ކުޑަކުދިންނަށް ލިބިދޭންވާ ހިމާޔަތާއި ރައްކާތެރިކަން އެންމެ ފުރިހަމައަށް ލިބޭނީ ހަރުދަނާ އާއިލާއެއްގެ ތެރެއިން އަދި އެފަދަ އާއިލާތަކެއްގެ މައްޗަށް ބިނާވެފައިވާ މުޖުތަމައަކުން: ޚުތުބާ

ކުޑަކުދިންނަށް ލިބިދޭންވާ ހިމާޔަތާއި ރައްކާތެރިކަން އެންމެ ފުރިހަމައަށް ލިބޭނީ ހަރުދަނާ އާއިލާއެއްގެ ތެރެއިން އަދި އެފަދަ އާއިލާތަކެއްގެ މައްޗަށް ބިނާވެފައިވާ މުޖުތަމައަކުން ކަމަށް ހުކުރު ހުތުބާގައި ބުނެފި އެވެ. 

''ކުޑަކުދިންގެ ހައްގުތަށް'' މި މައުޟޫއަށް ރާއްޖޭގެ އެކި ކަންކޮޅުތަކަށް އިއްވި ޚުތުބާގައި ބުނީ،، ދަރިންނަކީ މާތްﷲ އިންސާނުންނަށް ދެއްވާފައިވާ ވަރަށް ބޮޑު އަމާނާތެއް ކަމަށާއި އެ އަމާނާތަށް ރައްކާތެރިވުމަކީ ކޮންމެ މައިންބަފައިގެ މައްޗަށް އޮތް ދީނީ އަދި އިޖުތިމާއީ ވާޖިބެއް ކަމަށެވެ.

މިއަދުގެ ޚުތުބާގައި ބަޔާންކޮށްފައިވާ ގޮތުގައި، ދަރިންނަށް ހެޔޮ ތަރުބިއްޔަތު ދިނުމަކީ ހަމައެކަނި އެކުދިންނަށް ކާންބޯންދީ އަންނައުނު ހޯދައިދިނުމެއް ނޫނެވެ. އޭގެ ބަދަލުގައި އެކުދިންގެ ހިތްތަކުގައި އީމާންކަން ވަރުގަދަކޮށް، އިސްލާމީ ރިވެތި އަޚުލާގުގެ މަތީގައި ބޮޑުކުރުމަކީ ކޮންމެހެން ކުރަންޖެހޭ ކަމެއްކަން ޚުތުބާގައި ފާހަގަކުރި އެވެ. މިގޮތުން ކީރިތި ގުރުއާނުގެ ލުގުމާން ސޫރަތުގެ 33 ވަނަ އާޔަތާއި، ތަހުރީމް ސޫރަތުގެ 6 ވަނަ އާޔަތަށް ރިއާޔަތްކޮށް، ނަރަކައިގެ އަޒާބުން އަމިއްލަ ނަފްސާއި އަހުލުވެރިން ސަލާމަތްކުރުމަށް މާތްﷲ އަމުރުކުރައްވާފައިވާކަން ހަނދާންކޮށްދީފައިވެ އެވެ.

ދަރިންނަށް ނަމޫނާ ދެއްކުމުގެ މުހިންމުކަމުގެ މައްޗަށް އަލިއަޅުވާލަމުން ޚުތުބާގައި ބުނީ، މައިންބަފައިންނަކީ ދަރިންގެ ފުރަތަމަ މުދައްރިސުން ކަމަށެވެ. އެހެންކަމުން މައިންބަފައިންގެ އަމަލުތައް ހުންނަ ގޮތަކީ ދަރިންގެ ދިރިއުޅުމަށް ސީދާ އަސަރުކުރާނެ ކަމެއްކަމާއި ދަރިންނަށް ހެޔޮ ނަސޭހަތް ދިނުމުގެ އިތުރުން އަމަލީ ގޮތުން ރަނގަޅު ނަމޫނާ ދެއްކުމަށް ވަނީ ގޮވާލާފަ އެވެ. މީގެ އިތުރުން، ދަރިންގެ މެދުގައި އަދުލުވެރިވުމަކީ އިސްލާމްދީން ނުހަނު ބޮޑަށް ބާރުއަޅާ ކަމެއްކަން ފާހަގަކޮށް، އެއްވެސް ކުއްޖަކު ބާކީނުކޮށް ހަމަހަމަކަމާއެކު ލޯތްބާއި އަޅާލުން ދިނުމަށް އިރުޝާދު ދީފައިވެ އެވެ.

