ތިމާގެ ފުށުން އެހެން މުސްލިމަކަށް އެއްވެސް ގެއްލުމެއްދޭ މީހަކީ ފުރިހަމަ މުސްލިމަކަށް ނުވާނެ، ދެބަސްވުންތަކުން ވެސް ހަރުކަށިކަން ދޫކޮށްލަން ޖެހޭ: ޚުތުބާ

ތިމާގެ ފުށުން އެހެން މުސްލިމަކަށް އެއްވެސް ގެއްލުމެއްދޭ މީހަކީ ފުރިހަމަ މުސްލިމަކަށް ނުވާނެ ކަމަށާއި،  ދޭދޭ ފަރުދުންގެ މެދުގައި މަޑުމައިތިރިކަމާއި ރިވެތި އަޚުލާގު އިސްކުރުމަށް ހުކުރު ޚުތުބާގައި ގޮވާލައިފި އެވެ. 

''މަޑުމައިތިރިކަން އިސްކުރުން'' މި މައުޟޫއަށް ރާއްޖޭގެ އެކިކަ ންކޮޅުތަކަށް އިއްވި ޚުތުބާގައި ބުނީ، އިސްލާމްދީނަކީ ހަމައެކަނި އަޅުކަންތަކެއްގެ މައްޗަށް ބިނާވެފައިވާ ދީނެއް ނޫން ކަމަށާއި، ދޭދޭ ފަރުދުންގެ މެދުގައި މަޑުމައިތިރިކަމާއި ރިވެތި އަޚުލާގު އިސްކުރުމަކީ ދީނުގެ ފުރިހަމަކަމުގެ ތެރެއިން ހިމެނޭ މުހިންމު ބައެއް ކަމަށެވެ. 

ނަމާދާއި ރޯދަ ފަދަ އަޅުކަންތައް އަދާކުރުމުން ދީން ފުރިހަމަވީ ކަމަށް ބައެއް މީހުންނަށް ހީކުރެވުނު ނަމަވެސް، މީސްތަކުންނާ މުއާމަލާތުކުރުމުގައި ގެންގުޅޭ އޯގާވެރިކަމަކީ މުސްލިމެއްގެ ކިބައިގައި ހުންނަންޖެހޭނެ ލާޒިމް ސިފައެއް ކަމަށް ޚުތުބާގައި ބުނެފައިވެ އެވެ. 

އަޅުކަންތަކަށް ރައްކާތެރިވާ ބައެއް މީހުންގެ ކިބައިން ވެސް މީސްތަކުންނާ މުއާމަލާތުކުރުމުގައި ހަރުކަށިކަމާއި ދޫ ނުދިނުމާއި އެހެން މީހުންގެ ކުށްތަކަށް މައާފުނުކުރުން ފަދަ ނޭދެވޭ ސިފަތައް ފެންނަކަން ފާހަގަކޮށް ޚުތުބާގައި ބުނީ، ޚާއްސަކޮށް ދެބަސްވެ އަރައިރުންވާ ހިނދު ޝަރުޢީ މިންގަނޑު ފަހަނަޅައި ދިއުމާއި ވިޔަފާރީގެ މުއާމަލާތްތަކުގައި ނިކަމެތީންނަށް ރިއާޔަތްނުކުރުން ފަދަ ކަންކަމަކީ އިސްލާމީ ރިވެތި އަހުލާގާ ޚިލާފު ކަމެއް ކަމަށެވެ. 

މީގެ އިތުރުން ޚުތުބާގައި ވަނީ ލޮބުވެތި ނަބިއްޔާ مُحَمَّدُ صَلَّى اللهُ عَلَيْهِ وَسَلَّمَގެ ސީރަތަށް އަލިއަޅުވާލައި، އެކަލޭގެފާނުގެ އަހުލުވެރީންނާއި އަސްހާބުންނާއި އަވަށްޓެރީންގެ އިތުރުން ދުޝްމަނުންނާ މުއާމަލާތް ކުރެއްވުމުގައި ވެސް މަޑުމައިތިރިކަމާއި އޯގާވެރިކަން އިސްކުރެއްވިކަން ފާހަގަކޮށް އިބްރާތް ހާސިލް ކުރުމަށް ބާރުއަޅާފައި އެވެ.

