ކެނެޑާގެ ޒުވާން ކެޑޭޓުންނަށް "ބޮޑީ-ޝޭމްކޮށް" ފުރައްސާރަކުރުމުން ހެގްސެތަށް ފާޑުކިޔުން އަމާޒުވެއްޖެ

އެމެރިކާގެ ޑިފެންސް ސެކްރެޓަރީ ޕީޓް ހެގްސެތު، ކެނެޑާގެ ޒުވާނުންގެ ކެޑޭޓް ޕްރޮގްރާމުގެ ބައިވެރިންނަށް މަލާމާތްކުރާ ފަދަ ގޮތަކަށް ސޯޝަލް މީޑިއާގައި ކުރެއްވި ޕޯސްޓަކާ ގުޅިގެން ކެނެޑާގެ އޮފިޝަލުންގެ ފާޑުކިޔުން އޭނާއަށް އަމާޒުވެއްޖެ އެވެ. ހެގްސެތު ހިއްސާކުރައްވާފައި ވަނީ ކެނެޑާގެ ތަމްރީނުދޭ ގޮފީގެ ސޯޝަލް މީޑިއާ އެކައުންޓަކުން ނަގާފައިވާ، އިންސްޓްރަކްޓަރެއްގެ އަތުން އެވޯޑެއް ހާސިލުކުރާ ޒުވާން އަންހެން ކެޑޭޓެއްގެ ފޮޓޯއެކެވެ. ކެނެޑާގެ ދިދައެއްގެ އިމޯޖީއަކާއެކު "މިއީ ހަގީގަތަކީ" މިހެން ލިޔުއްވައި އޭނާ ކުރެއްވި މި ޕޯސްޓަކީ، އެ ދެ މީހުންގެ ސިފައަށް މަލާމާތްކޮށް އަދި ކުޑައިމީސްކޮށް ކެނެޑާގެ އަސްކަރިއްޔާގެ އަގުވައްޓާލުމަށް ކުރެއްވި ކަމެއް ކަމަށް ވަނީ ބެލެވިފަ އެވެ.

ކެނެޑާގެ ޑިފެންސް މިނިސްޓަރު ޑޭވިޑް މެކްގިންޓީ ވިދާޅުވީ، ހެގްސެތު ކުރެއްވި ޕޯސްޓަކީ އޭނާ ފުރުއްވާ މަގާމުގެ ގަދަރާއި ކަރާމާތާ ނުބައްދަލު، ދަށު ދަރަޖައިގެ އަމަލެއް ކަމަށެވެ. އެމެރިކާއާއި ކެނެޑާއާ ދެމެދު ވިޔަފާރީގެ ބޮޑެތި މައްސަލަތަކެއް އުފެދި، ބަހުގެ ހަމަލާތައް ބަދަލުކުރަމުންދާ މި ދަނޑިވަޅުގައި، ރައީސް ޑޮނަލްޑް ޓްރަމްޕްގެ ސަރުކާރުން އަބަދު ވެސް ތުހުމަތުކުރަމުން ދަނީ ކެނެޑާއަކީ އެ ގައުމުގެ ދިފާއަށް ޓަކައި އެމެރިކާގެ އަސްކަރީ ބާރަށް ބަރޯސާވާ ގައުމެއްގެ ގޮތުގަ އެވެ.

ހެގުސެތުގެ ޕޯސްޓާއި ޓްރަމްޕްގެ ސަރުކާރުގެ އޮފިޝަލުން ދެއްވަމުންދާ މި ފަދަ އެހެނިހެން ހަމަލާތަކާ ގުޅޭގޮތުން ސުވާލުކުރުމުން، ކެނެޑާގެ ބޮޑުވަޒީރު މާކް ކާނީ ވިދާޅުވީ، ވިޔަފާރީގެ މަޝްވަރާތައް އަލުން ފެށޭނީ "އެމެރިކާ މީހުން މީމްތައް ހެދުމާއި، މަލާމާތްކުރުމާއި، ވަރުގަދަ ބައެއްކަން ދައްކަން އުޅުން ހުއްޓާލައި، ސީރިއަސްކަމާއެކު މަޝްވަރާތަކަށް އައުމުން" ކަމަށެވެ.

ޕެންޓަގަންއިން ބުނެފައި ވަނީ ހެގްސެތު ކުރެއްވި ޕޯސްޓުން އޭގެ މާނަ ވަރަށް ސާފުކޮށް އެނގެން އޮތް ކަމަށެވެ. ކެނެޑާގެ ގައުމީ ކެޑޭޓް ޕްރޮގްރާމަކީ އަސްކަރިއްޔާގެ ބެލުމުގެ ދަށުން 12 އަހަރާއި 18 އަހަރާ ދެމެދުގެ ޒުވާނުންނަށް ލީޑަޝިޕް އަދި ހުނަރު ދަސްކޮށްދިނުމަށް ހިންގާ ޕްރޮގްރާމެކެވެ.

