ނަތީޖާ ދަށްވުމާއި ކައިވެނި ލަސްވުން ފަދަ ކަންކަމަކީ ސިހުރުން މެދުވެރިވާ ކަންކަން ކަމަށް ނުބަލައި، ވަހުމްތަކުން ދުރުވޭ: ޚުތުބާ

ނަތީޖާ ދަށްވުމާއި ކައިވެނި ލަސްވުން ފަދަ ކަންކަމަކީ ސިހުރުގެ ސަބަބުން މެދުވެރިވާ ކަންކަން ކަމަށް ބަލައި ވަހުމްތަކުގެ ތެރެއަށް ނުވަނުވުމަށް ހުކުރު ޚުތުބާގައި ގޮވާލައިފި އެވެ. 

''ސިހުރުހާހޫރައިގެ ނުބައިކަން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ، ސިހުރުހާހޫރައަކީ އޭގެ ހަގީގަތެއްވާ ކަމެއްކަން ކީރިތި ގުރްއާނާއި ސުންނަތުން އެނގެން އޮންނަ ކަމަށާއި އެއީ އެންމެ ބޮޑެތި ފާފަތަކުގެ ތެރޭގައި ހިމެނޭ ޝިރުކުގެ އަމަލެއް ކަމަށެވެ. 

ސިހުރުވެރިޔާގެ ނުބައިކަމާއި ކާފިރުކަން ބޮޑުވި ވަރަކަށް އޭނާގެ ސިހުރުގެ ބާރުގަދަވާކަން ފާހަގަކޮށް ޚުތުބާގައި ބުނީ، ސިހުރު ހެދުމަކީ ބިން ފަސާދަކުރުމުގެ ތެރެއިންވާ ކަމެއް ކަމަށާއި، ސިހުރުވެރިޔާއަށް ދުނިޔެއާއި އާޚިރަތުގައި ވެސް އެއްވެސް ކާމިޔާބެއް ނެތް ކަމަށެވެ. އޭނާ ގެ ފާފައިގެ ބޮޑުކަމުން އޭނާ ގާތުލުކުރުމަށް ޞަޙާބީންނާއި ތާބިޢީ ބޭކަލުންގެ ޖަމާއަތަކުން ސާބިތުވާ ކަމަށް އިބުނު ޤުދާމާގެ "އަލްމުޣްނީ" ފޮތާ ހަވާލާދީ ޚުތުބާގައި ބުނެފައިވެ އެވެ. 

މީގެ އިތުރުން ސިހުރު ނުހެދި ނަމަވެސް އެ އުނގެނި އުނގަންނައިދިނުމަކީ ވެސް މީހާ ކުފުރުވާވަރުގެ ބޮޑު ފާފައެއް ކަމަށް ޚުތުބާގައި ބުނެފައިވެ އެވެ. 

މާތް ﷲ ވަޙީކުރައްވައިފައިވާ އާޔަތެއްގެ މާނައިގައި ވެ އެވެ. "އަދި އެއުރެންނާ އެކުގައިވާ ފޮތް ތެދުކުރައްވާ ރަސޫލަކު، ﷲގެ ހުޟުރަތުން އެއުރެންގެ ގާތަށް ވަޑައިގަތް ހިނދު، ފޮތް ލިބުނު މީހުންގެ ތެރެއިން ބަޔަކު، ﷲގެ ފޮތް އެއުރެންގެ ފުރަގަހަށް އެއްލައިލިއެވެ. (އެއީ، ﷲ ބާވައިލެއްވި ފޮތެއްކަން ވެސް) އެއުރެން ނުދަންނަ ކަހަލަ އެވެ. އަދި ސުލައިމާނުގެފާނުގެ ވެރިކަމުގެ ޒަމާނުގައި ޝައިޠާނުންތައް ކިޔަވައި އުޅުނު ތަކެއްޗަށް އެއުރެން ތަބަޢަވޫއެވެ. ސުލައިމާނުގެފާނު ކާފިރުވެވަޑައެއް ނުގަނެއެވެ. އެހެނެއްކަމަކު، އެ ޝައިޠާނުން ކާފިރުވޫއެވެ. އެއުރެން މީސްތަކުންނަށް ސިހުރު އުނގަންނައިދިނުމުންނެވެ