ޚުތުބާގައި އިތުރަށް ބަޔާންކޮށްފައިވަނީ، ދަރިންނަށް ނަމާދު ކުރުމަށް އަމުރުކުރުމާއި، ދީނީ ކަންކަމަށް ލޯބިޖެއްސުމަކީ ކުޑައިރުން ފެށިގެން ކުރަންޖެހޭ ކަމެއް ކަމަށެވެ. މިގޮތުން ކުދިންގެ އުމުރުން ހަތް އަހަރުން ފެށިގެން ނަމާދުކުރުމަށް ބާރުއެޅުމަށް ރަސޫލާ صلى الله عليه وسلم ދެއްވާފައިވާ އިރުޝާދުތައް ޚުތުބާގައި ހަނދާންކޮށްދިނެވެ. އަދި ދަރިންނަށްޓަކައި ހެޔޮ ދުއާކުރުމަކީ މައިންބަފައިންގެ ފަރާތުން އެކުދިންނަށް ލިބޭނެ އެންމެ ބޮޑު ހަދިޔާކަން ފާހަގަކޮށް، އަލްފުރުގާން ސޫރަތުގެ 74 ވަނަ އާޔަތުގައިވާ ފަދައިން ލޮލުގެ ފިނިކަމެއްގެ ގޮތުގައި ދަރިން ލެއްވުމަށް އެދި ދުއާކުރުމަށް ބާރުއަޅާފައިވެ އެވެ.

ތިޔަބައިމީހުންގެ ދަރީންނަށް ހަތް އަހަރުވުމުން، ނަމާދުކުރުމަށް އެ ކުދީންނަށް އަމުރުކުރާށެވެ! އަދި ދިހަ އަހަރުވުމުން އެ ކުދީން ނަމާދުނުކުރާ ނަމަ، އަނިޔާ ނުވާ ގޮތަށް އެ ކުދީންގެ ގައިގައި ޖަހައި އަދަބުދޭށެވެ!

ހުކުރު ޚުތުބާ 

މީގެ އިތުރުން، ޚުތުބާގައި ވަނީ މުޖުތަމައުގެ ހަމަޖެހުމާއި ކުރިއެރުން ބިނާވެފައިވަނީ ދަރިން ތަރުބިއްޔަތުކުރާ ގޮތުގެ މައްޗަށް ކަމަށްވާތީ، އެކަމުގައި ފަރުވާކުޑަނުކުރުމަށް ހުރިހާ މައިންބަފައިންނަށް އިލްތިމާސްކޮށްފަ އެވެ. އަދި ދަރިންނަށް އަނިޔާވެރިނުވުމަށާއި އެކުދިންނަށް އޯގާތެރިވުމަކީ ރަސޫލާގެ ސުންނަތުން ސާބިތުވާ ކަމެއްކަން ބަޔާންކޮށް، ކޮންމެ މީހަކީވެސް އެމީހެއްގެ ބެލުމުގެ ދަށުގައިވާ މީހުންނާ ބެހޭގޮތުން ގިޔާމަތް ދުވަހުން ސުވާލުވެވޭނެ މީހެއްކަން ހަނދާންކޮށްދީފައިވެ އެވެ.

އެހެންކަމުން، ދަރިންނަށް ހެޔޮގޮތުގައި ތަރުބިއްޔަތު ދިނުމަށް މައިންބަފައިންނަށް ޚުތުބާގައި ވަނީ ނަސޭހަތްތެރިވެފަ އެވެ.