އަމިއްލަ ނަފުސާއި މުދަލާއި އަނބިދަރީންނަށް ވުރެ ބޮޑަށް މާތް ނަބިއްޔާ ދެކެ ލޯބިވެގެން މެނުވީ އީމާންކަން ފުރިހަމައެއް ނުވާނެ: ޚުތުބާ
21 އޯގަސްޓު 2026 | ހުކުރު 08:16މާތް ނަބިއްޔާ މުޙައްމަދު صلى الله عليه وسلم އަށް ފުރިހަމައަށް އީމާންވުމަކީ އެކަލޭގެފާނުގެ ސުންނަތަށް ތަބާވެ، އަމިއްލަ ނަފުސަށްވުރެ ބޮޑަށް އެކަލޭގެފާނު ދެކެ ލޯބިވުން ކަމަށް ޚުތުބާގައި ވަނީ ބުނެފައި. އަދި އެކަލޭގެފާނުގެ ސީރަތުން ނަމޫނާ ލިބިގަނެ، ރިވެތި އަހުލާގީ ސިފަތަކުން ޒީނަތްތެރިވުމާއެކު، ކީރިތި ގުރްއާނާއި ސުންނަތުގައި ވަރުގަދައަށް ހިފެހެއްޓުމަށް ހުރިހާ މުސްލިމުންނަށް ޚުތުބާގައި ނަސޭހަތްތެރިވެފައިވޭ
މާލޭގައި ހުންނަ ފުރުގާން މިސްކިތަށް ނަމާދު ކުރުމަށް މީހުން މިސްކިތަށް އަރަނީ | ރާއްޖެއެމްވީ
މާތް ނަބިއްޔާ މުޙައްމަދު صلى الله عليه وسلم ދެކެ ލޯބިވުމާއި އެކަލޭގެފާނު ދިފާއު ކުރުމަކީ ކޮންމެ މުސްލިމެއްގެ މައްޗަށް އޮތް ދީނީ ވާޖިބެއްކަން ހުކުރު ޚުތުބާގައި ހަނދާންކޮށްދީފި އެވެ.
މާތް ނަބިއްޔާ މުޙައްމަދު صلى الله عليه وسلم ދެކެ ލޯބިވުން މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ، މާތް ނަބިއްޔާ ފޮނުއްވުމުގެ ކުރީގައި ދުނިޔޭގައި އޮތީ ޖަންގަލީގެ ގާނޫނު ކަމަށާއި، ބާޒާރުގައި އިންސާނުން ގަނެވިއްކުމާއި އަންހެންދަރިން ދިރިތިއްބައި ވަޅުލުމާއި، ރާބުއިމާއި ޖުވާކުޅުމާއި ރިބާގެ މުއާމަލާތްތައް ފަދަ މުންކަރާތްތައް އިންތިހާއަށް ފެތުރިފައި އޮތް ކަމަށެވެ. މިފަދަ ދަށު ދަރަޖައަކަށް އިންސާނިއްޔަތު ވެއްޓިފައިވަނިކޮށް، މާތް ﷲ އެކަލޭގެފާނު ފޮނުއްވީ މުޅި އިންސާނިއްޔަތު ސަލާމަތް ކުރެއްވުމަށް އާލަމްތަކަށް ހުރި ރަހުމަތެއްގެ ގޮތުގައި އަދި ހިދާޔަތުގެ މަގަށް އަލިކުރާ ވޮށެއްގެ ގޮތުގައި ކަމަށް ޚުތުބާގައި ބުނެފައިވެ އެވެ.
މާތް ނަބިއްޔާ މުޙައްމަދު صلى الله عليه وسلم އަށް އީމާންވުމުގެ މާނައަކީ، އެކަލޭގެފާނަށް ކިޔަމަންގަތުމާއި، އެކަލޭގެފާނުގެ މަތިވެރި ސުންނަތަށާއި މަގާމަށް ގަދަރުކޮށް، އިހުތިރާމްކޮށް އަދަބު އަދާކުރުންކަން ބަޔާންކޮށް ޚުތުބާގައި ބުނީ، އެ މީހެއްގެ އަމިއްލަ ނަފުސާއި މުދަލާއި އަނބިދަރީންނަށް ވުރެ ބޮޑަށް އެކަލޭގެފާނު ދެކެ ލޯބިވެ، އެކަލޭގެފާނުގެ ސުންނަތަށް ނަޞްރުދީގެން މެނުވީ އެއްވެސް މުސްލިމެއްގެ އީމާންކަން ފުރިހަމައެއް ނުވާނެ ކަމަށެވެ.
