އީރާން ހަނގުރާމަ ނިމުނުކަން އިޢުލާނުކުރަން ޓްރަމްޕް ވިސްނަވަނީ

އީރާނާ ދެކޮޅަށް ކުރަމުންދާ ހަނގުރާމަ ނިމުމަކަށް އައިސްފައިވާކަން އިޢުލާނުކުރެއްވުމާ މެދު އެމެރިކާގެ ރައީސް ޑޮނަލްޑް ޓްރަމްޕް މަޝްވަރާ ކުރައްވަމުން ގެންދަވާ ކަމަށް ރިޕޯޓުތައް ބުނެފި އެވެ. އެމެރިކާގެ ނޫސް، ދި ވޯލް ސްޓްރީޓް ޖާނަލްއިން ބުދަ ދުވަހު ރިޕޯޓުކޮށްފައިވާ ގޮތުގައި، ރައީސް ޓްރަމްޕް މި ގޮތަށް ވިސްނަވަމުން ގެންދަވަނީ މެދުއިރުމަތީގައި ތިބި އެމެރިކާ ސިފައިންގެ ޚިދުމަތުގެ މުއްދަތު ޕެންޓަގަންއިން އިތުރުކޮށްފައިވާ ދަނޑިވަޅެއްގަ އެވެ

އެ ނޫހުން ރިޕޯޓުކޮށްފައިވާ ގޮތުގައި، ހަނގުރާމަ ނިމުމަކަށް އައިކަން އިޢުލާނުކުރެއްވުމާ ގުޅޭގޮތުން ޓްރަމްޕް ވަނީ އޭނާގެ އިސް މުޝީރުންނާ މަޝްވަރާ ކުރައްވާފަ އެވެ. އަދި، މި ފަދަ ނިންމެވުމަކަށް  ޓްރަމްޕް ތާއީދުކުރައްވާ ކަމަށް ވެސް އެ ނޫހުން ބުނެ އެވެ. ޓްރަމްޕް ޤަބޫލުފުޅުކުރައްވާ ގޮތުގައި، އީރާނަށް ކުރިމަތިކޮށްފައިވާ އިޤްތިޞާދީ ހަރުކަށި ފިއްތުންތަކުގެ ސަބަބުން، އެ ޤައުމުގެ ނިއުކްލިއާ ޕްރޮގްރާމް ހުއްޓައިލުމަށް ނުވަތަ އެ ޤައުމުގެ ސަރުކާރު އިނދަޖެހުމަށް މަޖުބޫރުވާނެ އެވެ.

އީރާނުގެ އިގްތިސާދުގެ މައިބަދަ ކަމަށްވާ ތެލާއި، މުދާ އުފުލުމާއި، ވައިގެ ދަތުރުފަތުރާއި، ރަނާއި، ޓެކްނޮލޮޖީގެ އިތުރުން ޑިޖިޓަލް މުދަލަށް އަމާޒުކޮށްގެން 'އޮޕަރޭޝަން އިކޮނޮމިކް އައުޓްކާސްޓް' ގެ ނަމުގައި އެމެރިކާއިން ވަނީ މިދިޔަ ހަފުތާގައި ހާއްސަ އޮޕަރޭޝަނެއް ފަށާފަ އެވެ.

ހަނގުރާމަ ނިމުނުކަން އިޢުލާނުކުރުމުގެ މަޝްވަރާތައް ސިއްރިއްޔާތުގައި ކުރިއަށްދިޔަ ނަމަވެސް، ޕެންޓަގަންއިން ދަނީ މެދުއިރުމަތީގައި ތިބި ސިފައިންގެ ޚިދުމަތުގެ މުއްދަތު އިތުރު ކުރަމުންނެވެ. މިއީ، މި ހަނގުރާމަ އަންނަ އަހަރުގެ ތެރެއަށް ވެސް ދެމިގެން ހިނގައިދާނެ ކަމުގެ ނިޝާނެއް ކަމަށް ބެލެވެ އެވެ. އަދި، ޓްރަމްޕަށް އަސްކަރީ ގޮތުން ބޭނުންފުޅުވާ ފުރުސަތުތައް ފަހިކޮށްދިނުމުގެ ގޮތުން، އެމެރިކާގެ 50،000 ސިފައިންނާއި 19 އަސްކަރީ މަނަވަރު މިހާރު ވެސް އެ ސަރަހައްދުގައި އެބައޮތް އިރު، މީގެ ތެރޭގައި އަސްކަރީ މަތިންދާބޯޓު އުފުލާ ދެ މަނަވަރާއި، ގައިޑެޑް މިސައިލް ހަރުކޮށްފައިވާ 13 ޑިސްޓްރޯޔަރު ހިމެނެ އެވެ.