ހޮރްމޫޒް ކަނޑުއޮޅީގެ ނަން 'ޓްރަމްޕް ސްޓްރެއިޓް' އަށް ބަދަލުކުރަން ހުށަހަޅައިފި

އީރާނާ ދެކޮޅަށް ކުރަމުންދާ ހަނގުރާމައިގެ ތެރެއިން، ހޮރްމޫޒް ކަނޑުއޮޅީގެ ނަން 'ޓްރަމްޕް ސްޓްރެއިޓް' ނުވަތަ 'ޓްރަމްޕް ކަނޑުއޮޅި'، މި ނަމަށް ބަދަލުކުރުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވައިފި އެވެ. އެ ސަރަހައްދުން ދަތުރުކުރާ އުޅަނދުފަހަރަށް އީރާނުން ކޮންމެ ދުވަހަކު ކަހަލަ ގޮތަކަށް ހަމަލާ ދެމުންދިޔަ ނަމަވެސް، އެ ކަނޑުއޮޅި އޮތީ ވޮޝިންޓަންގެ ބާރުގެ ދަށުގައި ކަމަށް ޓްރަމްޕް ވަނީ ތަކުރާރުކޮށް ވިދާޅުވެފަ އެވެ. ޓްރަމްޕް މި ހުށަހެޅުން ހުށަހަޅުއްވާފައި މި ވަނީ، އީރާނުގެ ދެކުނުގެ ސިޓީއެއް ކަމަށްވާ ސިރިކްގައި ބޭއްވި ކައިވެނި ހަފުލާއަކަށް އެމެރިކާއިން ދިން ހަމަލާތަކެއްގައި ދެ ކުޑަކުދިން ހިމެނޭހެން މަދުވެގެން ހަތަރު މީހުން ޝަހީދުކޮށްލިތާ 24 ގަޑިއިރު ވެސް ނުވަނީހެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، މިހާރު އެ ސަރަހައްދު އޮތީ އެމެރިކާގެ ބާރުގެ ދަށުގައި ކަމަށެވެ. އެހެންކަމުން ހޮރްމޫޒް ކަނޑުއޮޅީގެ ނަން 'ޓްރަމްޕް ސްޓްރެއިޓް' އަށް ބަދަލުކުރަންވީ ނޫންތޯ އޭނާ ސުވާލު އުފެއްދެވި އެވެ. އަދި، އެމެރިކާ ފަދައިން އެ ތަން ވެސް ކުރިއަށް ވުރެ ބޮޑަށް "ހޮޓް" ވާނެ ކަމަށް ޓްރަމްޕް ވިދާޅުވި އެވެ.

އަންގާރަ ދުވަހު އެމެރިކާއިން ދިން ހަމަލާތަކަށް ރައްދު ދިނުމުގެ ގޮތުން، އީރާނުން ވަނީ އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް މިސައިލް ހަމަލާތަކެއް ދީފަ އެވެ. މި ކުރިމަތިލުންތަކާ ގުޅިގެން ތެލުގެ އަގު ވަނީ ގާތްގަނޑަކަށް 4 އިންސައްތަ މައްޗަށް ގޮސްފަ އެވެ. ހޮރްމޫޒް ކަނޑުއޮޅި މިހާރު އޮތީ ހުޅުވާލެވިފައި ކަމަށާއި، ކޮންމެ ދުވަހަކު އެތައް މިލިއަން ފީފާ ތެލެއް އެ ތަނުން އުފުލަމުންދާ ކަމަށް އެމެރިކާގެ އޮފިޝަލުން ތަކުރާރުކޮށް ވިދާޅުވި ނަމަވެސް، ފާއިތުވި ހަފުތާތަކުގައި ތެލުގެ އަގު ދަށަށް ގޮސްފައެއް ނުވެ އެވެ.

އެ ކަނޑުއޮޅި އޮތީ ބަންދުކޮށްފައި ކަމަށާއި އެ ތަން އޮތީ އެ ގައުމުގެ ބާރުގެ ދަށުގައި ކަމަށް އީރާނުން އަދިވެސް ބުނެ އެވެ. ބުދަ ދުވަހު ސައުދީ އަރަބިއްޔާއިން ވަނީ ތެޔޮ އުފުލާ ޓޭންކަރަކަށް އީރާނުން ހަމަލާދީ، ދެ މީހަކު މަރާލާފައިވާ ކަމަށް ތުހުމަތުކޮށްފަ އެވެ. އިނގިރޭސި ރޯޔަލް ނޭވީއާ ގުޅުން އޮންނަ މޮނިޓަރިން އެޖެންސީއެއް ކަމަށްވާ ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސްއިން (ޔޫކޭއެމްޓީއޯ) ރިޕޯޓްކުރާ ގޮތުގައި، ހޮރްމޫޒް ކަނޑުއޮޅިން ދަތުރުކުރާ އުޅަނދުތަކަށް ކޮންމެ ދުވަހަކު ކަހަލަ ގޮތަކަށް ހަމަލާތައް ދަނީ އަމާޒުވަމުންނެވެ.

