އީރާނުން އދ. ސަލާމަތީ މަޖިލީހުގައި އެމެރިކާގެ ހަމަލާއަށް ފިޔަވަޅު އެދުނު

ޕާޝިއަން ގަލްފުގައި އޮންނަ ލާރަކް ޖަޒީރާއަށް އެމެރިކާގެ އަސްކަރިއްޔާއިން ދިން ހަމަލާއަކީ އުދުވާނީ އަމަލެއްގެ އިތުރުން ހަނގުރާމައިގެ ކުށެއް ކަމަށާއި، އެއީ ގައުމުގެ މިނިވަންކަމާއި އިސްތިގުލާލަށް އަރައިގަތުން ކަމަށް ބުނެ، އެކަމާ މެދު ފިޔަވަޅު އެޅުމަށް އީރާނުން އދ. ގެ ސަލާމަތީ މަޖިލީހުގައި ރަސްމީކޮށް އެދިއްޖެ އެވެ.

އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް އަދި ސަލާމަތީ މަޖިލީހުގެ ރައީސަށް ހޯމަ ދުވަހު ފޮނުއްވި ސިޓީއެއްގައި، އދ. އަށް ކަނޑައަޅާފައި ހުންނަވާ އީރާނުގެ ސަފީރު އަދި ޝާޒޭ ޑަ ފެއާޒް ޣުލާމްހުސައިން ދަރުޒީ ވިދާޅުވީ، އޮގަސްޓް މަހުގެ 30 ވާ އާދިއްތަ ދުވަހުގެ ރޭގަނޑުގެ ވަގުތެއްގައި އެމެރިކާގެ ސިފައިން އީރާނުގެ މި ރަށަށް ހަމަލާދީފައިވާ ކަމަށެވެ.

މި ހަމަލާގެ ސަބަބުން ގައުމު ދިފާއުކުރުމުގައި ތިބި އީރާނުގެ ސިފައިންނާއި އާންމު ރައްޔިތުންގެ ތެރެއިން ބަޔަކު ޝަހީދުވެ، އަދި ބަޔަކު ޒަހަމްވެފައިވާ ކަމަށާއި، އާންމުންގެ މުދަލަށާއި ދައުލަތުގެ ތަންތަނަށް ބޮޑެތި ގެއްލުންތަކެއް ލިބިފައިވާ ކަމަށް އޭނާ ލިޔުއްވާފައިވެ އެވެ.

ތެހެރާނުން ސިފަކުރި ގޮތުގައި މި ހަމަލާއަކީ އީރާނުގެ ގައުމީ ސިޔާދަތާއި އިސްތިގުލާލަށް އަރައިގަތުމުގެ ސާފު އަމަލެކެވެ. އަދި މިއީ އެއްވެސް ގައުމެއްގެ މިނިވަންކަމަށް ނުވަތަ ސަރަހައްދީ ރައްކާތެރިކަމަށް ބިރުދެއްކުމާއި ބާރުގެ ބޭނުންކުރުން މަނާކުރާ އދ. ގެ ޗާޓަރުގެ 2 ވަނަ މާއްދާގެ 4 ވަނަ ނަންބަރާ ކަނޑައެޅިގެން ޚިލާފު އަމަލެއް ކަމަށް އީރާނުން ބުނެފައިވެ އެވެ.

ދަރުޒީ ވިދާޅުވީ، ގާނޫނާ ޚިލާފަށް އެމެރިކާއިން ހިންގި މި އުދުވާނީ އަމަލު އިސްލާމީ ޖުމްހޫރިއްޔާ އީރާނުން "ހަރުކަށި އިބާރާތުން ކުށްވެރިކުރާ" ކަމަށެވެ.

