ހުރިހާ ނުބައި ކަމެއް ވަނީ ކީރިތި ޤުރުއާން ދޫކޮށްލުމާއި އެ ފޮތުގެ އަމުރުތަކާ ޚިލާފުވުމުގައި: ޚުތުބާ

ހުރިހާ ހެޔޮ ކަމެއް ވަނީ ކީރިތި ޤުރުއާން ގައި ހިފަހައްޓައި އެ ފޮތް މަތިވެރި ކުރުމުގައި ކަމަށާއި، ހުރިހާ ނުބައި ކަމެއް ވަނީ އެ ފޮތް ދޫކޮށްލުމާއި އެ ފޮތުގެ އަމުރުތަކާ ޚިލާފުވުމުގައި ކަމަށް ހުކުރު ޚުތުބާގައި ބުނެފި އެވެ.

''ކީރިތި ޤުރުއާން ކިޔެވުމުގެ މާތްކަން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ، އެންމެ މަތިވެރި އަދި އެންމެ ބަރަކާތްތެރި ފޮތަކީ ކީރިތި ޤުރްއާން ކަމަށާއި، އެއީ ކޮންމެ ހެއުކަމަކާއި ބާއްޖަވެރިކަމެއްގެ އަސްލު ކަމަށެވެ. ހުރިހައި ކާމިޔާބީއެއްގެ ސިއްރު ކަމަށާއި، އެ ފޮތުގެ އުސޫލުތަކުގައި ހިފަހައްޓައި، އޭގެ މާނަތަކާ މެދު ފިކުރުކޮށް، އެ ފޮތް ކިޔެވުމުގައި ދެމިހުންނަ މީހަކީ، ގެއްލުމެއްނުވާނޭ ފައިދާހުރި ވިޔަފާރިއެއްގައި ދެމިހުރި މީހެއް ކަމަށް ޚުތުބާގައި ބުނެފައިވެ އެވެ. 

ކީރިތި ޤުރުއާން ތިލާވަތުކޮށް، އެ ފޮތުގައި ހިމެނޭ އާޔަތްތަކުގެ މާނަތަކާ މެދު ތަދައްބުރުކޮށް ވިސްނައި ފިކުރުކުރާ މީހުންގެ ވަށައިގެން މަލާއިކަތްބޭކަލުން ހާޒިރުވެވަޑައިގެން، އެބައިމީހުންނަށް ޓަކައި ހެޔޮ ދުއާކުރައްވައި، ޝައިތާނާގެ ނުބައިކަމުންނާއި ވަސްވާސްތަކުން ރައްކާތެރި ކޮށްދެއްވާނެކަން ޚުތުބާގައި ބަޔާންކޮށްފައިވެ އެވެ. 

ޚުތުބާގައި ބުނީ ޤުރުއާން ތިލާވަތުކުރުމަކީ އިންސާނާގެ ހަށިގަނޑަށާއި، ރޫޙަށާއި، ހިތަށް ނުހަނު ފައިދާހުރި ހެޔޮ ބަދަލުތަކެއް ގެނުވައިދޭ ކަމެއް ކަމަށެވެ. އަދި މާތް ﷲގެ މަތީން ހަނދުމަކޮށް، ޒިކުރުކުރުމުގެ މަތިވެރި މަގުސަދުގައި ކިޔެވޭ މި މުގައްދަސް ފޮތަކީ ނަފުސާނީ އަދި ޖިސްމާނީ ދުޅަހެޔޮކަމުގެ އަސްލު ކަމަށެވެ.

ކީރިތި ޤުރްއާނުގެ އަހުލުވެރީންގެ މާތްކަން ބަޔާންކުރައްވައި ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ޙަދީޘްކުރައްވައިފައި ވެ އެވެ. (وَمَا اجْتَمَعَ قَوْمٌ فِيْ بَيْتٍ مِنْ بُيُوْتِ اللَّهِ، يَتْلُونَ كِتَابَ اللَّهِ، وَيَتَدَارَسُوْنَهُ بَيْنَهُمْ، إِلَّا نَزَلَتْ عَلَيْهِمُ السَّكِيْنَةُ، وَغَشِيَتْهُمُ الرَّحْمَةُ وَحَفَّتْهُمُ الْمَلَائِكَةُ، وَذَكَرَهُمُ اللَّهُ فِيْمَنْ عِنْدَهُ) މާނައީ: "މާތް ﷲގެ ގެކޮޅުތަކުގެ ތެރެއިން ގެކޮޅެއްގައި (އެބަހީ: މިސްކިތެއްގައި)، ބަޔަކު މީހުން އެއްވެ، މާތް ﷲގެ ފޮތް ކިޔަވައި، އަދި އެ ބައިމީހުންގެ މެދުގައި އެ ފޮތް އުނގެނި ދަސްކުރާ ނަމަ، އެ ބައިމީހުންގެ މައްޗަށް ހިތްހަމަޖެހުމާއި މަޑުމޮޅިކަން ފައިބާނެތެވެ. އަދި އެކަލާނގެ ރަޙުމަތް އެބައިމީހުން ފޮރުވައިލާނެތެވެ. އަދި މަލާއިކަތްބޭކަލުން އެ ބޭކަލުންގެ ފިޔަފުޅުތަކުން އެ ބައިމީހުން ވަށައިލައްވާނެތެވެ. އަދި اللهُ سُبْحَانَهُ وَتَعَالَى، އެބައިމީހުންގެ މަތިވެރިކަމުގެ ވާހަކަ (އެބަހީ: ކީރިތި ޤުރްއާން ކިޔަވައި އެ އުނގެނި އުނގަންނައިދޭ މީހުންގެ ވާހަކަ) އެކަލާނގެ ޙަޟުރަތުގައި ކުއްތަންކުރެއްވިގެންވާ މަލާއިކަތުންނަށް ބަޔާންކުރައްވާނެތެވެ.

ހުކުރު ޚުތުބާ 

މީގެ އިތުރުން ޚުތުބާގައި ބުނީ، ޤުރުއާން އިޚުލާސްތެރިކަމާ އެކު އެ ފޮތް ތިލާވަތުކުރާ ކޮންމެ މީހަކަށްމެ، އެ ފޮތުގެ ބަރަކާތާއި މަތިވެރިކަން ލިބޭނެ ކަމަށެވެ. އަދި ހުރިހައި ހެޔޮ ކަމެއް ވަނީ އެ ފޮތުގައި ހިފެހެއްޓުމާއި، އެ ފޮތް މަތިވެރިކުރުމުގައިކަން ފާހަގަކޮށް، އަދި ހުރިހައި ނުބައިކަމެއް ވަނީ އެ ފޮތް ދޫކޮށްލުމާއި އެ ފޮތުގެ އަމުރުތަކާ ޚިލާފުވުން ކަމަށް ބުނެފައިވެ އެވެ. 

އެހެންކަމުން ޤުރުއާންގައި ހިފުމަށް ޚުތުބާގައި ނަސޭހަތްތެރިވެފައިވެ އެވެ.