އިތުރު އެކަލޭގެފާނު ޙަދީޘްކުރައްވައިފައިވެ އެވެ. (لَا يُؤْمِنُ أَحَدُكُمْ حَتَّى أَكُوْنَ أَحَبَّ إِلَيْهِ مِنْ وَالِدِهِ وَوَلَدِهِ وَالنَّاسِ أَجْمَعِيْنَ)[1] މާނައީ: "ތިޔަބައިމީހުން ކުރެ މީހެއްގެ މައިންބަފައިންނާއި ދަރީންނާއި އެންމެހައި މީސްތަކުންނަށް ވުރެ ބޮޑަށް، ތިމަންކަލޭގެފާނު ދެކެ އެ މީހަކު ލޯބިވެއްޖައުމަށް ދާންދެން، އެ މީހެއްގެ އީމާންކަން ފުރިހަމައެއް ނުވާހުށްޓެވެ." އެކަލޭގެފާނަށް ނަފުރަތުކުރުމާއި ކުޑައިމީސް ބަސްބުނެ ފުރައްސާރަކުރުމަކީ އީމާންކަމުގެ ދާއިރާއިން ބޭރުވާނޭ ކަންކަމެވެ. އެ ފަދަ މީހުންނަކީ މާތް ﷲ ލަޢުނަތްލައްވައި ނިކަމެތިކުރައްވައި ވޭންދެނިވި ޢަޛާބުދެއްވާނޭ ބައެކެވެހުކުރު ޚުތުބާ
ނަބީބޭކަލުންނާއި ރަސޫލުބޭކަލުންނަށް ފުރައްސާރަކުރުމަކީ ކުރީއްސުރެ ވެސް ހިނގަމުން އައިސްފައިވާ ކަމެއްކަން ފާހަގަކޮށް ޚުތުބާގައި ބުނީ، މާތް ނަބިއްޔާ މުޙައްމަދު صلى الله عليه وسلم އަށް ވެސް މިފަދަ ދުއްތުރާތަކާ ކުރިމަތިވެވަޑައިގެންނެވި ކަމަށެވެ. ނަމަވެސް، މާތް ﷲ އެ ފަދަ ފުރައްސާރަވެރީން ނިކަމެތިކުރައްވައި، އެކަލާނގެ ނަބިއްޔާއަށް ނަޞްރުދެއްވައި ރައްކާތެރިކަން ދެއްވާފައިވާކަން ޚުތުބާގައި ފާހަގަކޮށްފައިވެ އެވެ.
މީގެ އިތުރުން ޚުތުބާގައި ބުނީ މާތް ނަބިއްޔާ މުޙައްމަދު صلى الله عليه وسلم އަށް ލޯބިކުރުމުގެ އެންމެ މުހިންމު އަލާމާތަކީ އެކަލޭގެފާނަށް ފުރިހަމައަށް ތަބާވުން ކަމަށެވެ. އަދި އެކަލޭގެފާނުގެ ސީރަތުން ނަމޫނާ ލިބިގަނެ، ތެދުބަސްބުނުމާއި ކެތްތެރިވުމާއި އަދުލުވެރިވުމާއި އެއްބަޔަކު އަނެއްބަޔަކަށް އިހުތިރާމުކުރުން ފަދަ ރިވެތި އަހުލާގީ ސިފަތަކުން ޒީނަތްތެރިވުމަށް ޚުތުބާގައި ގޮވާލާފައިވެ އެވެ.
މާތް ﷲ އަށް ތަގުވާވެރިވެ، އާޚިރަތުގެ ކާމިޔާބީއަށް އެދި، މާތް ނަބިއްޔާ މުޙައްމަދު صلى الله عليه وسلم އުންމަތަށް ދޫކުރެއްވި އެންމެ އަގުބޮޑު ތަރިކަ ކަމުގައިވާ ކީރިތި ގުރްއާނާއި މާތް ނަބިއްޔާގެ ސުންނަތުގައި ވަރުގަދައަށް ހިފެހެއްޓުމަށް އެންމެހައި މުސްލިމުންނަށް ޚުތުބާގައި ވަނީ ނަސޭހަތްތެރިވެފަ އެވެ.