ދުނިޔޭގައި ކިބުރުވެރިވެ ބޮޑާވެގަތް ފިރުޢައުނުގެ ގާތަށް މާތްﷲ ގެ މަތިވެރި ރަސޫލާ مُوْسَى عَلَيْهِ السَّلَام ފޮނުއްވި ހިނދު، އެ ނުބައި ފިރުޢައުނާ މުޚާޠަބުކުރައްވައި ވާހަކަފުޅުދެއްކެވުމަށް މާތްﷲ مُوْسَى عَلَيْهِ السَّلَامއަށް ވަޙީކުރެއްވި ބަސްފުޅާ މެދު ވިސްނާށެވެ! ފިރުޢައުނަކީ ބޮޑު ކާފިރެކެވެ. ކަލާނގެކަމަށް ދަޢުވާކުރި ނުލަފާ އަނިޔާވެރިއެކެވެ. ނަމަވެސް އޭނާއާ މުޚާޠާބުކުރެއްވުމަށް އަންގަވައިފައިވަނީ ވެސް މަޑުމައިތިރިކަމާއެކުގައެވެ. މާތްﷲ ވަޙީކުރައްވައިފައިވާ ބަސްފުޅުގެ މާނާގައި ވަނީ "ފިރުޢައުނުގެ ގާތަށް ތިޔަ ދެ ބޭކަލުން ވަޑައިގަންނަވާށެވެ! ހަމަކަށަވަރުން، އޭނާ އަނިޔާވެރިވެ ހައްދުފަހަނަޅައި ހިނގައްޖެއެވެ. ފަހެ، މަޑުމައިތިރި ބަހުން ތިޔަ ދެ ބޭކަލުން އޭނާއަށް ބަސް ވިދާޅުވާށެވެ! (އެއީ) އޭނާ ހަނދުމަކޮށް، ނުވަތަ ބިރުވެތިވޭތޯ އެ ކަމުގެ އުންމީދުގައެވެ." މި އާޔަތުގެ މާނައިން ދޭހަވާ ގޮތުގައި ދީން ޤަބޫލުނުކުރާ ނުބައި ނުލަފާ މީހުންނާ މުޚާޠަބުކުރާން ވެސް އިސްލާމްދީނުގައި އޮންނަނީ މަޑުމައިތިރިކޮށެވެ. އެ ފަދަ މީހުންގެ މައްޗަށް ވެސް ހަރުކަށިވުމެއް ނެތެވެ. ވީއިރު އަހަރެމެން މުސްލިމުން އެކަކު އަނެކަކާ މުޢާމަލާތުކުރާ އިރު އޯގާވެރިކަމާއި މަޑުމައިތިރިކަމާއި ތަވާޟުޢުވެރިކަން އިސްކުރުން މާ އައުލާކަން ބޮޑެވެ.

ހުކުރު ޚުތުބާ 

މީގެ އިތުރުން ޚުތުބާގައި ބުނީ، ދީންވެރި މުސްލިމަކީ އެހެން މީހުންނަށް އުނދަގޫކޮށް، އަމިއްލަ ނަފުސަށްޓަކައި ބަދަލުހިފާ މީހެއް ނޫން ކަމަށާއި، އޭގެ ބަދަލުގައި އެއީ މައާފުކުރުން އިސްކުރާ، ކިބުރުވެރިކަމެއް ނެތް މަޑުމައިތިރި މީހެއް ކަމަށެވެ. އަދި ދުނިޔޭގެ އެކި ކަންކޮޅުތަކުގައި އިސްލާމްދީން ފެތުރުނީ ވެސް މުސްލިމުންގެ ކިބައިގައި ހުރި މިފަދަ ރިވެތި ސިފަތަކުގެ ސަބަބުން ކަމަށް ބުނެފައިވެ އެވެ. 

އެހެންކަމުން، މާތްﷲ ގެ ރުއްސެވުން ހޯދުމަށްޓަކައި އެކަކު އަނެކަކަށް އޯގާތެރި ބަޔަކަށް ވުމަށް ޚުތުބާގައި ވަނީ ނަސޭހަތްތެރިވެފަ އެވެ.