އޭނާ އިތުރަށް ވިދާޅުވީ، އދ. ގެ ޗާޓަރުގެ 51 ވަނަ މާއްދާގެ ދަށުން އަމިއްލަ ނަފްސު ދިފާއުކުރުމަށް ލިބިދޭ ހައްގުގެ ބޭނުން ހިފައި، އީރާނުގެ އަސްކަރިއްޔާއިން އުރުދުންގައި ހުންނަ އެމެރިކާގެ އަސްކަރީ މަރުކަޒުތަކަށް ހަމަލާދީފައިވާނެ ކަމަށެވެ. އެއީ އީރާނާ ދެކޮޅަށް ވޮޝިންޓަނުން ހިންގި "ޖިނާއީ ހަމަލާތަކާއި އުދުވާނުގައި" އެ މަރުކަޒުތައް ބޭނުންކޮށްފައިވާތީ، އެކަމަށް ދިން އެކަށީގެންވާ ރައްދު ހަމަލާތަކެއް ކަމަށް އޭނާ ފާހަގަކުރެއްވި އެވެ.

ލާރަކް ޖަޒީރާއަށް ދިން ހަމަލާއަކީ، ފެބްރުއަރީ 28 ވަނަ ދުވަހު އެމެރިކާއިން އެއްވެސް އުސޫލެއް ނެތި ފެށި ފުޅާދާއިރާއެއްގެ އަސްކަރީ ހަމަލާތަކުގެ ތެރެއިން ހިންގި އަމަލެއް ކަމަށް އެ ސިޓީގައި ބަޔާންކޮށްފައިވެ އެވެ.

ވޭތުވެދިޔަ ހަ މަސްދުވަހުގެ ތެރޭގައި ވޮޝިންޓަނާއި ޒަޔަނިސްޓް ރެޖީމުން (އިސްރާއީލުން) ގާނޫނާ ޚިލާފަށް ކަނޑުގެ މަގު ބަންދުކޮށް، "އިގްތިސާދީ ޓެރަރިޒަމް" ފަދަ ދަތިކުރުމުގެ ފިޔަވަޅުތައް އަޅައި، ފިތުނަ އުފެއްދުމުގެ އަމަލުތައް ހިންގަމުންދާ ކަމަށް ތެހެރާނުން ބުނެ އެވެ.

މި އަމަލުތަކަކީ ބައިނަލްއަގުވާމީ އިންސާނީ ގާނޫނުތަކާ ޚިލާފު، ދައުލަތަކުން ހިންގާ ޓެރަރިޒަމްގެ އަމަލުތަކެއްގެ އިތުރުން، ހަނގުރާމައިގެ ކުށްތަކާއި އިންސާނިއްޔަތާ ޚިލާފު ޖަރީމާތަކެއް ކަމަށް ދަރުޒީ ލިޔުއްވާފައިވެ އެވެ.

މިކަމުގެ ބައިނަލްއަގުވާމީ ޒިންމާ އެމެރިކާއިން އުފުލަންޖެހޭނެ ކަމަށާއި، މި ހަމަލާތަކަށް އަމުރުދީ، އިރުޝާދު ދީ، އަދި އަމަލީގޮތުން ބައިވެރިވި ފަރާތްތަކުން ޖިނާއީ ޒިންމާ އުފުލަންޖެހޭނެ ކަމަށް އޭނާ ވިދާޅުވި އެވެ.

މީގެ އިތުރުން، އީރާނުގެ ރައްޔިތުންނަށް ލިބުނު ބޮޑެތި ގެއްލުންތަކާ ގުޅިގެން، މިފަދަ އުދުވާނެއް ރޭވުމުގައި ނުވަތަ ތަންފީޒުކުރުމުގައި އެހީތެރިވެ، މަގުފަހިކޮށްދީ، ނުވަތަ ބައިވެރިވި ކޮންމެ ފަރާތެއްވެސް ޒިންމާދާރުކުރާނެ ކަމަށް އީރާނުން ބުންޏެވެ.