މި ހަމަނުޖެހުންތަކާ ގުޅިގެން އެމެރިކާގައި ޕެޓްރޯލްގެ އަގު އަދިވެސް ދަނީ އުފުލެމުންނެވެ. އެމެރިކަން އޮޓޮމޮބައިލް އެސޯސިއޭޝަނުން (އޭއޭއޭ) ބުނާ ގޮތުގައި، ފެބްރުއަރީ 28 ގައި ހަނގުރާމަ ފެށުމުގެ ކުރިން 3 ޑޮލަރަށް ވުރެ ހެޔޮކޮށް ހުރި 3.8 ލީޓަރުގެ ޕެޓްރޯލްގެ އަގު، ބުދަ ދުވަހު ވަނީ 4.12 ޑޮލަރަށް އަރާފަ އެވެ.

މި އަހަރުގެ ކުރީކޮޅު ޓްރަމްޕާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އިސްވެ އީރާނަށް ހަމަލާދީ، އެ ގައުމުގެ އެންމެ މަތީ ލީޑަރު އަވަހާރަކޮށްލުމުން ފެށުނު މި ހަނގުރާމަ ހަ ހަފުތާގެ ތެރޭގައި ނިމޭނެ ކަމަށް ޓްރަމްޕް ކުރިން ވައުދުވެވަޑައިގެންނެވި އެވެ. ނަމަވެސް، ޓްރަމްޕް ކުރިން "ކުޑަ ދަތުރެއްގެ" ގޮތުގައި ސިފަކުރެއްވި މި ހަނގުރާމަ އަވަހަށް ނިމޭނެ ކަމަށް ވިދާޅުވި ވިދާޅުވުން ހަގީގަތަކަށް ނުވި އެވެ. މިދިޔަ ހަފުތާގައި މި ހަނގުރާމައަށް ހަތް މަސް ފުރިފައިވާއިރު، ޓްރަމްޕް އަދިވެސް ގެންދަވަނީ ހޮރްމޫޒްގެ މައްޗަށް ބާރު ފޯރުވަމުންދާ ކަމަށާއި ކާމިޔާބީ ލިބެމުންދާ ކަމަށް ވިދާޅުވަމުންނެވެ. އަދި އެ ސަރަހައްދުގައި ހުރި އެމެރިކާގެ މަސްލަހަތުތަކަށް ހަމަލާދިނުމުގެ ގާބިލްކަން އީރާނަށް ލިބިފައިވީ ނަމަވެސް، އީރާނުގެ އަސްކަރިއްޔާ ބަލިކޮށްލެވިފައިވާ ކަމަށް ޓްރަމްޕް ތަކުރާރުކޮށް ވިދާޅުވި އެވެ.

އަންގާރަ ދުވަހު އެމެރިކާއިން ދިން ހަމަލާތަކަށްފަހު، އީރާނުން ރައްދު ހަމަލާއެއް ދީފިނަމަ މިއަށް ވުރެ މާ ވަރުގަދަ އަދި މާ ނުރައްކާތެރި ހަމަލާތަކެއް ދޭނެ ކަމަށް ވިދާޅުވެ ޓްރަމްޕް ވަނީ ތެހެރާނަށް ވަރުގަދަ އިންޒާރެއް ދެއްވާފަ އެވެ. ނަމަވެސް، އެ އިންޒާރު ދެއްވިތާ މަދު ގަޑިއިރުތަކެއްގެ ތެރޭގައި އީރާނުގެ އަސްކަރިއްޔާއިން ވަނީ ބަހްރައިން، އުރުދުން އަދި އިރާގުގައި ހުރި އެމެރިކާގެ އަސްކަރީ މަރުކަޒުތަކަށް މިސައިލާއި ޑްރޯން ހަމަލާތަކެއް ދީފަ އެވެ.

ބުދަ ދުވަހު ޓްރަމްޕް ހުށަހެޅުއްވި 'ޓްރަމްޕް ސްޓްރެއިޓް' ގެ ޚިޔާލަކީ، މި ހަނގުރާމައިގެ މައްޗަށް ބާރު އޮތްކަން ދެއްކުމަށް އޭނާ ކުރެއްވި އެންމެ ފަހުގެ މަސައްކަތް ކަމުގައި ބެލެވެ އެވެ. ނަމަވެސް، މިއީ އިސްތިރާޖީ ގޮތުން ހެދުނު ގޯހެއް ކަމަށާއި، މީގެ ސަބަބުން އެމެރިކާ ބޮޑު ތާށިގަނޑެއްގެ ތެރެއަށް ވެއްޓެމުންދާ ކަމަށް ފާޑުކިޔާ ފަރާތްތަކުން ބުނެ އެވެ.

މިދިޔަ މަހު ޓްރަމްޕް ވަނީ ހޮރްމޫޒް ކަނޑުއޮޅިއަކީ "އެމެރިކާގެ ސަރަހައްދެއް" ކަމަށް ދެކިވަޑައިގަންނަވާ ކަމަށް ވިދާޅުވެފަ އެވެ. އަދި ކެނެޑާއާ އެކު އޮތް ވިޔަފާރީގެ ޚިލާފުތަކާ ގުޅިގެން، އެމެރިކާއާއި ކެނެޑާ ގުޅޭ ބޯޑަރުގައި އޮންނަ 'ލޭކް އޮންޓޭރިއޯ' ގެ ނަން ވެސް 'ލޭކް އެމެރިކާ' އަށް ޓްރަމްޕް ވަނީ މިދިޔަ ހަފުތާގައި އަމިއްލަފުޅަށް ބަދަލުކުރައްވާފަ އެވެ.