ވަޒީފާތަކާއި ޒިންމާތަކުގައި އިހުމާލުވާ މީހުން އެކަމުގެ ޒިންމާ އުފުލަން ޖެހޭނެ: ޚުތުބާ

ވަޒީފާތަކާއި ޒިންމާތަކުގައި އިހުމާލުވާ މީހުން އެކަމުގެ ޒިންމާ އުފުލަން ޖެހޭނެ ކަމަށް ހުކުރު ޚުތުބާގައި ބުނެފި އެވެ. 

"މަސްއޫލިއްޔަތު އަދާކުރުމާއި ޒިންމާދާރުވުން" މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ވަނީ، ކޮންމެ މީހަކީ ވެސް އެމީހެއްގެ ބެލެހެއްޓުމުގެ ދަށުގައިވާ ކަންކަމާ މެދު ސުވާލުކުރެވޭނެ ބެލެހެއްޓުންތެރިއެއްކަން ހަނދާންކޮށްދީފަ އެވެ.

މުޖުތަމައުގެ އެއްބައިވަންތަކަމާއި ވަޙުދަތު ރައްކާތެރިކޮށް ދެމެހެއްޓުމަކީ އެންމެހައި ފަރުދުންގެ ދީނީ އަދި ގައުމީ ވާޖިބެއް ކަމަށާއި، ގައުމުގެ އެކުވެރިކަމަށް ބުރޫއަރާފާނެ ކޮންމެ ކަމަކުން މުޖުތަމައު ސަލާމަތް ކުރަން ޖެހޭ ކަމަށް ޚުތުބާގައި ބުނެފައިވެ އެވެ. 

ޚުތުބާގައި ފާހަގަކުރި ގޮތުގައި، ކޮންމެ އިންސާނަކީ ވެސް މި ދުނިޔޭގައި ކުރި އަމަލުތަކާ މެދު މާތް اللهގެ ހަޟުރަތުގައި ޖަވާބުދާރީވާން ޖެހޭނެ މީހެކެވެ. ވަކީން ޚާއްސަކޮށް، އެކި ފެންވަރުގެ މަސްއޫލިއްޔަތުތަކާ ހަވާލުވެތިބި މީހުންނާއި އެމީހުންގެ އަހުދުތަކާއި ހުވާތަކާ މެދު ގިޔާމަތް ދުވަހުން ވަކިވަކީން ސުވާލުކުރެވޭނެ އެވެ.

އެހެންކަމުން، ވަޒީފާތަކާއި ޒިންމާތަކުގައި އިހުމާލުވާ މީހުން އެކަމުގެ ޒިންމާ އުފުލަން ޖެހޭނެ ކަމުގެ އިންޒާރު ޚުތުބާގައި ދީފައިވެ އެވެ.

މީގެ އިތުރުން މުޖުތަމައެއްގެ ކުރިއެރުމާއި ތަރައްގީ ބިނާވެގެންވަނީ އަދުލުއިންސާފުގެ މައްޗަށް ކަމަށް ޚުތުބާގައި ބުންޏެވެ. އަދުލުއިންސާފުގެ ކުރިމަތީގައި އެންމެންނަކީ ހަމަހަމަ ބައެއްކަން ބަޔާންކުރަމުން، ރަސޫލާ ﷺ ގެ ހަދީޘެއްގެ މިސާލު ދެއްކެވި އެވެ.

ޤުރައިޝު ވަންހައިގެ ޝަރަފުވެރި އަންހެނަކު ވައްކަންކުރުމުން، އޭނާގެ މައްޗަށް ވައްކަމުގެ ހައްދު ގާއިމު ނުކުރައްވައި ދޫކޮށްދެއްވާތޯ ޤުރައިޝުންގެ މީހުން އުސާމާ ބުނު ޒައިދު މެދުވެރިކޮށް ރަސޫލު مُحَمَّدُ صَلَّى اللهُ عَلَيْهِ وَسَلَّمَ އަރިހުގައި ދެންނެވި ހިނދު، އެ ކަމާ ކޯފާއިސްކުރައްވައި ޙަދީޘްކުރައްވައިފައިވެ އެވެ. (أَتَشْفَعُ فِيْ حَدٍّ مِنْ حُدُوْدِ اللَّهِ؟)[1] މާނައީ: "މާތް ﷲގެ ޙައްދުތަކުގެ ތެރެއިން ޙައްދެއް ޤާއިމުނުކުރުމަށް ތިމަންކަލޭގެފާނުގެ ކިބައިން ކަލޭގެފާނު އެދިވަޑައިގަންނަވަނީތޯއެވެ؟" އެއަށް ފަހު ތެދުވެވަޑައިގެން ޙަދީޘްކުރެއްވިއެވެ. (...وَايـْمُ اللهِ لَوْ أَنَّ فَاطِمَةَ بِنْتَ مُحَمَّدٍ سَرَقَتْ لَقَطَعْتُ يَدَهَا)[2] މާނައީ: "މާތް الله ގަންދެއްވައި ވިދާޅުވަމެވެ. މުޙައްމަދުގެފާނުގެ ދަރިކަނބަލުން ފާޠިމަތުގެފާނު ވައްކަމެއް ކުރެއްވިކަމުގައި ވިޔަސް ތިމަންކަލޭގެފާނު އެ ކަމަނާގެ އަތްޕުޅު ވެސް ކަނޑުއްވާހުށީމެވެ

ހުކުރު ޚުތުބާ 

އަމާނާތްތެރިކަމާއި އިހުލާސްތެރިކަމަށް އިޝާރާތްކޮށް ޚުތުބާގައި ބުނީ، ކޮންމެ މީހަކު އަދާކުރާ ވަޒީފާއަކީ ވެސް އަމާނާތެއް ކަމަށާއި، އެ މަސައްކަތުގައި ތެދުވެރިވާން ޖެހޭ ކަމަށެވެ. އަދި ފުރިހަމަ މުސްލިމުންނަކީ އަމިއްލަ ފައިދާއަށް ވުރެ މުޖުތަމައުގެ މަސްލަހަތަށް އިސްކަންދޭ ބައެއްކަން ފާހަގަކޮށް، ތެދުވެރިކަމާއި އަމާނާތްތެރިކަމަކީ އީމާންކަމާ ގުޅިފައިވާ ސިފަތަކެއް ކަމަށް ބަޔާންކުރި އެވެ.

މީގެ އިތުރުން ގައުމުގެ ވަހުދަތު ދެމެހެއްޓުމަށްޓަކައި ދެކޮޅުވެރިކަމާއި އަރައިރުންތަކުން ދުރުހެލިވުމަށް ޚުތުބާގައި ނަސޭހަތްތެރިވެފައިވެ އެވެ. އަދި މުޖުތަމައުގެ ކޮންމެ ފަރުދަކު ވެސް އެމީހެއްގެ ޒިންމާ ފުރިހަމައަށް އަދާކުރުމަކީ ގައުމުގެ ތަރައްގީއާއި ތަނަވަސްކަމުގެ އަސްލު ކަމުގައި ޚުތުބާގައި ބަޔާންކޮށްފައިވެ އެވެ.