ޕާޝިއަން ގަލްފާއި ހުރްމުޒް ކަނޑުއޮޅީގައި ދަތުރުފަތުރުގެ މިނިވަންކަމާއި ކަނޑުގެ ސަލާމަތަށް އޮތް ހަމައެކަނި ނުރައްކަލަކީ "އެމެރިކާއާއި ޒަޔަނިސްޓް ރެޖީމުގެ ގާނޫނާ ޚިލާފު އުދުވާނީ އަމަލުތަކާއި، ސަރަހައްދުގެ ހަމަޖެހުން ނަގާލުމަށް ހިންގާ ނުރައްކާތެރި ހަރަކާތްތައް،" ކަމަށް ދަރުޒީ ބަޔާންކުރެއްވި އެވެ.

އީރާނުގެ ސިޔާދަތަށް އަރައިގަތް މައްސަލައަށް ހައްލެއް ހޯދުމަށާއި، ގާނޫނާ ޚިލާފަށް ބާރުގެ ބޭނުންކުރި ފަރާތްތައް ޒިންމާދާރުކުރުވުމަށާއި، ބައިނަލްއަގުވާމީ ސުލްހައާއި ސަލާމަތަށް ނުރައްކާވާ ފަދަ އިތުރު ހަމަނުޖެހުންތައް ހުއްޓުވުމަށް ބޭނުންވާ ހުރިހާ ފިޔަވަޅެއް އެޅުމަށް އޭނާ ސެކްރެޓަރީ ޖެނެރަލަށާއި ސަލާމަތީ މަޖިލީހަށް ގޮވާލެއްވި އެވެ.

ޚާއްސަގޮތެއްގައި، އެމެރިކާއިން ދެމުންދާ ހަމަލާތައް ވަގުތުން ހުއްޓާލުމަށާއި، ޕާޝިއަން ގަލްފާއި ހުރްމުޒްކަނޑުއޮޅީގެ ސަލާމަތަށް ނުރައްކާވާ ފަދަ އަމަލުތައް ނިމުމަކަށް ގެނައުމަށް އެމެރިކާއަށް އެންގުމަށް އީރާނުން އދ. ގައި އެދިފައިވެ އެވެ.

އީރާނުން މިހާތަނަށް ކެތްތެރިކަން އިސްކޮށް، އަމަލުކޮށްފައިވަނީ ބައިނަލްއަގުވާމީ ގާނޫނުތަކާ އެއްގޮތަށް ކަމަށް އެ ސިޓީގައި ފާހަގަކޮށްފައިވެ އެވެ. އެހެންނަމަވެސް، އީރާނުގެ ރައްޔިތުންނާއި، ގައުމުގެ މިނިވަންކަމާއި އިސްތިގުލާލު ހިމާޔަތްކުރުމަށް ބޭނުންވާ ހުރިހާ ފިޔަވަޅެއް އަޅާނެ ކަމުގެ އިންޒާރުވެސް ވަނީ ދީފަ އެވެ.

"އިސްލާމީ ޖުމްހޫރިއްޔާ އީރާނުގެ އަސްކަރިއްޔާއިން، އަމިއްލަ ނަފްސު ދިފާއުކުރުމަށް ލިބިދޭ ހައްގުގެ ބޭނުން ހިފުމަށް ފަސްނުޖެހޭނެ ކަމަށާއި، ކުރިމަތިވާ ކޮންމެ އަސްކަރީ އުދުވާނަކަށް ވަރުގަދަ އަދި އެކަށީގެންވާ ރައްދެއް ދޭނެ،" ދަރުޒީ ލިޔުއްވާފައިވެ އެވެ.

މި ސިޓީއަކީ ސަލާމަތީ މަޖިލީހުގެ ރަސްމީ ލިޔުމެއްގެ ގޮތުގައި ބަލައިގަނެ، މެންބަރު ގައުމުތަކަށް ފޮނުވުމަށްވެސް އީރާނުން ވަނީ އެދިފަ އެވެ.