އީރާން ހަނގުރާމައާ މެދު އިސްރާއީލް އިން ކަންބޮޑުވެ، ބިރު ގަންނާކަށް ނުޖެހޭނެ: ޓްރަމްޕް

އީރާން އާއެކު ހިނގަމުންދާ ހަނގުރާމަ އަލުން ފެށިދާނެތީ އެކަމާ އިސްރާއީލް އިން ކަންބޮޑުވާން ނުޖެހޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވީ އިސްރާއީލުގެ ނޫސް އެޖެންސީއެއް ކަމަށްވާ "ކާން" އަށް ދެއްވި ފޯނު އިންޓަވިއުއެއްގައި އެވެ.

މި އިންޓަވިއުގައި ވާހަކަ ދައްކަވަމުން ޓްރަމްޕް ވިދާޅުވީ، އީރާންގެ މައްސަލައިގައި އިސްރާއީލް އިން ބިރުގަންނަން ޖެހޭ އެއްވެސް ސަބަބެއް ނެތް ކަމަށެވެ. އަދި އެމެރިކާގެ ރައީސް އަކީ އޭނާ ކަމަށް ވާތީ، އެ މައްސަލަ ހައްލު ކުރައްވައި، ހުރިހާ ކަމެއް ބަލަހައްޓަވާނެ ކަމުގެ ފުރިހަމަ ޔަޤީންކަން ޓްރަމްޕް ވަނީ އިސްރާއީލް އަށް ދެއްވާފައި އެވެ.

ޓްރަމްޕް މިފަދަ ޔަޤީން ކަމެއް ދެއްވާފައި މިވަނީ، ކުރިއަށް އޮތް ޔަހޫދީންގެ ބަންދު ދުވަސް ތަކުގެ ތެރޭގައި އީރާން އިން ހަމަލާއެއް ދީފާނެ ކަމުގެ ބިރު ބޮޑުވެފައިވާ ދަނޑިވަޅެއްގައި އެވެ. މިކަމާ ގުޅިގެން އިސްރާއީލްގެ ޑިފެންސް މިނިސްޓަރު އިސްރާއީލް ކާޓްޒް ބުދަ ދުވަހު ވިދާޅުވީ، އަންނަ ހަފުތާގައި ފެށޭ ޔަހޫދީންގެ ޗުއްޓީ ދުވަސްވަރު އީރާން އިން ހަމަލާއެއް ދީފި ނަމަ، ވަރަށް ވަރުގަދަ ރައްދެއް ދިނުމަށް އިސްރާއީލް އިން އޮތީ ތައްޔާރަށް ކަމަށެވެ.

މެދުއިރުމަތީގެ މަސްރަހު ނުތަނަވަސްވެފައިވާ މި ދަނޑިވަޅުގައި، ޓްރަމްޕްގެ މި ވާހަކަ ތަކަކީ އިސްރާއީލްގެ ސަލާމަތާއި ރައްކާތެރިކަމަށް އެމެރިކާ އިން ދޭ އަހައްމިއްޔަތު ހާމަކޮށްދޭ ކަމެއްގެ ގޮތުގައި މަސްރަހު ދިރާސާކުރާ ފަރާތްތަކުން ދެކެ އެވެ.

އީރާން އާއި އިސްރާއީލްއާ ދެމެދު އޮތް ނުތަނަވަސްކަން ބޮޑުވެފައިވާއިރު، އެމެރިކާގެ ރައީސްގެ ހައިސިއްޔަތުން އެ މައްސަލައިގެ ތެރެއަށް ޓްރަމްޕް ސީދާ ވެދެވަޑައިގަންނަވާނެ ކަމުގެ އިޝާރާތެއް މި ވަނީ ދެއްވާފައި އެވެ.

މިއަހަރުގެ ފެބްރުވަރީ މަހުގެ ތެރޭގައި އެމެރިކާ އާއި އިސްރާއީލް އިން އީރާން އަށް ދިން ހަމަލާ ތަކުގެ ރައްދުގައި، އީރާން އިން ވަނީ އިސްރާއީލް އާއި އެމެރިކާާގެ މުހިންމު އަމާޒު ތަކަށް ވަރުގަދަ ހަމަލާ ތަކެއް ދީފައި އެވެ. އެ ހަމަލާ ތަކުގެ ސަބަބުން އިސްރާއީލް އަށް އެތައް ގެއްލުންތަކެއް ވެފައިވާއިރު، ފަހުން އިސްރާއީލް އިން ވަނީ އެ ހަނގުރާމަ އިން ނިކުމެފައި އެވެ.