ބައެއް ނޫސްވެރިންނަކީ "ގަޓަރ ޕްރެސް" ކަމަށް ވިދާޅުވެ ރައީސް ނޫސްވެރިންނަށް މަލާމަތް ކުރައްވައިފި
ސިންގަޕޫރަށް ކުރެއްވި ދަތުރުފުޅާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބުދެއްވަމުން، ބައެއް ނޫސްވެރިންނަކީ ނޫސްވެރިކަމުގެ ނަމުގައި އުޅޭ ސިޔާސީ އެކްޓިވިސްޓުން ކަމަށް ރައީސް ޑރ. މުއިއްޒު ސިފަކުރައްވައިފި. ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެ ފަހަތަށް ގޮސްފައިވާއިރު، ސަރުކާރުން ދަނީ ނޫސްވެރިންނަށް ހުރަސްއަޅައި މަލާމާތުކުރަމުން. އެގޮތުން ނޫސްވެރިންނަށް ބިރުދެއްކުމާއި، ބައެއް ނޫސް އިދާރާތަކަށް ފުލުހުން ވަދެ ތަކެތި ގެންދާ މައްސަލަ ވެސް ބައިނަލްއަގްވާމީ އިދާރާތަކުގެ ސަމާލުކަމަށް ވަނީ އައިސްފަ.
ރައީސް ޑރ. މުހައްމަދު މުއިއްޒު: ހޯމަ ދުވަހުގެ ބައްދަލުވުމުގައި ރައީސް ވަނީ ނޫސްވެރިންނަށް މަލާމާތް ކުރައްވާފަ | ރައީސް އޮފީސް
ނޫސްވެރިންނަކީ "ގޮސިޕް" ކުރާ ބައެއް ކަމަށް ވިދާޅުވުމަށްފަހު ބައެއް ނޫސްވެރިންނަކީ "ގަޓަރ ޕްރެސް" ކަމަށް ވިދާޅުވެ އަނެއްކާ ވެސް ރައީސް ޑރ. މުހައްމަދު މުއިއްޒު ނޫސްވެރިންނަށް މަލާމަތް ކުރައްވައިފި އެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ވަނީ އިދިކޮޅު ސިޔާސީ ފަރާތްތަކުން އެމަނިކުފާނު އެންމެ ފަހުން ސިންގަޕޫރަށް ކުރެއްވި ދަތުރުފުޅާ ގުޅިގެން ކުރައްވާ ތުހުމަތުތަކާ ގުޅޭގޮތުން ސުވާލު ކޮށްފަ އެވެ.
އިދިކޮޅު ސިޔާސީ ފަރާތްތަކުން ދައްކާ ވާހަކަތަކާ ގުޅިގެން ކުރެވުނު ސުވާލަށް ޖަވާބުދެއްވަމުން އެންމެ ފުރަތަމަވެސް ރައީސް ވަނީ ނޫސްވެރިންނަށް މަލާމާތް ކުރައްވާފަ އެވެ. އަދި ވިދާޅުވީ ބައެއް ނޫސްވެރިންނަކީ ނޫސްވެރިކަމުގެ ލޭބަލް އަޅުވައިގެން އުޅޭ ބައެއް ކަމަށާ ހަގީގަތުގައި އެއީ ސިޔާސީ އެކްޓީވިސްޓުން ކަމަށް ވެސް އެމަނިކުފާނު ވިދާޅުވި އެވެ.
ތީގަ ދަންނަވަން އޮތީ އެއްވެސް ތެދެއް ނެތޭ. އަޅުގަނޑަށް ވެސް ސޯޝަލް މީޑިއާ އިން ތިކަހަލަ ވީޑިއޯ އެއް ފެނިފަ އެބައޮތް. ފެނުނު ގަޑީގަ ވެސް އަޅުގަނޑު ހިތަށް އެރި އަނެއްކާ ކިހިނެއް ބާއޭ މިވަނީ. ރަސޫލު ޒަމާނުގައި އުޅޭނޫންތޯ ވާހަކަ ކިޔާ މީހުން. އެ ވާހަކަ ކިޔުން. ދެން ހަމަ ލާރިކޮޅެއް ދިނީމަ ވާހަކަ ކިޔަންވީ. ހަމަ ކޮންމެ މީހަކު ދިނީމަ. ހަމަ ކޮންޓިނިއުކޮށް. އަނެއްކާ ވާހަކަ ހުއްޓުވައިފިއްޔާ އެބަ ބުނޭ ނުހުއްޓުވާށޭ. އެ ޒަމާން އަނެއްކާ އައިބާއޭ އަޅުގަނޑު ހިތަށް އަރާ. އަޅުގަނޑުމެންގެ ތެރޭގައި އެކަން ހިނގާ ނޫންތޯ. އަޅުގަނޑުމެންގެ ތެރޭގައި އުޅޭ ބައެއް "ގަޓަރ ޕްރެސް" މި ނޫސްވެރިން ލޭބަލް އަޅުވައިގެން، ނޫސްވެރިންގެ ލޭބަލް އަޅުވައިގެން ތިބޭ ޕޮލިޓިކަލް އެކްޓިވިސްޓުން އެކަން ކުރޭ. އެހެންވީމާ އަނެއްކާ އެ ޒަމާން އައި ބާއޭ އަޅުގަނޑު ހިތަށް އަރަނީ.ރައީސް ޑރ. މުހައްމަދު މުއިއްޒު
ރައީސް ތަކުރާރު ކޮށް ނޫސްވެރިންނަށް މަލާމާތް ކުރައްވައި، އެއީ ދަށް ބައެއްގެ ގޮތުގައި ސިފަކުރެއްވުމަށް މަސައްކަތް ކުރައްވަމުން ގެންދަވާ އިރު މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ނޫސްވެރިންނަކީ ގޮސިޕް ކުރާ ބައެއް ކަމަށް ވެސް ވިދާޅުވެފައި ވެއެވެ. ރައީސް ގެ އިތުރުން ސަރުކާރުގެ ތަރުޖަމާނު މުޙައްމަދު ހުސައިން ޝަރީފް (މުންދު) ވަނީ ނޫސްވެރިންނަކީ ފިތުނަ އުފައްދާ ބައެއްގެ ގޮތުގައި ވެސް ސިފަ ކުރައްވާފަ އެވެ.
ރައީސް މުއިއްޒުގެ މި ސަރުކާރުގައި ނޫސްވެރިކަމުގެ މިނިވަންކަމަށް ހުރަސްއަޅުއްވާ ކަމަށް ގިނަ ބަޔަކު ބުނަމުންދާއިރު ދުނިޔޭގެ ނޫސްވެރިކަމުގެ މިނިވަންކަމުގެ އިންޑެކްސްގައި ދިވެހިރާއްޖެ ވަނީ 4 ދަރަޖަ ފަހަތަށް ސޮއްސާލާފަ އެވެ.
މި ސަރުކާރުން ތަކުރާރުކޮށް ނޫސްވެރިކަމުގެ މިނިވަންކަމަށް ހުރަސްއަޅަމުން ދާއިރު ''އަދަދު'' ނޫހަށް ފުލުހުން ވަދެ، އެތަނުގައި ހުރި ތަކެތި ގެންދިއުމާއި، ނޫސްވެރިން ހައްޔަރު ކޮށް ޖަލަށް ލުމުގެ އިތުރުން ނޫސްވެރިން ފުރުން މަނާކޮށް، ބޮޑެތި ދައުވާ ވެސް ވަނީ އުފުލާފަ އެވެ.
