ގިޔާމަތް ދުވަހާއި މަޙުޝަރު މައިދާނުގެ ބިރުވެރިކަމުން ސަލާމަތްވުމަށް، މިއަދުން މިއަދަށް ތައްޔާރުވެ، މާތްﷲގެ ޙަޟުރަތަށް ރުޖޫއަވާން ޖެހޭ: ޚުތުބާ

ގިޔާމަތް ދުވަހާއި މަޙުޝަރު މައިދާނުގެ ބިރުވެރިކަމުން ސަލާމަތްވުމަށް، މިއަދުން މިއަދަށް ތައްޔާރުވެ، މާތްﷲގެ ޙަޟުރަތަށް ރުޖޫއަވުމަށް ހުކުރު ޚުތުބާގައި މުޅި އިސްލާމީ އުންމަތަށް ގޮވާލައިފި އެވެ. 

''ގިޔާމަތްދުވަހާއި މަޙުޝަރު މައިދާނަށް ތައްޔާރުވުން'' މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ވަނީ އެ ދުވަހުގެ ބިރުވެރިކަމުގެ ސަބަބުން ކިރުމައިން އެއުރެންގެ ދަރިންގެ މަތިން ހަނދާންނެތި، މާބަނޑު އަންހެނުން ބަނޑުގައި އޮތް ދަރި ވިހައި، އަދި މީސްތަކުން މަސްތުވެފައިވާ ފަދަ ޙާލަތެއްގައި ތިބޭނެކަން ޚުޠުބާގައި ހަނދާންކޮށްދީފަ އެވެ. 

މަޙުޝަރުގެ މައިދާނުގައި ކޮންމެ މީހަކުވެސް އުޅޭނީ އަމިއްލަ ނަފުސުގެ ސަލާމަތަށްޓަކައި ކަމަށާއި، އެ ދުވަހަކީ އިންސާނާ އޭނާ ގެ އަޚާގެ ކިބައިންނާއި، މަންމައާއި ބައްޕަގެ ކިބައިންނާއި، އަނބިދަރިންގެ ކިބައިން ފިލަންދާނެ ދުވަހެއްކަން ޚުތުބާގައި ފާހަގަކޮށްފައިވެ އެވެ. 

މާތް ﷲ ވަޙީކުރައްވައިފައި ވެ އެވެ. މާނައީ: (އެއީ) މީހާ އޭނާ ގެ އަޚާގެ ކިބައިންނާއި، އޭނާ ގެ މަންމައާއި، ބައްޕަގެ ކިބައިންނާއި، އޭނާ ގެ އަނބިމީހާއާއި، ދަރިންގެ ކިބައިން ފިލަންދާ ދުވަހެވެ. އެއުރެން ކުރެ ކޮންމެ މީހަކަށް، އެ މީހަކު އަވަދިނެތިކުރާނެކަމެއް އެ ދުވަހުން ވެ އެވެ." އެ ދުވަހުގެ ބިރުވެރިކަން ބަޔާންކުރައްވައި މާތް ﷲ ވަޙީކުރައްވައިފައި ވެ އެވެ. މާނައީ: " ފަހެ، ތިޔަބައިމީހުން ކާފިރުވެއްޖެނަމަ (އެދުވަހުގެ ބިރުވެރިކަމުން) ކުޑަކުދިން މުސްކުޅިންނަށް ހަދައިލާ ދުވަހުން (އެބަހީ: އެދުވަހުގެ ޢަޒާބުން) ތިޔަބައިމީހުން ރައްކާތެރިވާނީ ކޮންފަދައަކުން ހެއްޔެވެ؟ އެދުވަހުން އުޑު އިރައިރައިގެން ދާނެތެވެ. އެކަލާނގެ ވަޢުދުފުޅު ފުރިހަމަވާނެކަން ޔަގީނެވެ.

ހުކުރު ޚުތުބާ 

ޚުތުބާގައި ބުނީ، މި ބިރުވެރި ދުވަހުގައި މީސްތަކުން ދެ ބަޔަކަށް ބެހިގެންދާނެ ކަމަށެވެ.

އޭގެ ތެރެއިން އެއް ބަޔަކީ އީމާންވެ ހެޔޮ އަމަލުކުރުމުގެ ސަބަބުން މޫނުތައް އަލިވެ، އުފާވެރިކަމުގައި ތިބޭނެ މީހުން ކަމަށާއި، އަނެއް ބަޔަކީ ކާފިރުވެ އުރެދުމުގެ ސަބަބުން މޫނުތަކަށް ކަޅު އަނދިރިކަމާއި ހިރަފުސް އަރާފައިވާ މީހުން ކަމަށެވެ. އަދި ދުނިޔޭގައި މާތް ﷲ އާއި އެކަލާނގެ ރަސޫލާއަށް އުރެދުނު މީހުން އެ ދުވަހު ވޭންދެނިވި އަޒާބާ ކުރިމަތިލާން ޖެހޭނެ ކަމުގެ އިންޒާރު ޚުތުބާގައި ދީފައިވެ އެވެ. އަދި ބިމުގައިވާ އެންމެން ފިދުޔައެއްގެ ގޮތުގައި ދީގެންވެސް އަޒާބުން މިންޖުވާން އެދުނު ނަމަވެސް އެ ފުރުސަތު ނޯންނާނެ ކަމަށް ވެސް ޚުތުބާގައި ބުނެފައިވެ އެވެ.

ގިޔާމަތް ދުވަހުން އިންސާނާ ކޮށްފައިވާ ޢަމަލުތަކާ މެދު ސުވާލުކުރެވޭނެކަން ފާހަގަކޮށް ޚުތުބާގައި ބުނީ އެ ދުވަހު އެއްވެސް ކަމެއް ވަންހަނާ ނުކުރެވޭނެ ކަމަށެވެ. 

ޚުތުބާގައި އިތުރަށް ބުނީ ގިޔާމަތްވާނީ ކޮން އިރަކުންތޯ ސުވާލުކުރުމުގެ ބަދަލުގައި އެ ދުވަހަށް ތައްޔާރުވުމަށްޓަކައި ކުރީ ކޮން އަމަލެއްތޯ ބަލަންޖެހޭ ކަމަށެވެ. 

ދިރުންހުރި ކޮންމެ އެއްޗަކީ މަރުގެ ރަހަ ދެކޭނެ އެއްޗެއްކަން ހަނދާންކޮށްދެމުން، ޝައިތާނާގެ ކެހިވެރި ދަޅަތަކަށް ނުހެއްލުމަށް ޚުތުބާގައި ވަނީ ގޮވާލާފަ އެވެ. އަދި ދުނިޔޭގެ ދިރިއުޅުމަކީ ވަގުތީ އުފަލެއްކަމާއި، ހަގީގީ ނަސީބުވެރިއަކީ ނަރަކައިން ސަލާމަތްވެ ސުވަރުގެ ލިބޭ މީހާކަން ޚުތުބާގައި ފާހަގަކޮށްފައިވެ އެވެ.