މި ޕްރޮގްރާމަށް އެހީތެރިކަން ފޯރުކޮށްދޭ މަދަނީ ޖަމިއްޔާއެއް ކަމަށްވާ 'އާމީ ކެޑޭޓް ލީގް އޮފް ކެނެޑާ' އިން ނެރުނު ބަޔާނެއްގައި، ކެޑޭޓުން ހޯދާ ކާމިޔާބީތަކަށް ފުރައްސާރަކޮށް އޮންލައިންކޮށް ކުރާ އެ ފަދަ ފުރައްސާރަތައް ހަރުކަށި އިބާރާތުން ވަނީ ކުށްވެރިކޮށްފަ އެވެ. އެ ޖަމިއްޔާއިން ބުނީ، އަމިއްލަ ނަފްސު އިސްލާހުކޮށް މުޖުތަމައަށް ޚިދުމަތްކުރުމަށް މަސައްކަތްކުރާ ޒުވާނުންނަށް އަމާޒުކޮށް އިހާނެތި ބަސްތައް ބުނުމަކީ ބަލައިގަނެވޭނެ ކަމެއް ނޫން ކަމަށެވެ.

އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ކޮންގްރެސްގެ އަޑުއެހުމެއްގައި ވާހަކަދައްކަވަނީ | ރޮއިޓާސް

ކެނެޑާގެ ބްރޯޑްކާސްޓަރު ސީބީސީއަށް ދެއްވި އިންޓަވިއުއެއްގައި، ކެނެޑާގެ އަސްކަރިއްޔާގެ އެންމެ އިސް ކޮމާންޑަރު ޖެނެރަލް ޖެނީ ކެރިގްނަން ވިދާޅުވީ، މި ހާދިސާގައި ފުރައްސާރަ އަމާޒުވި ކެޑޭޓުންނާ ވާހަކަފުޅު ދައްކަވަމުންދާ ކަމަށާއި، މި ކަމުގައި އަމަލުކުރާނެ ގޮތަކާ މެދު އެ ކެޑޭޓުންގެ ލަފާ ހޯއްދަވަމުންދާ ކަމަށެވެ.

ކެނެޑާގެ އެހެން އޮފިޝަލުން ވެސް ވަނީ މިކަމާ މެދު ކަންބޮޑުވުން ފާޅުކުރައްވާފަ އެވެ. އޭގެ ތެރޭގައި، ކެނެޑާގެ ވާރނަން ސިޓީގެ ކޮންޒަވެޓިވް މެންބަރެއް ކަމަށްވާ އަދި ކުރީގެ އަސްކަރީ ރިޒާވިސްޓެއް ކަމަށްވާ ސްކޮޓް އެންޑަސަން ހިމެނިވަޑައިގަންނަވަ އެވެ. އޭނާ ހެގްސެތަށް އަމާޒުކުރައްވައި ވިދާޅުވީ، ހެގްސެތު ހުންނެވި މަގާމުގެ މަސްއޫލިއްޔަތާއި އަދަބުވެރިކަން އޭނާގެ ކިބައިގައި ނެތް ކަމަށެވެ. "މިލިއަނުން މީހުންގެ ކުރިމަތީގައި، ހަނގުރާމައިގައި ބައިވެރިނުވާ ކެނެޑާގެ ދެ އަންހެނުންނަށް ގަސްދުގައި މަލާމާތްކޮށް ލަދުގަންނަވާލަން ތި ނިންމި ނިންމުމާ މެދު އޭނާ ލަދުގަންނަން ޖެހޭނެ،" އެންޑަސަން ވިދާޅުވި އެވެ.

މީގެ އިތުރުން، ދެ ގައުމުގެ އިގްތިސާދާއި، ދިފާއީ ކަންކަމާއި ސަގާފަތް ވަނީ ވަރަށް ބޮޑަށް ލާމެހިފައި ކަމަށާއި، ނަމަވެސް އެއީ ތަފާތު ދެ ގައުމެއް ކަމަށް އޭނާ ވިދާޅުވިއެވެ. އަދި، ކެނެޑާ ރައްޔިތުންނާއި އެމެރިކާ މީހުންގެ މެދުގައި އެއްވެސް މައްސަލައެއް ނެތް ނަމަވެސް، ހެގްސެތުގެ އެ އަމަލާ މެދު މައްސަލަ އެބައޮތް ކަމަށް އޭނާ ވިދާޅުވި އެވެ. މީގެ އިތުރުން، ބައެއް މުހައްލިލުންނާއި ކެނެޑާގެ ރައްޔިތުން ވަނީ ހެގްސެތު އެ މީހުންގެ ހަށިގަނޑުގެ ބައްޓަމަށް ފާޑުކިޔައި "ބޮޑީ ޝޭމް" ކޮށްފައިވާ ކަމަށް ތުހުމަތުކޮށްފަ އެވެ.

