުރި މުޒާހަރާ އަށް ފުލުހުން ވަނީ ހުރަސް އަޅާފަ | ރާއްޖެ އެމްވީ
ޖަލަށްލާފައިވާ "އަދަދު" ނޫހުގެ ނޫސްވެރިންކަމަށްވާ މުހައްމަދު ޝަހުޒާން އާއި ލީވާން އަލީ ނާސިރު ދޫކޮށްލަން ގޮވާލާ އެމްޑީޕީ އިން އާދީއްތަ ދުވަހުގެ ރޭ މާލޭގައި ކުރި މުޒާހަރާ އަށް ފުލުހުން ހުރަސްއަޅައިފި އެވެ.
މި އިހުތިޖާޖަކީ ނޫސްވެރިންގެ މިނިވަންކަމަށް ގޮވާލާ އެ ޕާޓީން ސިލްސިލާކޮށް ކުރިއަށްގެންދާ ހަރަކާތްތަކުގެ ބައެކެވެ.
އެމްޑީޕީގެ މި މުޒާހަރާ ފަށާފައިވަނީ ޗާންދަނީ މަގުގައި ހުންނަ އެ ޕާޓީގެ ހަރުގެ ސަރަހައްދުންނެވެ. ހަރުގޭގައި ބޭއްވި ބައްދަލުވުމަކަށްފަހު މުޒާހަރާގެ ބައިވެރިން ޗާންދަނީ މަގަށް ނިކުމެ، މަޖީދީ މަގާ ދިމާލަށް ދިއުމަށް މަސައްކަތް ކުރުމުން، ގިނަ އަދަދެއްގެ ފުލުހުން ވަނީ އެ ސަރަހައްދު ބަންދުކޮށް މުޒާހަރާގެ ބައިވެރިން ކުރިއަށް ދިއުމަށް ހުރަސްއަޅާފަ އެވެ.
މުޒާހަރާގެ ބައިވެރިން ވަނީ ހަރުގެ ކުރިމަތީ ތިބެ ޖަލަށްލާފައިވާ ނޫސްވެރިން ވަގުތުން މިނިވަން ކުރުމަށް ގޮވާލާ އަޑުއުފުލާފަ އެވެ. މީގެ އިތުރުން، ނޫސްވެރިން މިނިވަން ކުރުމަށް ގޮވާލާ އެމްޑީޕީ އިން މިފަހުން ބޭއްވި އެކި މުޒާހަރާތަކުގައި ފުލުހުންގެ ބެލުމުގެ ދަށަށް ގެންދިޔަ ހުރިހާ އެންމެން ދޫކޮށްލުމަށް ވެސް މުޒާހަރާގެ ބައިވެރިން ވަނީ ގޮވާލާފަ އެވެ.
އިހުތިޖާޖުގެ ބައިވެރިން އެކި ފަހަރު މަތިން މަގުތަކަށް ނިކުމެ އަޑުއުފުލަން މަސައްކަތް ކުރި ނަމަވެސް، ފުލުހުން ވަނީ އެ ފުރުސަތު ނުދީ ހުރަސްއަޅާފަ އެވެ. އަދި ފުލުހުން ބާރުގެ ބޭނުންކޮށްގެން މުޒާހަރާ ރޫޅާލާނެ ކަމުގެ އިންޒާރު ތަކުރާރުކޮށް ދީފައިވާކަން ފާހަގަކުރެވެ އެވެ.
އާދީއްތަ ދުވަހުގެ ރޭގެ މުޒާހަރާ ނިންމާލަމުން އެމްޑީޕީ އިން ވަނީ ހޯމަ ދުވަހުގެ ރޭ އިތުރު ވަރުގަދަ މުޒާހަރާއެއް ބާއްވާނެ ކަމަށް އިއުލާން ކޮށްފަ އެވެ. މި މުޒާހަރާ ބޭއްވުމަށް ހަމަޖެހިފައިވަނީ ކުރީގެ ތިން ރައީސުން ކަމަށްވާ ރައީސް މުޙައްމަދު ނަޝީދު، ރައީސް އިބްރާހީމް މުޙައްމަދު ސޯލިހް އަދި ރައީސް ޢަބްދުﷲ ޔާމީން ޢަބްދުލް ޤައްޔޫމްގެ މަންދޫބުންގެ މެދުގައި ބާއްވާ ފުރަތަމަ ބައްދަލުވުމަށް ފަހުގަ އެވެ.