ހުކުރު ޚުތުބާ 

ބައްޔެއްގެ ފަރުވާއަށް ނުވަތަ އަޖުމަބަލައިލުމުގެ ނިޔަތުގައި ވިޔަސް، ސިހުރުވެރިއެއް ނުވަތަ ކާހިނެއްގެ ގާތަށް ގޮސް ސުވާލުކުރުމާއި އެމީހުންގެ ބަސް ގަބޫލުކުރުމަކީ ނަހީ ކުރައްވާފައިވާކަން ޚުތުބާގައި ހަނދާން ކޮށްދީފައިވެ އެވެ. އަދި ކާހިނެއްގެ ގާތަށް ގޮސް ކަމަކާ މެދު ސުވާލުކޮށްފި ނަމަ 40 ވަންދެން ނަމާދު ގަބޫލު ނުކުރައްވާނެ ކަމަށާއި، އެފަދަ މީހަކު ބުނާ ބަސް ގަބޫލުކޮށްފިނަމަ ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ގެ މައްޗަށް ބާވައިލެއްވުނު ދީނަށް އޭނާ ކާފަރުވެއްޖެ ކަމަށް ޙަދީޘްފުޅުތަކުން އެނގެން އޮތް ކަމަށް ޚުޠުބާގައި ބުނެފައިވެ އެވެ.

މުޖުތަމައުގައި ހިނގާ ބައެއް ކަންކަމަށް އަލިއަޅުވާލައި ޚުތުބާގައި ބުނީ، ފެންނަ ހުވަފެނެއް ނުވަތަ ގައިގައި އަޅާ ވޭނެއް، ނުވަތަ ކުއްޖެއްގެ ނަތީޖާ ދަށްވުމާއި ކައިވެނި ލަސްވުން ފަދަ ކަންކަމަކީ ސިހުރުގެ ސަބަބުން މެދުވެރިވާ ކަންކަން ކަމަށް ބަލައި، ވަހުމްތަކުގެ ތެރެއަށް ވަނުމަކީ މުސްލިމުން ކޮށްގެންވާނެ ކަމެއް ނޫން ކަމަށެވެ. ކޮންމެ ނިއުމަތަކާއި މުސީބާތެއް ވެސް ޖެހެނީ މާތް ﷲގެ މިންވަރުފުޅުންކަން ގަބޫލުކުރުމަކީ މުސްލިމުންގެ އަގީދާ ކަމަށް ޚުތުބާގައި ބުނެފައިވެ އެވެ.

ސިހުރުގެ ނުރައްކަލުން ރައްކާތެރިވުމަށްޓަކައި އޮތް އެންމެ ވަރުގަދަ އައްޑަނައަކީ މާތް ﷲއަށް ވަކީލުކޮށް ދުއާކުރުންކަން ފާހަގަކޮށް ޚުތުބާގައި ބުނީ، ފަރުޟު ފަސް ނަމާދަށް ރައްކާތެރިވުމާއި، ހެނދުނާއި ހަވީރުގެ ޒިކުރުތައް ކިޔުމާއި، ގޭތެރޭގައި ސޫރަތުލްބަޤަރާ ކިޔެވުން ގިނަކުރުމަކީ ޝައިތާނާގެ މަގުތައް ބަންދުވާނެ ކަމެއް ކަމަށެވެ. އަދި ބަލިމަޑުކަމެއް ދިމާވެގެން ފަރުވާ ހޯދާ ނަމަ، ސުންނަތުން ސާބިތުވާ ޝަރުއީ ރުޤުޔާގެ ސައްހަ މަގު އިޚްތިޔާރުކުރުމަށް ޚުތުބާގައި ވަނީ ނަސޭހަތްތެރިވެފަ އެވެ.