ކެނެޑާއާއި އެމެރިކާއާ ދެމެދު ކުރިއަށްދިޔަ ވިޔަފާރީގެ މަޝްވަރާތައް މިދިޔަ މަހު މެދުކެނޑުނީ، އެއްބަސްވުމަކާ ގާތްވެފައި ވަނިކޮށް ދެ ފަރާތުން ވެސް ފަހު ވަގުތު އާ ޝަރުތުތަކެއް ކުރިމަތިކުރުމުންނެވެ. މިއާއެކު، އެމެރިކާއިން ވަނީ ކެނެޑާއިން އެތެރެކުރާ 20 ބިލިއަން ޑޮލަރުގެ މުދަލުން 50 އިންސައްތައިގެ ޓެކުހެއް ނަގަން ފަށާފަ އެވެ. މީގެ ރައްދުގައި ކެނެޑާއިން ވެސް އަންނަ ހަފުތާގައި އެ ފަދަ ފިޔަވަޅުތަކެއް އެޅުމަށް ވަނީ ރާވާފަ އެވެ.

މިއާއެކު، ދެ ގައުމުގެ ދެމެދުގައި ބަހުގެ ހަމަލާތައް ވަނީ ވަރަށް ބޮޑަށް އިތުރުވެފަ އެވެ. އޮންޓާރިއޯގެ ޕްރިމިއާ ޑަގް ފޯޑް ވަނީ ޓްރަމްޕަކީ "ބަލިކަށި މީހެއް" ކަމަށް ސިފަކުރައްވާފަ އެވެ. އަދި، އެމެރިކާގެ ރައީސް ވަނީ "ލޭކް އޮންޓާރިއޯ" ގެ ނަން "ލޭކް އެމެރިކާ" އަށް ބަދަލުކުރަން އުޅޭކަމަށް ވިދާޅުވެފަ އެވެ. މީގެ އިތުރުން، އެމެރިކާގެ ޓްރާންސްޕޯޓް ސެކްރެޓަރީ ޝޯން ޑަފީ ވަނީ ކެނެޑާއަކީ "އަސްކަރިއްޔާއެއް ނެތް" ގައުމެއްގެ ގޮތުގައި ސިފަކުރައްވާފަ އެވެ.

ނަމަވެސް، މި ދެ ގައުމަކީ ޒަމާނުއްސުރެ ދިފާއީ ބައިވެރިންނެވެ. އަފްޣާނިސްތާނާ ދެކޮޅަށް އެމެރިކާއިން ކުރި ޣައިރުޤާނޫނީ ހަނގުރާމައިގައި ވެސް ކެނެޑާއިން ވަނީ އެމެރިކާއަށް އެއްބާރުލުން ދީފަ އެވެ. އަދި، ނޭޓޯގެ އަމާޒުތަކަށް ވާސިލުވުމަށް ޓަކައި، ފާއިތުވި މަސްތަކުގައި ކެނެޑާއިން ވަނީ އަސްކަރީ ހޭދަ ވަރަށް ބޮޑަށް އިތުރުކޮށްފަ އެވެ.

ކުރިން އަސްކަރިއްޔާގައި ޚިދުމަތް ކުރައްވާފައިވާ ބޭފުޅެއް ކަމަށްވާ ހެގްސެތަށް އަމިއްލަ ގައުމުގައި ވެސް ވަނީ ޕްރެޝަރު ބޮޑުވެފަ އެވެ. އެއީ، ޕެންޓަގަންގެ އިސް އަސްކަރީ ލީޑަރުންތަކެއް މަގާމުން ވަކިވުމާއި، އީރާނާ ދެކޮޅަށް ފަށާފައިވާ ޣައިރުޤާނޫނީ ހަނގުރާމައިގެ މައްސަލާގައި އެމެރިކާއިން އަމަލުކުރަމުންދާ ގޮތާ މެދު ސުވާލު އުފެދިފައިވާ ދަނޑިވަޅެއްގަ އެވެ. ހެގްސެތަކީ އަބަދުވެސް އެމެރިކާ ސިފައިންގެ ސިފައާއި ހަށިގަނޑުގެ ދުޅަހެޔޮކަމަށް ވަރަށް ބޮޑަށް އިސްކަންދެއްވާ، އަދި "ހަނގުރާމަވެރި އަޚުލާގު" ހުރުން މުހިންމު ކަމަށް ވަކާލާތުކުރައްވާ ބޭފުޅެކެވެ.